Read Capanahua Apokalipse 2 Bible Online

Apokalipse 2 - Capanahua bible

Apokalipse 2

¹Mɔ́ ɗé hí̧ aŋnze a Egilize ka Efɛze ɓá: Mɔ́ láɓay ka njuku ka ŋgbá rôo zíndɔ̂ʼɔsáy ka̧n ndɔ̂ʼɔ lâʼa a mɛ̌, ka há̧ra̧ bazeŋ a hɛ̧ ɓá lámbe sirú zíndɔ̂ʼɔsáy, a kú mɔny ka vbí̧rí̧lari sáy:

²Mi tu péna niŋa a mɔ̌, tɔ́ʼɔsêe rá̧ ikilaw a mɔ̌. Mi tu ɓá, mɔ ma zibɔʼɔ káwa kuu ɓéké njukuri yá. Mɔ ɓɛʼɛ bɔʼɔséna a njukuri ka sa ɓá, kú kaw ɓá apotereri, dáy kú zi tí ɓá apotereri nyá, mɔ kó ɓá kú kaw ɓá njuku kúŋɓayri.

³Mɔ kaw ɓá njuku ikilaw, mɔ tɔ́ʼɔsêe mambá ɓay tûl rɛŋ ní, a zi ta̧ nyá.

⁴Dáy hɛ̧ mbêw ka mi kó zi belyá a goló ɓá: Mɔ zi mí ɓá báŋa tílké yá.

⁵Mɔ́ kɛrɛ gel ka mɔ lé karú, a mɔ́ fere káwa a mɔ̌, a mɔ́ niŋ ɓá báŋké ka mɔ tí niŋ ka títáʼaké. Mɔ zi fere káwa a mɔ̌ nyá lé, mi e regí ziŋ mɔ́, a mbí hɛ̧ ɓá lámbe a mɔ̌ sirú a gelké gefal.

⁶Dáy hɛ̧ ka ri mí a golóy ɓá: Mɔ zi zibɔʼɔ péna niŋa a gun bɔʼɔ a Nikolari yá ɓá báŋké ka mǐ kɔ́, mi zi yáy.

⁷Njuku mí erú ka súkú lánáké lé, ké láɓay ka Têm Pukí sa hí̧ Egilizeri! «Njukuri ka ziŋ ndénay, mi e hí̧ kuriri lâʼa, léna dii ka hí̧ ndísɛ̌ʼɛ ka e ka béla gel kaw a nûnalêy.»

⁸«Mɔ́ ɗé hí̧ aŋnze a Egilize ka Ɛsmirne ɓá: Mɔ́ láɓay ka njuku ka ɓá títáʼaké rá̧ kɔ́rɔ́ké, njuku ka hú, ka a toma ka hûl sa:

⁹Mi tu tɔ́ʼɔsêe a mɔ̌ rá̧ fóya a mɔ̌. Dáy Katína lé, mɔ́ kaw ɓá njuku hɛ̧zíŋa! Mi tu ɓékéɓay ka njukuri ka sa ɓá kú kaw ɓá Juyífri, ka zi tí ɓá Juyífri yáy sa sé tûlóy: Dáy kú kaw ɓá mára̧ a gun a Sata̧nri̧!

¹⁰Mɔ́ ná ŋgú wɔ́w ɓay hɛ̧ ka mɔ e tɔ́ʼɔsêey. Mɔ́ lá, Sata̧n e lélaw a wǎyri, a ɓá njuku a há̧narí̧ ɓá ŋgɛ̧́náké a bazeŋ a wǎyri, ka̧n vûn sɛl, kú e ɓá wǎyri tɔ́ʼɔsêe nâm bôo! Mɔ́ ŋgbá law mbêw sé ka̧ hûl, nǎŋnɔ́ mi e hí̧ mɔ́ mbulí ka njuku ka ziŋ káwa a ndísɛ̌ʼɛ dát e ziŋákéy.

¹¹Njuku mí erú ka súkú lánáké lé, ké láɓay ka Têm Pukí sa hí̧ Egilizeri! Njukuri ka ziŋ ndénay, tí ziŋ hûl a bɔʼɔ séreké mbaa.»

¹²«Mɔ́ ɗé hí̧ aŋnze a Egilize a Pɛrgám ɓá: Mɔ́ lá, ɓay ka njuku ka erú ka gá̧má ka nzáʼaké sére, tûlké ná pɛ́rɛp sa:

¹³Mi tu péna a mɔ̌ rá̧ gel ka mɔ kawrúy: A goló nɔ́, ɓá gelkáwa mbây a Sata̧n. Mɔ ŋgbá mí ka law mbêw, a zi sáŋ láɓulaw hí̧ mí nyá, a ɓil nâmri̧ a kú í Aŋtipâs, njuku péna law mbêw a mǐ a gel a wǎyri, a goló ka Sata̧n kawrú, mɔ zi sáŋ mí nyá.

