Read Pangasinan 1 SARAY AWARAN 15 Bible Online

1 SARAY AWARAN 15 - Pangasinan bible

1 SARAY AWARAN 15

¹"Si David angipaalagey ed Siudad nen David na saray abung a para sikaton dili. Angiparaan met na pasen a para Kaban na Sipanan na Dios tan impaalageyan to na tulda.

²"Insan inkuanto, Saray Levita labat so nepeg a manawit na Kaban na Sipanan, ta sikara labat so pinili ton manawit ed saya tan manlingkur ed sikato diad ando lan ando.

³"Kanyan impantitipon nen David ed Jerusalem iray amin a totoo, ta iyakar da may Kaban na Sipanan ed pasen ya imparaan ton panginan.

⁴"Insan impatawag to ray kabyangay boleg nen Aaron tan saray Levita.

⁵"Manlapud boleg nen Coat, sinmabiy Uriel tan saray sanlasus tan duamplon kakanayon to ya ipapangulo to.

⁶"Manlapud boleg nen Merari, sinmabiy Asaya tan saray duanlasus tan duamplon kakanayon to ya ipapangulo to.

⁷"Manlapud boleg nen Gerson, sinmabiy Joel tan saray sanlasus tan talomplon kakanayon to ya ipapangulo to.

⁸"Manlapud boleg nen Elizafan, sinmabiy Semaya tan saray duanlasus a kakanayon to ya ipapangulo to.

⁹"Manlapud boleg nen Hebron, sinmabiy Eliel tan saray walomplon kakanayon to ya ipapangulo to.

¹⁰Manlapud boleg nen Uziel, sinmabiy Aminadab tan saray sanlasus tan labinduan kakanayon to ya ipapangulo to.

¹¹Impaawit nen David ira di Sadoc tan Abiatar a paparin tan saray Levitan di Uriel, Asaya, Joel, Semaya, Eliel, tan Aminadab.

¹²Inkuantod sikara, Sikayo ray pangulo na saray boleg na Levita. Linisan yo onung ed ganggan so sikayon dili tan saray kapara yon Levita, pian nayarian yon awiten so Kaban na Sipanan na Katawan a Dios na Israel ed pasen ya imparaan kon panginan.

¹³Anggapo kayod man a mangawit nen inmona, kanyan say Katawan a Dios tayo dinusa to itayo lapud ag tayo inggalang onung na nepeg a pangigalang ed sikato.

¹⁴Nilinisan sirin na saray papari tan saray Levita so sikaran dili, ta iyalis day Kaban na Sipanan na Katawan a Dios na Israel.

¹⁵Sinakbat na saray Levita ed saray tiken imay Kaban na Sipanan, onung na ingganggan na Katawan diad panamegley nen Moises.

¹⁶Ingganggan nen David iray pangulo na saray Levita a manoro ra na saray nandoroman Levita a mankanta tan mantogtog na maliket iran togtog ed saray arpa tan piangpiang.

¹⁷Diad saray boleg a marunong a mankanta pinili ran mantogtog na saray gansang piangpiang si Heman a lakin anak nen Joel, say kanayon to a si Asaf a lakin anak nen Berekias, tan si Etan a lakin anak nen Cusaias a kabyangay boleg nen Merari. Saray manogtog na saray atagey a tuno na arpa, pinili da ray onggendan: Zacarias, Aziel, Semiramet, Jehiel, Uni, Eliab, Maasias tan Benaya. Saray manogtog na saray abeban tunon arpa, pinili da ray onggendan: Matatias, Elifelehu, Michias, Azazias, tan saray guardiay Timplo a di Obed-edom tan Jeiel.

²²Si Kenanias so apilin makaoley ed saray Levitan kumakanta tan tumutogtog lapud marunong ed musika.

²³Di Berekias tan Elkana et apili ran guardia na Kaban na Sipanan.

²⁴Saray paparin di Sebanias, Josafat, Natanael, Amasias, Zacarias, Benaya, tan Eliezer et apili ran mamaknul na trumpita ed arap na Kaban na Sipanan. Di Obed-edom tan Jehias et apili met iran guardia na Kaban na Sipanan.

²⁵Kanyan si David, saray pangulo na Israel, tan saray pangulo na sondalo et malikeliket iran linma ed abung nen Obed-edom, ta alaen da may Kaban na Sipanan.

²⁶Angibagat ira na pitoran bakan kalakyan tan pitoran karniro, lapud tutulongan na Dios iray Levitan manasakbat na samay Kaban na Sipanan.

²⁷Si David, saray tumutogtog tan saray kumakanta, si Kenanias a pangulo ra, tan saray Levitan manasakbat na Kaban na Sipanan et akasolung iran amin na sankaabigan a linen a tunika. Akasolung met si David na linen ya ipod.

²⁸Kanyan amin da ray Israelita inolup da ya anggad Jerusalem imay Kaban na Sipanan a kataruk day eyag na liket tanul na saray trumpita, tambuyog, piangpiang, tan togtog na saray arpa.

²⁹Legan a niyaakar ed siudad so Kaban na Sipanan, tinmandag si Micol a biin anak nen Saul, et anengneng toy Ari David a mansasayaw-sayaw tan manlulukso-lukso ed liket. Lapud saya naingungotan ed kinen David.