Read Pangasinan 1 SARAY AWARAN 22 Bible Online

1 SARAY AWARAN 22 - Pangasinan bible

1 SARAY AWARAN 22

¹"Kanyan inkuanen David, Dia so pangipaalageyan na Timplo na Katawan a Dios. Dia so kiwalaay altar a pangisaklangan na saray totood Israel na saray bagat a popoolan.

²"Ingganggan nen Ari David a mantitipon iray amin a sangkaili a manaayam ed dalin na Israel, insan to ra impankimey. Saray arum nantabas iray bato ya ikanad pamaalagey na Timplo.

³"Angiter si David na amayamay a balatyang a gawaen a pamasak tan panigpit na saray kaput da ray puirta; angiter met na gansa ya ag nasimbang lapud kinarakel.

⁴"Amaolur met ed saray totood Tiro tan Sidon na amayamay a troson sidro.

⁵"Ninunot nen David, Say Timplon ipaalagey na anak ton Solomon et nepeg a sankaabigan tan bantug ed intiron mundo. Balet malangwer ni tan aliwa nin dakel so asalsali tod panagbilay, kanyan nepeg kon iparaan iray ikana. Kanyan kasakbayan ya inatey si David imparaan to ni so amayamay ya ikanad pamaalagey na Timplo.

⁶"Impaawit toy anak ton Solomon tan ingganggan ton mangipaalagey na Timplon para Katawan a Dios na Israel.

⁷"Inkuanen David ed sikato, Anak ko, nilabay koy mamaalagey nen saman na Timplon pamagalang ed Katawan kon Dios.

⁸"Balet imbagay Katawan ya amayamay a tuloy so pinatey kon totoo tan amayamay so akibakalan ko. Lapud sayan impamatey ko na amayamay a totoo, ag to abuloyan a siak so mamaalagey na timplon para sikato.

⁹"Anggaman ontan walay insipan tod siak. Inkuanto, Nawalaan kay anak a laki a diad panoley to walay kareenan, lapud ag la sigensigenen na amin da ray kalaban tod kaliber-liber. Solomon so ingaran ed sikato, lapud legay panoley to itdan koy kareenan so Israel tan iyarawik ed kaatapan.

¹⁰Ipaalageyan to ak na timplo. Magmaliw ya anak ko tan magmaliw ak ya ama to. Pansiansiaen ko ya anggad angga so nanarian to.

¹¹Intuloy ya inkuanen David, Natan, anak ko, mansiansia komun ed sika so Katawan a Dios mo, tan sumpalen to komun so sipan to a sikay mamaalagey na timplon para sikato.

¹²Itdan ka komun na Katawan a Dios mo na maung a pakatalus tan kakabatan, pian naoleyan moy Israel onung ed Ganggan to.

¹³Onaligwas ka no apigeren mon onuren iray amin a ganggan a para Israel ya inter na Katawan ed kinen Moises. Mampabiskeg ka tan pakpel moy linawam, tan ag mo aabuloyan a napatakot kay antokaman.

¹⁴Diad impanggawak na anggaay nayarian ko, akatipon ak na ngalngalin apat a libon toniladan balituk tan ngalngalin apataplon libon toniladan pilak ya onkanan pamaalagey ed Timplo na Katawan. Likud nid saraya, masolusoluk iray ikanan gansa tan balatyang. Wala met iray akaparaan a kiew tan bato, balet aruman mo ni ra.

¹⁵Dakel iray kumikimey mo. Wala ray lalakin managtabas na bato, kantiro, tan karpintero. Amayamay met iray marunong ed antokaman a kimey a nayarian day mampanday

¹⁶na balituk, pilak, gansa, tan balatyang. Kanyan igapom la so kimey, tan mansiansia komun ed sika so Katawan.

¹⁷Ingganggan nen David iray amin a pangulo ed Israel a tulongan day Solomon ya anak to.

¹⁸Inkuanto, Walad sikayoy Katawan a Dios yo tan initdan to kayoy kareenan ed kaliber-liber yo. Impadakep tod siak iray amin a totoon nanaayam ed sayan dalin, tan wala la rad silong na pakaoley yo tan diad Katawan.

¹⁹Nepeg natan a masimoon tan matoor so panlingkur yod Katawan a Dios yo. Igapo yon ipaalagey so Timplo a pamagalang ed Katawan, pian niiyan yod dalem to imay Kaban na Sipanan na Katawan tan saray arum a masanton kagawaan ya ikakanad pangigalang ed sikato.