Read Capanahua Apokalipse 5 Bible Online

Apokalipse 5 - Capanahua bible

Apokalipse 5

¹Mi kó mbété a há̧na ɓá kánáké ka ndɔ̂ʼɔ lâʼa a njuku ka kaw tûl hɛ̧káwa mbây. Kú ɗé hɛ̧ kɔ̧ ɓilké rá̧ falké, a kú ŋgá̧ ka sɛl ɓá ŋgána gelké zíndɔ̂ʼɔsáy.

²Dáy mi rekó aŋnze ka erú ka ŋgɛ́rɛ kaw vbá̧nzáʼa a sa: «A gé marú̧ ɓay a kúŋ sɛl ŋgánakéri a ŋgburu mbétéké lé?»

³Dáy njuku, ka tísiri malé a nûnalê, malé ka táʼa siri ka marú̧, ɓay a ŋgburu mbétéké a kó ɓilké zi tí yá.

⁴Mi vú mambá, ɓay ka njuku a há̧na mbêw, ka marú̧ ɓay a ŋgburu mbétéké a kó ɓilké zi tí yáy.

⁵Nǎŋnɔ́ gáŋnjuku a há̧na mbêw sa hí̧ mí ɓá: «Mɔ́ vú yá. Mɔ́ kó, mamûu a î̧n a Juda, sɛl î̧n a Gáŋmbây Davít, ké ndé ka kpɔ́ŋa, ké ma ɓay a lú hɛ̧ ŋgána zíndɔ̂ʼɔsáy nɔ́, a ŋgburu ɓil mbétéké.»

⁶Dáy mi kó, gun mbólé, ɛ́ŋ kú vbé nɛ́, ew sâa a lawgel a hɛ̧káwa mbây, dáy hɛ̧ri̧ nɛŋ nɔ́ rá̧ gáŋnjukuri kaw tɔ́ŋ nɛ́. Ké erú ka tɛ̧̂w zíndɔ̂ʼɔsáy, rá̧ nûn zíndɔ̂ʼɔsáy, ka ɓá têm zíndɔ̂ʼɔsáy a Gáŋvbôn, a kú pé ma gelri too a tísiri.

⁷Nǎŋnɔ́, gun mbólé ráy, ta̧m a gí mbí mbété ráy ka ndɔ̂ʼɔ lâʼa a njuku ka kaw tûl hɛ̧káwa a mbây.

⁸Núnmbɛ̧́nɛ́, hɛ̧ nɔ́rí̧ ka nɛŋ rá̧ gáŋnjukuri bonsére a nɛŋ nɔ́rí̧, huku tísiri a mbɛl a gun mbólé ráy. Njuku mbêw mbêw too, erú ka nzáŋá rá̧ yoŋ vbí̧rí̧lari, mbá ka yámbó, ka ɓá hɛ̧gɔ́ŋa a njuku a Gáŋvbônri̧.

⁹Kú ɗí si̧ŋ, a ɓá si̧ŋ a ŋgɛŋké ɓá: «Mɔ́ ma ɓay a mbí mbété nɔ́, a kúŋ sɛl ŋgánakéri. Ɓayhí̧lé, kú í mɔ́, dáy ka sêm mûn nɔ́, mɔ zé njukuri hí̧ Gáŋvbôn njuku î̧nri̧ too, njuku nzáʼaɓayri too, njuku pûri too rá̧ njuku a tísiri too.

¹⁰Mɔ niŋ kuriri tɛ̧́ mbây rá̧ njuku nzáʼaká̧nari̧, ɓay a niŋ péna hí̧ Gáŋvbôn a manárí̧, dáy kú e kaw mbây ka tísiri.»

¹¹Mi ɛ̧rɛ̧ ɓay lé, mi lá kɔŋ a aŋnzeri ɓá ŋgɛ̧́náké: Bon a kuriri ŋgɛ̧́ mambá. Kú ew ɗɔ́ŋ hɛ̧káwa mbây, kuriri kuu hɛ̧ nɛŋ nɔ́rí̧ rá̧ gáŋnjukuri bonsére a nɛŋ nɔ́rí̧,

¹²a kú ɗí si̧ŋ ɓá gbénáké ɓá: «Gun mbólé ka ziŋ hûl, marú̧ ɓay a ziŋ kpɔ́ŋa, rá̧ hɛ̧zíŋa, rɔ̧́na rá̧ kpɔ́ŋa, díma, hɔ̧́na rá̧ ɗéla!»

¹³Mi lá kɔ́, hɛ̧ri̧ ka Gáŋvbôn mɔny a nûnalê, ka tísiri, a ɓil mbii lúkí, hɛ̧ri̧ too a ké mɔny, kaw ɗí si̧ŋ: «Hi̧ njuku ka kaw ka tûl hɛ̧káwa mbây rá̧ gun mbólé ɗéla, díma, hɔ̧́na rá̧ kpɔ́ŋa ké hí̧ wǎyri dát!»

¹⁴Hɛ̧ nɛŋ nɔ́rí̧ zibɔʼɔké: «Amɛn!» Dalé gáŋnjuku nɔ́rí̧ huku tísiri a hɔ̧́ Gáŋvbôn.