Read Capanahua Apokalipse 6 Bible Online

Apokalipse 6 - Capanahua bible

Apokalipse 6

¹Dáy mí kó gun mbólé kúŋ titíla sɛl ŋgána mbêw a ɓil sɛl ŋgána zíndɔ̂ʼɔsáy, lé mi lá njuku mbêw a ɓil a hɛ̧ nɛŋ saɓay ɓá gbénáké ɓá báŋa mbɔ̂m ka pom ɓá: «Mɔ́ gí!»

²Mi ɛ̧rɛ̧ lé, mí kó dôn pukí. Njuku ka he kaw tûlké, ŋgbá dii gó, kú hí̧ nɛ́ mbulí. Ké kála mɛ̌ njuku ndéna ɓay a sé rúbére ka ndé ɓáy.

³Gelka gun mbólé kúŋ sɛl ŋgána a séreké, mi lá njuku a séreké a ɓil a hɛ̧ nɛŋ nɔ́rí̧ sa ɓá: «Mɔ́ gí!»

⁴Lé dôn a féké ta̧m gí, mûn nɛ́ ɓá sɛ́ŋɛ́. Njuku ka he kaw tûlké, kú hí̧ nɛ́ kpɔ́ŋa lú káwa a vónáké ka tísiri, ɓay a njukuri kú í há̧narí̧ ɓá báŋké a kú ziy. Kú ɓá hí̧ nɛ́ gáŋ gá̧má.

⁵Gelka gun mbólé kúŋ sɛl ŋgána a sáyké, mi lá hɛ̧ a sáyké a sa: «Mɔ́ gí!» Mi ɛ̧rɛ̧ lé, mí kó dôn a pírí. Njuku ka he kaw tûlké, ŋgbá hɛ̧ léhɛ̧ ka̧n ndɔ̂ʼɛ.

⁶Mi lá ɛ́ŋ báŋa kɔŋ a njuku a bazeŋ a hɛ̧ nɛŋ nɔ́rí̧ a sa: «Yoŋ bulé mbêw ɓá kpáʼandɔ̂ʼɔ a nâm mbêw rá̧ yoŋ nǎŋ sáy ɓá kpáʼandɔ̂ʼɔ a nâm mbêw. Dáy, mɔ́ ná ɗá mára̧ rá̧ vôn.»

⁷Gelka gun mbólé kúŋ sɛl ŋgána a nɛŋké, mi lá hɛ̧ a nɛŋké a sa: «Mɔ́ gí!»

⁸Mi ɛ̧rɛ̧ lé, mí kó dôn ɗên mûn nɛ́ ɛ́ŋ báŋa goy dii. Njuku ka he kaw tûlké rɛŋɛ́ ɓá hûl, dalé pû a hûlri tɔ́ŋ nɛ́. Kú hí̧ kuriri kpɔ́ŋa, a wal tísiri nɛŋ a hí̧ kuriri; ŋgboro mbêw, ɓá kú í njukuri, a ŋgboro a bére rá̧ nzala, ka ŋgboro a záŋmári̧, rá̧ ka ŋgboro a hɛ̧sâ̧ny wɔ̧rɔ̧́ri̧.

⁹Gelka gun mbólé kúŋ sɛl ŋgána a ndíɓíké, mí kó ka bɔʼɔ ka̧na, têm a njukuri ka ziŋ hûl ɓay a hɛ̧ a kú nyá ɓay a Gáŋvbôn, ka sa táŋáké kɔ̧ kálay.

¹⁰Kú vbá̧nzáʼa ɓá gbénáké ɓá: «Gáŋmbây a táŋáké rá̧ gbátké, Mɔ́ zoko hí̧, ɓay a walɓay kɔ̧ tûl a njuku a tísiriri, ɓay hûl a ɓurú lé?»

¹¹Dalé kú hí̧ kuriri, njuku mbêw mbêw too gáŋ laa pukí, a sa hí̧ kuriri ɓá kú ikilaw a kuriri a kú zoko ɓil nâm tɛ̧́w, ɓayhí̧lé, nyîn a kuriri rá̧ mbaŋa péna a kuriri, ka e ziŋ hûl ɓá báŋa kuriri kɔ́y, bôn a kuriri, zi pa̧n mágelké yá ɓáy.

¹²Dalé mí kó gun mbólé kúŋ sɛl ŋgána a zêeké. A goló tísiri laŋ ka ŋgɛ́rɛ, sêe tɛ̧́ yírí ɓá báŋa laa a gel hûl, rá̧ fêw ré sɛ̧́ ɓá báŋa sêm.

¹³Rôori too a nûnalê gí kɔ̧ tísiri, ɓá báŋa léna dii njɔ̧̂ny ka kpáʼa yá ɓáy, a kúna laŋ ka tooy.

¹⁴Nûnalê ɓɔ́l ɓá báŋa mbété a kú káy, konri̧ too rá̧ tûlkɔ̂ɔri too, kú lú kuriri ka gelkáwa a kuriri.

¹⁵Mbây a tísiriri, gáŋnjuku a tûlkéri, mbây a ŋgawbéreri, njuku hɛ̧zíŋári̧, kpɔ́ŋa njukuri rá̧ njuku a fékéri too, koyri malé njuku ka zi tí ɓá koyri nyáy, ŋgú, a mú lá ɓil pɔ̂nyri̧ rá̧ bazeŋ a sawri a ɓil konri̧.

¹⁶Dalé kú sa hí̧ konri̧ rá̧ gáŋ sawri ɓá: «Í lé kɔ̧ tûl a ɓurú, a í puru rú, ɓay a njuku ka kaw tûl hɛ̧káwa mbây, ké zi ná kó rú, rá̧ ɓay hɛ́rɛ a gun mbólé ké ná kɔ̧ tûl a ɓurú.

¹⁷Ɓayhí̧lé nâm hɛ́rɛ a lúkí a mɛ̌ ka̧ dá, a gé ma pɛ̧́na ka ndɔ̂ʼɛ lé?»