Read Pangasinan 1 SARAY AWARAN 25 Bible Online

1 SARAY AWARAN 25 - Pangasinan bible

1 SARAY AWARAN 25

¹"Pinili nen David tan saray pangulo da ray Levita iray onggendan a boleg na Levita a mangipangulo ed pangigalang ed Dios: Asaf, Heman, tan Jedutun. Sikaray mangibawag na saray salitay Dios legan a totogtogen iray saltirio, saray arpa tan saray piangpiang. Saya so listaan da ray totoon apilin mangipangulo na pangigalang ed Dios tan saray kimen da:

²"Saray lalakin anak nen Asaf a di: Zacur, Jose, Netanias, tan Asarela. Diad panangiwanwan nen Asaf imbawag da ray salita na Dios kapag iganggan ira na ari.

³"Saray lalakin anak nen Jedutun a di: Gedalias, Zeri, Isayas, Simei, Hasabias, tan Matatias. Diad panangiwanwan nen ama ra, imbawag day salitay Dios legan a totogtogen iray arpa; nankakanta ray dayew tan pisasalamat ed Katawan.

⁴"Saray lalakin anak nen Heman a di: Bukias, Matanias, Uziel, Sebuel, Jerimot, Hananias, Hanani, Eliata, Gidalti, Romamti-ezer, Josbekasa, Malloti, Hotir, tan Mahaziot.

⁵"Initdan na Dios di Heman a propita na ari na sarayan labinapat ya anak a lalaki tan taloran bibii onung na insipan to, pian naitdan toy pakayari si Heman.

⁶"Diad panangiwanwan nen ama ra nantotogtog ira na saray piangpiang tan saray arpa legan a gagawaen ed dalem na Timplo so panangigalang ed Dios. Di Asaf, Jedutun, tan Heman et wala rad silong na panangiganggan na ari.

⁷"Amin da ra yan duamplo tan apat a lalaki et marunong ira; tan saray kapara ran Levita et abangatan irad musika. Duan lasus tan walomplo tan walo ran amin.

⁸"Malangwer may matakken ira, marunong may kagapogapo ra lambengat ed sayan kimey, nampapalaranan iran amin, pian naamtaan da no antoy betang dan kimeyan.

⁹"Sarayan duan lasus tan walomplo tan walo et naapag ira a duamplo tan apat ya olup onung na nanlapwan dan pamilya; balang olup labinduay kabyangay to tan walay pangulo to. Onyay impantotombukan dan nanlilingkur: 1) Jose a kabyangay pamilya nen Asaf; 2) Gedalias; 3) Zacur; 4) Izri; 5) Netanias; 6) Bukias; 7) Jesarela; 8) Jesaias; 9) Matanias; 10) Simei; 11) Azariel; 12) Hasabias; 13) Subael; 14) Matitias; 15) Jeremot; 16) Hananias; 17) Josbekasa; 18) Hanani; 19) Malloti; 20) Eliata; 21) Hotir; 22) Gidalti; 23) Mahaziot; 24) Romamti-ezer.