Read Pangasinan 1 SARAY AWARAN 29 Bible Online

1 SARAY AWARAN 29 - Pangasinan bible

1 SARAY AWARAN 29

¹"Inkuanen David ed amin da ray totoon nantitipon, Si Solomon ya anak ko so pinili na Dios, balet malangwer ni tan daiset niy asalsali tod panagbilay. Baleg a tuloy so kimey a gawaen, ta aliwa yan palasio na saray totoo, no ag ingen sakey a Timplon para Katawan a Dios.

²"Ginawak so anggaay nayarian kon angiparaan na saray nakaukolan ed pamaalagey ed Timplo na Dios ko: balituk pilak, gansa, balatyang, tabla, saray nandoroman mabmablin bato tan alahas, saray baton nandoromay kolor, tan saray marmol.

³"Aliwan saraya labat so imparaan ko; angiter ak ni na saray dilin pilak tan balituk ko lapud panamablik ed Timplo na Dios ko.

⁴"Angiter ak na sanlasus tan labinliman tonilada a sankapuroan a balituk tan duan lasus tan anemaplo tan liman tonilada a puron pilak a pamarakep ed saray padir na Timplo,

⁵"tan para amin a bengatlan gawaen na saray platiro. Siopa natan ed sikayo so mabolus so linawa ton mangiter na panangaro tod Katawan?

⁶"Insan saray pangulo da ray boleg, saray opisyal da ray tribu, saray kapitan da ray sondalo, tan saray makaoley ed saray kayaryan na ari et mabolus so linawa ran angiter

⁷"na panangaro rad Katawan ya onkanan pamaalagey ed Timplo. Angiter ira na sanlasus tan siamaplon tonilada a balituk, talon lasus tan walomplon tonilada a pilak, anem a lasus tan pitomplo tan liman tonilada a gansa, tan talon libo, pitomplon lasus tan limamplon tonilada a balatyang.

⁸"Saray walaan na mabmablin bato inyaakar da ra ed panagsinupan na kayamanan na Timplo ya aasikasoen nen Jehiel a Levita a kabyangan na boleg nen Gerson.

⁹"Mabolbolus ya angiiter ed Katawan iray totoo, tan maliket ira lapud dakerakel so niiter da. Malikeliket met si Ari David.

¹⁰Diman ed arap na saray atiptipon a totoo indayew nen David so Katawan. Inkuanto, Katawan a Dios na laki min Jacob, nadayew ka komun ed ando lan ando!

¹¹Kayaryan mo, Katawan, so talonggaring, pakapanyari, pananalo, kagalangan, tan tanduro. Kayaryan moy amin a bengatlad tawen tan diad dalin. Sika so ari tan sankatageyan a manoley ed ganagana.

¹²Amin a kayamanan tan kagalangan manlalapud sika; diad panamegley na biskeg tan pakayarim ooleyan moy amin a bengatla. Nayarian mon pagmaliwen a matalonggaring tan mabiskeg so siopaman.

¹³Pisalamatan mi ka natan, O Dios mi, tan idayew mi so mapagalang a ngaran mo.

¹⁴Diad tuay tua balet, saray totook tan siak et ag kami makapangiter ed sika na antokaman, lapud manlalapud sika iray amin a bengatla. Impawil mid sika labat iray bengatlan kayaryan mo.

¹⁵Amtam, O Katawan, a diad pambibilay mi sikamiy akar-akar a sangkaili tan totoon nibantak ed arum a bansa, a singa impanbilay na saray lalaki mi. Singa labat ondadalan ya anino iray agew mid tapew na dalin, tan ag mi napaliisan so patey.

¹⁶O Katawan a Dios mi, impantitipon min iter ira yan amin a kayamanan a pamaalagey na sakey a Timplo a pamagalang na masanton ngaran mo; balet nanlapu ra yan amin ed sika tan kayaryan mo ran amin.

¹⁷Amtak a susuboken moy puso na balang too tan maliket kad kaptekan. Diad katooran tan diad kaptekan mabolbolos kon inter ira yan amin ed sika. Anengneng ko a sarayan totoom a nantitipon dia natan et maliket tan mabolus so linawa ran angiter ed sika.

¹⁸O Katawan a Dios na saray lalaki min Abraham, Isaac, tan Jacob, pansiansiam pa a mamposapos ya ando lan ando ed kapusoan na sarayan totoom, ira yan getma tan kanunotan da. Pansiansiam pa met a matoor ira lawas ed sika.

¹⁹Itdan mo pay anak kon Solomon na impapuson pilalek a mangonur na amin a ganggan tan bilin mo, pian nipaalagey to so Timplo a saray onkana et imparaan ko la.

²⁰Insan ingganggan nen David ya amin iray totoo, Igalang yoy Katawan a Dios yo! Kanyan inggalang na amin da ra may totoon nantitipon so Katawan a Dios na saray lalaki ra. Tinmewek ira diad impangigalang dad Katawan tan diad impangidayew dad ari.

²¹Diad ontombuk ya agew amatey ira na saray ayayep ya imbagat da tan insaklang dad Katawan, insan da inter a kanen na saray totoo. Angisaklang met ira na saray bagat a popoolan: sanlibon bakan kalakyan, sanlibon karniron kalakyan, tan sanlibon kordiro. Angisaklang met ni ra na saray bagat ya alak.

²²Kanyan diad saman ya agew malikeliket ira legan dan nanaakan tan naniinom diad arap na Katawan. Imbawag dan manari si Solomon; kumadwa la yan impangibawag da. Diad ngaran na Katawan nilanaan da a manoley ed sikara tan nilanaan da met a mampari si Sadoc.

²³Kanyan si Solomon sinalatan ton manari si ama ton David, tan inmirung ed tronon inletneg na Katawan. Maaligwas so impanari to, tan inmonur ed sikato ray amin ya Israelita.

²⁴Saray amin ya opisyal tan saray amin a sondalo, tan saray amin a lalakin anak nen David et nansipan iran matoor ed kinen ari Solomon.

²⁵Say Katawan initdan toy Solomon na baleg a tanduro ed arap na amin da ray Israelita. Impagmaliw to a matalonggaring ya ari nen say siopaman ya akaona nen say sikato a nanoley ed Israel.

²⁶Si David a lakin anak nen Jesse et nanoley

²⁷na apataploy taon. Nanoley ed Hebron na pitoy taon tan diad Jerusalem talomplo tan taloy taon.

²⁸Masiken la nen inatey. Andokey so bilay to, mayaman tan napnoy kagalangan. Sinmalat ed sikaton nanari si Solomon a lakin anak to.

²⁹Say awaran na impanbilay nen Ari David, manlapud gapo ya anggad samput, et nikorit ed saray awaran di propita Samuel, Natan, tan Gad.

³⁰Nikorit so impanoley to, say ontan lan pakayari to, tan saray amin ya agawad sikato, saray agawad Israel, tan saray agawad kaliber-liber iran nanarian.