Read Capanahua Apokalipse 20 Bible Online

Apokalipse 20 - Capanahua bible

Apokalipse 20

¹Falké mi kó aŋnze a há̧na ɗere a nûnalê, ké ŋgbá kílé pɔ̂ny ka kɔ́rɔ́ké zi tí yáy rá̧ baw sɛl wɛ̧̂ɛ.

²Ké gí ŋgbá Daragɔŋ, tâ̧w sôy, a kú ɗí ɓá zábolo malé Sata̧n, dáy a ŋgá̧ nɛ́ a sɛl wɛ̧̂ɛ ka̧n, ɓay a mbimbɔ̂m ísɔ́t bôo.

³Aŋnze gé ɓá nɛ́ vbú pɔ̂ny ka kɔ́rɔ́ké zi tí yáy, a dara nzáʼaké, a ŋgá̧ tûlké ka̧nrú̧, ɓay a Daragɔŋké, ké zi ná rɔ́ʼɔ njukuri ka̧ mbimbɔ̂m ísɔ́t bôo. Fal mbimbɔ̂m ísɔ́t bôo nɔ́, kú e sɛl nɛ́ ɓay a nâm kpay.

⁴Ka falké ɓáy, mi kó hɛ̧káwa mbây, njukuri ka kaw tûlké, kú hí̧ kuriri kpɔ́ŋa walɓay. Lé mi kó têm a njukuri a kú tí í kuriri ɓay a tûl law mbêw a kuriri sé tûl béla ɓay a hɛ̧ ka Zezú ten rá̧ ɓay a Gáŋvbôn. Kú zi hɔ̧́ sâ̧ny malé têm a mɛ̌ yá, kú zi ziŋ ŋgána a sâ̧nyké ka ŋgbɔ́ŋɔ a kuriri malé ka ndɔ̂ʼɔ a kuriri yá. Kú toma ka hûl, a gí kaw mbây kuu Kiris mbimbɔ̂m ísɔ́t bôo.

⁵Hûl a fékéri tí toma ka hûl yá, ka mbimbɔ̂m ísɔ́t bôo nɔ́ ké tá rá. Ɓá titíla toma a hûlri.

⁶Béla hí̧ njukuri ka ziŋ titíla toma ka hûl, kú kaw ɓá njuku a Gáŋvbônri̧, hûl a séreké zi tí ka kpɔ́ŋa sé tûl a kuriri mbaa. Kú e kaw ɓá njuku nzáʼaká̧na a Gáŋvbônri̧ rá̧ Kirisri. Kú e kaw mbây kuu Kiris a ɓil mbimbɔ̂m ísɔ́t bôo nɔ́.

⁷Gelka mbimbɔ̂m ísɔ́t bôo nɔ́ tá dáy, kú e pɔŋ Sata̧n ka vûn sɛl.

⁸Ké e tɛ̧́na ɓay a rɔ́ʼɔ njuku a tísiriri ka e ka kɔ́rɔ́ tísiri nɛŋ too, Gɔg rá̧ Magog, ɓay a mára̧ kuriri ɓay a rúbére, ŋgɛ̧́na a kuriri ɓá báŋa sikɔʼɛrɛ ka gbaŋ mbii lúkí.

⁹Kú he gí tísiri ka gí ɗɔ́ŋ pû a njuku a Gáŋvbônri̧, pû zína a Gáŋvbôn. Dáy hɔrɛ ɗere a nûnalê, a gí rɛ́ŋ kuriri.

¹⁰Sata̧n ka rɔʼɔ njukuri, kú ɓá nɛ́ vbú ɓil fâ̧w hɔrɛ, gel a kú ɓá sâ̧ny rá̧ porofɛ́t a manyákéri ka̧nrú̧y. Kú e tɔ́ʼɔsêe sû̧ŋ ka sêe dát.

¹¹Falké mi kó gáŋ hɛ̧káwa ɓá pukí rá̧ njuku ka kaw tûlké. Tísiri rá̧ nûnalê ŋgú ɓá ɗínáké ka gbaŋ mûn nɛ́, kú zi kó kuriri mbaa.

¹²Lé mi kó hûlri, gáŋnjukuri rá̧ gun a léléri, ew a mbɛl a hɛ̧káwa mbây. Kú ŋgburu mbétéri. Lé mbété a féké ɓáy ŋgburu, ɓá mbété a ndísɛ̌ʼɛ. Kú walɓay kɔ́ tûl a hûlri sé tûl péna niŋa a kuriri, Ɓá báŋké ka ɗé ka̧n ɓil mbétéri.

¹³Mbii lúkí ten hûl a mɛ̌ri̧ a hí̧, hûl rá̧ pû a hûlri ten hûl a kuriri a hí̧. Gé lé too ziŋ walɓay a mɛ̌ sé tûl péna niŋa a mɛ̌.

¹⁴Dáy hûl rá̧ pû a hûlri, kú ɓá kuriri vbú ɓil fâ̧w hɔrɛ. Ɓil fâ̧w hɔrɛ nɔ́ ɓá hûl a séreké.

¹⁵Njuku too ka rɛŋɛ́ zi tí a ɓil mbété a ndísɛ̌ʼɛ yáy, kú ɓá nɛ́ vbú ɓil fâ̧w hɔrɛ.