Read Pangasinan GENESIS 35 Bible Online

GENESIS 35 - Pangasinan bible

GENESIS 35

¹"Inkuan na Dios ed kinen Jacob, Lakan tampol ed Betel tan manayam kad man. Manggawa kad may altar a para siak a Dios a pinmayawar ed sika nen ibabatikan moy agim ya Esau.

²"Kanyan inkuanen Jacob ed pamilya to tan amin a kaiba to, Ibantak yo ray diriyos na arum a bansa ya awit yo; linisan yoy sikayon dili, insan kayo mampales na malinis.

³"Onekal itayo la dia tan onla itayo ed Betel, a dimay panggawaan koy altar a para Dios a tinmulong ed siak nen wala ak ed kairapan tan inoolup to ak ed inerman a nilak.

⁴"Inter da sirin ed kinen Jacob iray amin a walad sikaran diriyos na arum a bansa, pati saray ikaw ya akabitin ed saray layag da. Inkotkot to ra yan amin ed silong na kiew a robli ya asingger ed Sikem.

⁵"Nen onsisiput si Jacob tan saray anak ton lalaki, sinmabiy baleg a takot ed saray totood kaliber-liber iran baley, kanyan ag da ra inosilan.

⁶"Linmay Jacob tan amin a totoo to diad Luz, a tatawagey Betel natan, diad dalin na Canaan.

⁷"Nanggawad man na altar tan inngaran to man a pasen na Betel, ta dimay pinayawaran na Dios ed sikato nen ibabatikan toy agi to.

⁸"Inatey si Debora a nankomponid kinen Rebeca nen ogaw ni, tan imponpon dad silong na kiew a robli a walad abalaten na Betel. Kanyan saman a kiew atawag na Robli na Ermen.

⁹"Nen pinmawil si Jacob a nanlapud Mesopotamia, pinmayawar lamet ed sikato so Dios tan binindisionan to.

¹⁰Inkuan na Dios ed sikato, Jacob so ngaran mo, balet manlapud natan Israel la. Kanyan Israel so inngaran na Dios ed sikato.

¹¹Insan inkuan na Dios ed sikato, Siak so Dios a Makapanyarin-amin. Nawalaan kay amayamay ya anak. Manlapud sika ray bansa tan arari.

¹²Iter kod sikay dalin ya inter kod kindi Abraham tan Isaac, tan iter ko met ed saray kabyangay boleg mo no andi ka lad bilay.

¹³Insan tinaynan lay Dios si Jacob.

¹⁴Diman ed samay pasen ya akitongtongay Dios ed sikato, angipaalagey si Jacob na baton pakanudnunotan tan insaklang tod Dios diad impangikalbo toy alak tan larak na oliba.

¹⁵Inngaran to na Betel iman a pasen.

¹⁶Tinaynan nen Jacob tan say pamilya to so Betel, et nen asingger la ra ed Efrata, sinmabiy panaon a pananak nen Raquel, et nanairapan ed pampapasakit to.

¹⁷Nen mapalaloy pampapasakit to, inkuan na manamyanak ed sikato, Ag ka natatakot, Raquel; sakey a laki lamet so anak mo.

¹⁸Balet ompapatey si Raquel. Nen kuan lan naoyus so bilay to, inngaran to na Benoni may ogaw, balet inngaran nen ama to na Benjamin.

¹⁹Nen inatey si Raquel, imponpon dad gilig na dalan a mamaarap ed Efrata, a tatawagen natan na Betlehem.

²⁰Angyan diman si Jacob na baton pakanudnunotan; anggad natan sikato niy tanda na lobuk nen Raquel.

²¹Intuloy nen Jacob so impankurang to, tan nankampo ed biek a dapag na tori ed Eder.

²²Nen manaayam si Jacob ed saman a pasen, inakdulan nen Ruben si Bilha, sakey ed saray asawan inamung nen ama to. Nadngelan nen Jacob, et mapalaloy pasnuk to. Labinduan amin iray lalakin anak nen Jacob.

²³Sikara yay anak tod kinen Lea: Ruben (say pangulowan ya anak nen Jacob), Simeon, Levi, Juda, Isacar, tan Zabulon;

²⁴diad kinen Raquel: Jose tan Benjamin;

²⁵diad kinen Bilha ya aripen nen Raquel: Dan tan Neftali;

²⁶diad kinen Zilpa ya aripen nen Lea: Gad tan Aser. Nianak ira yan amin ed Mesopotamia.

²⁷Binmisitay Jacob ed kinen ama ton Isaac diad Namre, ya asingger ed Hebron, tan nanayaman nen Abraham tan Isaac.

²⁸Nambilay si Isaac na sanlasus tan walomploy taon,

²⁹kanyan mataktakken la nen inatey. Imponpon na saray anak to a di Esau tan Jacob.