Read Pangasinan ESDRAS 5 Bible Online

ESDRAS 5 - Pangasinan bible

ESDRAS 5

¹"Diad sayan panaon inggapo di propita Aggeo tan Zacarias a lakin anak nen Iddo so nampulong ed ngaran na Dios na Israel ed saray Judion manaayam ed Juda tan Jerusalem.

²"Nen nadngel di Zorobabel a lakin anak nen Salatiel tan Josue a lakin anak nen Josadac so pulong da, intubat day kimey ed Timplo ed Jerusalem. Tinmulong ed sikara ira may duaran propita.

³"Linman tampol ed Jerusalem ira di Gobirnador Tatnai na Sagur na Eufrates, Setar-bozenai, tan saray kapara ran opisyal tan tinepet da, Siopay angiganggan ed sikayon ipaalagey yan Timplo tan iyan iray kagawaan to?

⁴"Tinepet da met so kangaranan da ray totoon ontutulong ed pangipapaalagey na Timplo.

⁵"Balet ag pinaolyan na Dios iray pangulo na saray Judio, kanyan ag ira painatonda na saray opisyal na Persia, anggad ag da pakasulat ed Impirador Dario tan pakaawat na ebat to.

⁶"Saya so sulat ya impawit dad impirador:

⁷"Diad Impirador Dario, mareen komun so panoley mo.

⁸"Ipakabat mid sika, Kagalang min Impirador, a linma kamid luyag na Juda. Et arumog mi a nipapaalagey lamet so Timplo na matalonggaring a Dios. Ankakabaleg a tinabas a bato tan saray kiew so nikakana. Inapiapiger tan anggapoy tonda so kimey.

⁹"Tinepet mid satan ed saray pangulo da ray totoo no siopay angiganggan ed sikaran ipaalagey da lamet so Timplo tan iyan iray kagawaan to.

¹⁰Tinepet mi met so kangaranan da pian nipakabat mid sika no siopa ray pangulo ed sayan kimey.

¹¹Inebatan da kami, Sikami ray aripen na Dios na tawen tan dalin, tan ipapaalagey mi lamet so Timplon inmonan impaalagey na sakey a makapanyarin ari na Israel a sikato met so angyan na saray kagawaan to nen abayag lan panaon.

¹²Balet lapud impanpasnuk na saray lalaki mi so Dios na Tawen, impadakep to kami ed Ari Nabucodonosor na Babilonia.

¹³Insan diad ononan taon na impanoley nen Impirador Ciro ed Babilonia, ingganggan ton ipaalagey mi lamet so Timplo.

¹⁴Impawil to ray balituk tan pilak a kagawaan na Timplo ya inaala ra nen Nabucodonosor ed Timplo ed Jerusalem insan to ra inyan ed timplo ed Babilonia. Impalima nen Impirador Ciro ira yan amin a kagawaan ed sakey a lakin manngaran na Sesbasar ya impasen ton gobirnador na Juda.

¹⁵Imbagad sikato na impirador ya alaen to ra, insan to ra ipawil ed Timplo ed Jerusalem, tan ipaalagey to so Timplo ed inalageyan ton gendat.

¹⁶Kanyan sinmabiy Sesbasar, insan to inletneg so pundasion; siansia so kimey ya anggad natan, balet ag ni asumpal.

¹⁷Natan sirin, Kagalang min Impirador, no isisipen mon pankaabigan, pasokayan mo pad saray awaran na ari diad Babilonia, ta nengneng mo no kasi ingganggan nen Impirador Ciro odino andi ya ipaalagey lamet so Timplo ed Jerusalem. Kasumpal to, ipakabat mo pad sikami no antoy labay mon nagawa nipaakar ed sayan pamaakaran.