Read Pangasinan 1 SARAY AWARAN 5 Bible Online

1 SARAY AWARAN 5 - Pangasinan bible

1 SARAY AWARAN 5

¹"Sikara yay kabyangay tribu nen Ruben a pangulowan ed saray anak nen Israel. (Lapud inakdulan toy sakey ed saray bibiin inaamung nen ama to, naandid sikatoy kanepegan na pangulowan ya anak a laki; niiter yan kanepegan ed kinen Jose.

²"Balet nagmaliw a sankabiskegan so tribu nen Juda tan sikatoy nanlapwan na sakey a manoley ed amin a tribu.)

³"Apatiray lalakin anak nen Ruben a pangulowan ya anak nen Israel: di Enoc, Fallu, Hezron, tan Carmi.

⁴"Sikara yay kabyangay boleg nen Joel manlapud ama ya anggad anak: Joel, Semaya, Gog, Simei, Mica, Reaya, Baal, tan Beera. Dinakep nen Tiglatpileser ya impirador na Asiria si Beera a sakey a pangulo na boleg, insan to inawit ya impanayam ed arum a bansa.

⁷"Onung ed listaan na sarayan pamilya sikara yay pangulo na boleg nen Ruben: Jeiel, Zacarias,

⁸"Bela, a lakin anak nen Azaz tan apo nen Sema a kabyangay boleg nen Joel. Sayan boleg nanayam ed Aroer ya anggad Nebo tan Baalmeon.

⁹"Dakerakel iray ayayep dad dalin na Galaad, kanyan nanayam irad bokig na kalawakan ya anggad Ilog na Eufrates.

¹⁰Diad panaon nen Ari Saul, dinogpaan na tribu nen Ruben iray Agareno; pinapatey da rad bakal iray agareno, tan nanayaman day dalin da diad bokig na Galaad.

¹¹Saray kabyangay tribu nen Gad nanayam ed baybay nen Ruben diad dalin na Basan ya anggad Saleca.

¹²Si Joel so pangulo na manonan boleg, tan si Safan so pangulo na onkumadwad manonan boleg. Di Janai tan Safat so pangulo ed saray arum a boleg ed Basan.

¹³Saray arum a kabyangan na sayan tribu et nanlapud saray onggendan a pitoran boleg: Macael, Mesullam, Saba, Jorai, Jacan, Zia, tan Eber.

¹⁴Sikaray kabyangay boleg nen Abihail a lakin anak nen Huri; si Huri anak nen Jaroa ya anak nen Galaad; si Galaad anak nen Micael ya anak nen Jesisai; si Jesisai anak nen Jado ya anak nen Buz.

¹⁵Si Ahi a lakin anak nen Abdiel tan apo nen Guni so pangulo na sarayan boleg.

¹⁶Nanayam ira ed dalin na Basan tan Galaad, diad saray baley diman tan diad amin a pastolan na baley na Saron.

¹⁷(Naoksuy ira yan listaan nen panaon na impanoley nen Ari Jotam na Juda tan Ari Jeroboam na Israel.)

¹⁸Apataplo tan apat a libo tan piton lasus tan anemaplo so sondalo na tribu nen Ruben, Gad, tan kapalduay tribu nen Manases. Marunong iran mangikana na samper, ispada, tan pana.

¹⁹Linma ran akibakal ed saray Agareno a kabyangan na saray tribu di Jetur, Nafis, tan Nodab.

²⁰Nanmatalek irad Dios tan kinmerew ira na tulong to. Say Dios inebatan to ray pikakasi ra tan impanalo to rad saray Agareno tan saray kagampi ra.

²¹Asamsam dad saray kalaban da iray limamplon libo a kamilyo, duan lasus limamplon libo a karniro, tan duan libon asno. Inawit da ray adakep dad bakal a sanlasus libon totoo.

²²Amayamay iray pinapatey dan kalaban da, lapud linawa na Dios imay bakal. Nanayam irad saman a dalin ya anggad inkibantak dad arum a bansa.

²³Saray kabyangan na kapalduay tribu nen Manases nanayam irad dalin na Basan ya Baal-hermon; Senir, tan Palandey na Hermon; dinmakerakel irad man.

²⁴Pangulo na saray boleg da iray onggendan: Efer, Isi, Eliel, Azriel, Jeremias, Hodavias, tan Jadiel. Marunong iran mibakal tan bantug iran pangulo na saray boleg da.

²⁵Balet saray totoo aliwa ran matoor ed Dios na saray lalaki ra; inkaindan da, ta inggalang da ray diriyos na saray totoon pinapataynan na Dios.

²⁶Kanyan pinaloob na Dios si Impirador Pul na Asiria (tatawagen met na Tiglat-pileser) ed bansa ra. Pinataynan to ray tribu nen Ruben, Gad, tan say kapaldua na Manases, insan to ra imbaki ed Halah, Habor, Hara, tan diad abay na Ilog na Gozan, ta diman lay panayaman da.