Read Pangasinan 1 SARAY AWARAN 13 Bible Online

1 SARAY AWARAN 13 - Pangasinan bible

1 SARAY AWARAN 13

¹"Si David angipanonan to ray amin a pangulo na tunggal libon tan tunggal lasus a sondalo.

²"Insan inkuantod saray totood Israel a nantitipon diman, No abuloyan yo tan no sikatoy linaway Katawan a Dios tayo, pampabakian tayo ray arum nin kabansaan tayo, saray papari tan saray Levita diad saray baley da, tan paibaga tayod sikaran mitipon ira diad sikatayo.

³"Insan tayo onlan mangalad Kaban na Sipanan na Dios ya apaolyan legan a manaari si Saul.

⁴"Akaliket iray totoo lapud sayan imbaga nen David kanyan inmabubon ira.

⁵"Si David impantitipon to sirin iray totood Israel a nanlalapu rad amin a pasen na bansa, manlapud ketegan ed Egipto diad abalaten ya anggad Dalan na Hamat diad baybay. Nantitipon iran mangalad Kaban na Sipanan ed Kiryat-jearim.

⁶"Si David tan saray totood Israel linma rad siudad na Baala, say Kiryat-jearim a sakop na dalin na Juda, ta alaen day Kaban na Sipanan na Dios a natatawag onung ed ngaray Katawan ya akayurong ed trono diad tagey na saray kirubin.

⁷"Impaway dad abung nen Abinadab so Kaban na Sipanan, insan da inlugan ed sakey a balon kariton. Di Uza tan Ahio so angiwanwan ed samay kariton.

⁸"Si David balet tan saray amin a totood Israel nansasayaw ira ed anggaay nayarian da a pangigalang ed Dios. Nankakanta ra tan nantotogtog ira na saray arpa, tambul, piangpiang, tan trumpita.

⁹"Kasabi rad pasen a panagilikan diad Kidon nipatakba ra may baka, kanyan inyonat nen Uza so lima to, tan binembenan toy Kaban na Sipanan.

¹⁰Akapasnuk a tampol so Katawan ed kinen Uza tan pinatey to lapud impaniwit tod Kaban na Sipanan. Inatey diman si Uza diad arapan na Dios,

¹¹kanyan manlapud saya atawag iman a pasen na Perez-uza. Akapasnuk si David, ta diad sanuk na Katawan dinusa toy Uza.

¹²Insan tinmakot si David ed Dios tan kuanto, Panon ko natan ya isempet so Kaban na Sipanan?

¹³Kanyan ag la insempet nen David ed Jerusalem imay Kaban na Sipanan; ingen, intilak to la ed abung na sakey a toon manngaray Obed-edom a taga siudad na Gat.

¹⁴Say Kaban na Sipanan nanayam diman a taloy bulan, et binindisionan na Katawan so pamilya nen Obed-edom tan sa amin a kayaryan to.