Read Capanahua Apokalipse 9 Bible Online

Apokalipse 9 - Capanahua bible

Apokalipse 9

¹Aŋnze a ndíɓíké ul tɛ̧̂w a mɛ̌. Dáy mi kó rôo ka to a nûnalê gí tísiri, kú ɓá kílé nzáʼa gáŋ pɔ̂ny ka kɔ́rɔ́ké zi tí yá hí̧ nɛ́.

²Dáy rôoké gí ŋgburu nzáʼa pɔ̂nyké, lé súkú ɗú ɓá báŋa súkú gáŋ hɔrɛ, a he sé sâa, a yírí nûnalê, njuku zi ma kó sêe yá.

³Dáy tûyri tɛ̧́ a ɓil súkú ráy, a wal ma tísiri, kú hí̧ kuriri kpɔ́ŋa mambɛ̧́nɛ́ kuu kpɔ́ŋa a ndɔ̂yri.

⁴Kú de kuriri niŋ ɓéké hí̧ hoyri, diiri, hɛ̧payri, dáy a sa ɓá kú niŋ ɓéké hí̧ ɓá njukuri, a kú zi ɓá ŋgána a Gáŋvbôn ka̧n ŋgbɔŋ a kuriri yáy.

⁵Kú zi hí̧ kuriri ŋgboro ɓá kú í njukukéri yá, dáy ɓá kú niŋ kuriri tɔ́ʼɔsêe fêw ndíɓí. Sénaké mambɛ̧́nɛ́ kuu séna a ndɔ̂y ka ndɔ njuku.

⁶A ɓil fêw ndíɓí nɔ́, njukuri e ɛ́ hûl, dáy a tí ziŋ hûl yá. Kú zi ɓá kú hú, dáy hûl e ŋgú kuriri.

⁷Tûykéri kaw ɓá báŋa dôn ka kaw ɗɛ́ŋ ɓay a gé ɓá bére. A tûl a kuriri, kú hol hɛ̧ há̧na ɓá báŋa mbulí, a kú mɔny ka vbí̧rí̧ laríy rá̧ nûn a kuriri ná ɓá báŋa nûn a njuku.

⁸Kú erú ka tâny tûl ɓá báŋa tâny tûl a wûnynjukuri rá̧ sîl a kuriri ná ɓá báŋa sîl a mamûuri̧.

⁹Nzaʼálaw a kuriri ɛ́ŋ lǒo kú ri ŋgáŋbére, rá̧ gbéna pɔ́rɔ a kuriri ná ɓá báŋa gbéna a matuwa bére, ka dônri̧ kɔʼɔ ɓay a gé ɓá bérey.

¹⁰Sɛ̧̂w a kuriri ná pɛ́rɛp ɓá báŋa sɛ̧w a ndɔ̂yri. Dáy ka sɛ̧̂w a kuriri nɔ́, pé kú erú ka kpɔ́ŋa niŋ njukuri tɔ́ʼɔsêe fêw ndíɓí.

¹¹Gáŋnjuku a kuriri, ɓá aŋnze a gáŋ pɔ̂ny ka kɔ́rɔ́ké zi tí yáy. Kú ɗí rɛŋké a nzáʼa Hebiré ɓá: «Abadoŋ» rá̧ ka nzáʼa Girɛ́k ɓá: «Apoliyɔŋ» ka zi ɓay a sa ɓá: «Njuku gbɛʼɛrɛ hɛ̧.»

¹²Titíla lelêe tá dá. Dáy, a fékéri sére e gína ɓáy.

¹³Nǎŋnɔ́, aŋnze a zêeké ul tɛ̧̂w. Lé mi lá kɔ́ŋ a njuku ka gbé gí ka kɔ́rɔ́ gel nɛŋ a nzáʼaká̧na a kú mɔny ka vbí̧rí̧lari, ka ew a mbɛl a Gáŋvbôn.

¹⁴Kɔŋké sa hí̧ aŋnze a zêeké, ka ŋgbá tɛ̧̂w ka̧n ndɔ̂ʼɛ ɓá: «Mɔ sɛl aŋnzeri nɛŋ nɔ́ a kú ŋgá̧ kuriri ka sɛl wɛ̧̂ɛ, ka gbaŋ gáŋmbii a Efárate.»

¹⁵Dáy kú sɛl aŋnze nɛŋ ráyri̧. Kú sɛl kuriri, ɓayhí̧lé kú mɔny kuriri zoko sɛl a sêeké nɔ́, zoko nâmké nɔ́, zoko fêwké nɔ́, zoko mbimbɔ̂mké nɔ́, ɓay a kú í njukuri mbêw a ɓil a njukuri sáy too ka tísiri.

¹⁶Kú hí̧ mí ŋgɛ̧́na a ŋgawbéreri ka erú ka dôn ɓá: Ŋgawbéreri miliyɔŋ ísɔ́t sére.

¹⁷Nǎŋnɔ́ mi kó dôn rá̧ njukuri ka he tûlké: Kú erú ka ŋgáŋbére ɓá sɛ́ŋɛ́ ɓá báŋa hɔrɛ, a ǎ̧w ɓá báŋa saw ka erú ka nɛ́rɛ̧ a kú ɗí ɓá safîr rá̧ bubukléré ɓá báŋa sôm saw hɔrɛ. Tûl a dônkéri ɛ́ŋ ɓá báŋa tûl a mamûuri̧, a nzáʼa a kuriri tɛ̧́ ɓá hɔrɛ, súkú rá̧ sôm saw hɔrɛ[2].

¹⁸A ɓil a njukuri sáy too ka tísiri, mbêw ziŋ hûl ka ŋgboro a ɓékéhɛ̧ri̧ sáy nɔ́: Hɔrɛ, súkú rá̧ sôm saw hɔrɛ, ka tɛ̧́ a nzáʼa a dônkéri.

¹⁹Dáy kpɔ́ŋa a dônkéri e ka nzáʼa a kuriri, rá̧ sɛ̧̂w a kuriri. Ɓayhí̧lé sɛ̧̂w a kuriri ɛ́ŋ ɓá sôy, erú ka tûl, ka ŋgboro a sɛ̧̂wké nɔ́, pé kú ɓá njukuri tɔ́ʼɔsêe.

²⁰Njukuri ka zi ziŋ hûl a ɓil ɓékéhɛ̧ nɔ́rí̧ yáy, kú zi pɔŋ tɔ́ŋ vbônri̧, a kú mɔny ka ndɔ̂ʼɔ a kuriri yá. Kú zi pɔŋ hɔ̧́ têm ɓékéri rá̧ hɛ̧ri̧ a kú niŋ ka vbí̧rí̧lari, ka lari, ka wɛ̧̂ɛ, ka saw rá̧ dii, hɛ̧ri̧ ka zi ma kó gel, ma láɓay malé ma séséna nyá.

²¹Kú zi pɔŋ í hûl, niŋ nda̧m, niŋ dala rá̧ riwa a kuriri yá.