Read Pangasinan 1 SARAY AWARAN 19 Bible Online

1 SARAY AWARAN 19 - Pangasinan bible

1 SARAY AWARAN 19

¹"Ag abayag, inatey si Ari Nahas na Ammon tan sinmalat ya ari si Hanun a lakin anak to.

²"Inkuanen David, Ipanengneng koy matoor a pikakaarok ed kinen Hanun, a singa ginawa nen ama ton Nahas ed siak. Kanyan angibakiy David na saray mangibaga na pidadamay tod kinen Hanun. Nen sinmabid Ammon ira may imbaki tan akiarap irad Ari Hanun,

³"inkuan na saray panguloy Ammonita ed kinen ari, Abaloan mo sirin a say pamagalang ed kinen amam so makasengeg na impangibaki nen David ed sarayan totoo a midamay ed sika? Andi! Imbaki to ra dian manispia tan mannengneng ed siudad, pian nadakep da!

⁴"Siningkat nen Hanun ira may imbaki nen David, nilabahasan to ray balbas da, pinotut to ya anggad tapi ray kawes da, insan to la ra pinapawil.

⁵"Ag da labay so onsempet, ta ontan lay baing da. Nen akabatan nen David so agawa, impaibaga ton manayam ni rad Jerico ya anggad ituboy balbas da, insan la ra onsempet.

⁶"Abirbir nen Ari Hanun tan saray Ammonita ya agawa ran kalaban si David, kanyan angiter ira na sakey ya apataplon toniladan pilak ya inyabang da na saray karwahi tan saray kumakarwahi taga Mesopotamia, Maaca, tan Soba na Siria.

⁷"Linman nankampod abay na Medeba iray inabangan dan talomplo tan duan libo a karwahi tan saray sondalo na ari na Maaca. Pinmaway met iray Ammonita ed saray siudad da, ta namparaan iran mibakal.

⁸"Nen akabatan nen David so nagagawa imbaki toy Joab tan saray amin a sondalo.

⁹"Kinmurang iray Ammonita tan namparaan iran mibakal diad lolooban na Rabba a manonan siudad da, balet namparaan ed kaalogan iray ararin sinmabin ontulong.

¹⁰Anengneng nen Joab a dogpaan ira na saray kalaban da ed arap tan beneg da, kanyan amili na saray sankamaungan a sondalo na Israel tan namparaan iran onarap ed saray taga Siria.

¹¹Saray arum a sondalo to et impangulo ra nen agi ton si Abisai ya angiganggan a mamparaan iran onarap ed saray Ammonita.

¹²Inkuanen Joab ed kinen Abisai, No nanengneng mon tataloen ak na saray taga Siria, dago mo ak a tulongan, et no nanengneng ta kan tataloen na saray Ammonita, dagoen ta kan tulongan.

¹³Mampabiskeg kayoy linawa! Pasiaen tayoy mibakal para saray totoo tayo tan para saray siudad na Dios tayo. Say linawa na Katawan komun so nagawa!

¹⁴Kanyan kinmurang a dinmogpa si Joab tan saray totoo to, et kibatiktik iray taga Siria.

¹⁵Nen anengneng na saray Ammonita a kibatiktik iray taga Siria, imbatikan day Abisai tan sinmoner irad siudad. Insan pinmawil lad Jerusalem si Joab.

¹⁶Abirbir na saray taga Siria a tinalo ra na saray Israelita, kanyan angawit iray sondalon taga saray lugar a sakop na Siria diad bokig na Ilog na Eufrates; impangulo ra nen Sofac, say pangulo da ray sondalo nen Hadadezer na Soba.

¹⁷Nen abalitaan ya nen David, impantitipon to ray sondalo to, binaliw day Ilog na Jordan, tan imparaan to ran miarapan ed saray taga Siria. Ginmapoy bakal,

¹⁸et pinasoner na saray Israelita iray taga Siria. Akapatey si David tan saray totoo to na piton libon kumakarwahin taga Siria, tan apataplon libo a sondalo. Apatey da met si Sofac a pangulo na saray sondalon taga Siria.

¹⁹Nen naamtaan na saray ararin walad pakaoley nen Hadadezer a tinalo ra na saray Israelita, akikaaro rad kinen David tan nagmaliw iran walad silong na pakaoley to.

²⁰Ag lan balut inmabuloy iray taga Siria a tulongan da ray Ammonita.