¹⁴Dáy hɛ̧ mbêw ka mi kó zi belyá a goló ɓá: Mɔ kaw kuu njukuri ka tɔ́ŋ hɛ̧tɔ́ʼɔ a Balâm. Ké sa hí̧ Balák ɓá ké si daw hí̧ gun Izirayɛ́lri, ɓay ɓá kuriri sɔ̧́ háy a kú niŋ hɛ̧púna rú̧ hí̧ vbônri̧, a ɓá kuriri rí ɓil niŋ dala.

¹⁵Nǎŋnɔ́, mɔ kaw kuu njukuri ka tɔ́ŋ hɛ̧tɔ́ʼɔ a gun bɔʼɔ a Nikolari kɔ́.

¹⁶Mɔ́ fere kaw a mɔ̌, a tí yá lé, mi e gé ziŋ mɔ́, zaa kpay nɛ́ a gé rúbére kuu njuku nɔ́rí̧ ka gá̧má ka tɛ̧́ ka nzáʼa ní.

¹⁷Njuku mí erú ka súkú lánáké lé, ké láɓay ka Têm Pukí sa hí̧ Egilizeri! Njukuri ka ziŋ ndénay, mi e hí̧ kuriri mân a múnáké. Mi e hí̧ kuriri kɔ́ mbêw mbêw too, saw pukí a kú ɗé rɛŋ a ŋgɛŋké ka̧n tûlké, ka njuku a há̧na ma túnáké yá, ɓá njuku ka nyá sawké.»

¹⁸«Mɔ́ ɗé hí̧ aŋnze a Egilize ka Tiyátir ɓá: Mɔ́ láɓay ka Gun a Gáŋvbôn, njuku ka nûn nɛ́ taʼa ɓá báŋa rêm hɔrɛ, ka bɛʼɛ fé ɓá báŋa saw ka erú ka nɛ́rɛ̧ ka ka̧n hɔrɛ sa:

¹⁹Mi tu péna niŋa a mɔ̌, zína a mɔ̌, law mbêw a mɔ̌, péna a ndáráké a mɔ̌ rá̧ ikilaw a mɔ̌. Mi tu ɓá, péna a mɔ̌ a ŋgɛŋké ŋgɛ̧́ ndé tâ̧wké.

²⁰Dáy hɛ̧ mbêw ka mi kó zi belyá a goló ɓá: Mɔ pɔŋ Zézabɛ́l, wûny nɔ́ ka tɔ́ʼɔ ɓá ké kaw ɓá porofɛ́t, rɔ́ʼɔ njukupéna a mǐri̧, a ɓá kuriri rí ɓil niŋ dala, rá̧ sɔ̧́ háy a kú niŋ hɛ̧púna rú̧ hí̧ vbônri̧.

²¹Mi pɔŋ ŋgboro hí̧ nɛ́ ɓay ké ma fere káwa a mɛ̌, dáy, ké zi fere káwa a mɛ̌ a pɔŋ niŋ dala yá.

²²Ɓaykénɔ́, mi e ɓá nɛ́ ná hîi tɔ́ʼɔsêe kuu njukuri ka niŋ dala kuu mɛ̌ too. Dáy kú mí fere káwa a kuriri, a pɔŋ niŋ ɓá báŋa mɛ̌y, kú tí lé ɓil ɓékéhɛ̧ nyá.

²³A féké ɓáy, mi e í gun a mɛ̌ri̧. A goló Egilizeri too e tu ɓá, mi kaw ɓá njuku ka ɛ́ ɓil kɛrɛ rá̧ hɛ̧ ka njukuri ziy. Mi e niŋ hí̧ njuku mbêw mbêw too a bazeŋ a wǎyri, sé tûl péna niŋa a mɛ̌.

²⁴A wǎyri, ka e ka Tiyátir, ka zi nyá tɔ́ʼɔ ɓayké nɔ́ nyá, ka zi tu bɔʼɔké mbêw, hɛ̧ ka njukuri ɗí ɓá: “sɛ̧w a Sata̧n” nyá, nǎŋnɔ́ mi sa hí̧ wǎyri ɓá: Mi tí ɓá hóla a féké hol wǎyri ɓáy yá.

²⁵Dáy, hɛ̧ ka i erúy, í ŋgbá ɓá kpúnáké ka̧ nâm ka mi e regí.

²⁶A njukuri ka e ziŋ ndéna, ka a niŋ hɛ̧ ka mi zi ka̧ kɔ́rɔ́kéy, mi e hí̧ kuriri kpɔ́ŋa kaw tûl a njukuri.

²⁷Kú e koro kuriri ka ka̧w lari, ɓá báŋké a kú vbere íri pɔ̂ny, ɓá mbêwké ɓá báŋa mǐ kɔ́, a mi ziŋ kpɔ́ŋa a gel a Bâa a mǐ.

²⁸Nǎŋnɔ́, mi e hí̧ kuriri rôo pélé.

²⁹Njuku mí erú ka súkú lánáké lé, ké láɓay ka Têm Pukí sa hí̧ Egilizeri!»