Read Capanahua Apokalipse 4 Bible Online

Apokalipse 4 - Capanahua bible

Apokalipse 4

¹A falké nɔ́, mi ɛ̧rɛ̧ gel lé, mi kó nzáʼaŋgboro ka ŋgburu a nûnalê. Kɔŋ a njuku ka tí saɓay ɗambɛl ɓá báŋa tɛ̧̂w a kú ul, sa hí̧ mí ɓá: «Mɔ́ he gí gelé, a mí tɔ́ʼɔ mɔ́ hɛ̧ ka e gínay ka falké.»

²A núnmbɛ̧́nɛ́, Têm Pukí niŋ péna ka mûn ní, dáy mi kó hɛ̧káwa mbây a nûnalê. A tûl hɛ̧káwaké, njuku kawrú.

³Mûn nɛ́ táʼa ɓá báŋa sawri ka e ka nɛ́rɛ̧ mambáy a kú ɗí ɓá jaspe rá̧ sarduwa̧n. Lé, rúwí ki ɗɔ́ŋ hɛ̧káwaké a táʼa ɓá báŋa saw ka e ka nɛ́rɛ̧ mambáy, a kú ɗí ɓá émerode.

⁴Hɛ̧káwa mbây a féké bonsére a nɛŋ, ɗɔ́ŋ hɛ̧káwa mbâyké, gáŋnjukuri bonsére a nɛŋ kawrú, a ri gári ɓá pukí, ka hol mbulí a kú niŋ ka vbí̧rí̧lari ka̧n tûl a kuriri.

⁵A tûl hɛ̧káwa mbâyké nɔ́, mbɔ̂m vbú hâ rá̧ kɔŋ a njukuri ka gbé rá̧ mbɔ̂m ka pom. Ka̧n zíndɔ̂ʼɔsáy taʼa a mbɛl a hɛ̧káwa mbâyké, ɓá têm zíndɔ̂ʼɔsáy a Gáŋvbôn.

⁶A mbɛl hɛ̧káwa mbâyké, hɛ̧ há̧na ná ɓá báŋa mbii lúkí, a taʼa ɓá báŋa vɛ́r. A bazeŋ a gel ka ɗɔ́ŋ hɛ̧káwaké, hɛ̧ há̧narí̧ erú, tûl a kuriri nɛŋ, mûn a kuriri too ná ɓá nûn, a mbɛl rá̧ fal too.

⁷A titíláké, ɛ́ŋ ɓá báŋa mamûu, a séreké ɛ́ŋ ɓá báŋa gun nday, a sáyké nûn nɛ́ ná ɓá báŋa a njuku, a nɛŋké ɛ́ŋ ɓá báŋa ŋgíŋ ka kaw zɔnáy.

⁸Hɛ̧ nɔ́rí̧ nɛŋ too erú ka pɔ́rɔ zêe, nûn mbarú a sâa rá̧ taa too. Kú ɗí si̧ŋ sû̧ŋ rá̧ sêe too ɓá: «Táŋáké, táŋáké, táŋáké ɓá Gáŋmbây, Gáŋvbôn ka erú ka kpɔ́ŋa mambáy. Ka erá, ka erú, ka e gína.»

⁹Kuriri nɛŋ nɔ́, kú hí̧ hɔ̧́na, a ɗél, a zi awá hí̧ njuku ka kaw tûl hɛ̧káwa mbây, ka kaw ka ndísɛ̌ʼɛ dát.

¹⁰A kú kaw niŋ nǎŋ lé, kpɔʼɔrɔ́ri bonsére a nɛŋ nɔ́rí̧, huku tísiri a mbɛl a njuku ka kaw tûl hɛ̧káwa mbây, a hɔ̧́ njuku ka erú ka ndísɛ̌ʼɛ dát. Kú ɓá mbulí a kuriri kɔ̧ mbɛl a hɛ̧káwa a mbâyké a sa:

¹¹«Gáŋmbây, Gáŋvbôn a ɓurú, mɔ marú̧ ɓay a ziŋ hɔ̧́na, ɗéla rá̧ kpɔ́ŋa. Ɓayhí̧lé, ɓá mɔ̌ pé mɔny hɛ̧ri̧ too, hɛ̧ nɔ́rí̧ too ziŋ káwa a ɓil zína a mɔ.»