Read Pangasinan 1 SARAY AWARAN 10 Bible Online

1 SARAY AWARAN 10 - Pangasinan bible

1 SARAY AWARAN 10

¹"Saray Filisteo binakal da ray Israelita diad Palandey na Gilboa. Amayamay iray apatey ya Israelita balet akabatik iray arum.

²"Nabot na saray Filisteo si Saul tan saray lalakin anak to, tan pinatey da ray talora ed saray anak to a di Jonatan, Abinadab, tan Melkisua.

³"Pinasiay laban ed kawalaan nen Saul, et pinana na saray kalaban da tan mapalaloy inkasugatan to.

⁴"Inkuantod balolakin umaawit na armas to, Oyus moy ispadam tan patey mo ak, ompan panggalaw-galawan da ak ira yan totoon anggapoy Dios. Balet ag ginawa na samay balolaki, ta mapalaloy takot to. Kanyan inala nen Saul so dilin ispada to, insan to intakbay laman to ed samay ispada.

⁵"Nen anengneng na samay balolaki ya inatey lay Saul, intakba to met so laman to ed dilin ispada to, et inatey.

⁶"Onyay impatey nen Saul, tan saray taloran anak to; kanyan tinmonda met lay panoley nen Saul tan say pamilya to.

⁷"Nen saray Israelitan manaayam ed Patar na Jezreel et nadngelan dan kibatiktik iray sondalo na Israel tan apatey si Saul tan saray anak ton lalaki, tinaynanan da ray baley da. Insan sinmabi ray Filisteo tan nanayam irad saraman a baley.

⁸"Diad kaimbwas na kayariy bakal, saray Filisteo et linma ran mangalay antokaman a naala rad saray bangkay. Nalmo ray bangkay nen Saul tan saray taloran lalakin anak to a kibalatar irad Palandey na Gilboa.

⁹"Pinotut day olo nen Saul tan inala ray armas to, insan ira angibaki ed Filistia na pigaran totoo a mangibagay maung a balita ed saray talintaoy diriyos da tan diad saray totoo ra; impaawit dad sikara imay olo tan saramay armas nen Saul.

¹⁰Saramay armas to inyan dad dalem na sakey a timplo na saray diriyos da, tan samay olo to insabit dad dalem na timplo na dios dan Dagon.

¹¹Nen nadngelan na saray totood Jabes diad Galaad so ginawa na saray Filisteo ed kinen Saul,

¹²linma ray sankasebegan a lalaki, inala ray bangkay nen Saul tan saray bangkay na saray anak to insan inyakar da rad Jabes. Impompon da rad silong na kiew a robli insan ira nanayuno na pitoy agew.

¹³Inatey si Saul lapud aliwan matoor ed Katawan. Ag to inonur iray ganggan na Katawan; sinali toy kinmerew na pangiwanwan ed saray ispiritu na inaatey

¹⁴aliwan diad Katawan. Kanyan pinatey na Katawan tan inter tod kinen David a lakin anak nen Jesse so panoley ed nanarian.