Read Pangasinan NEHEMIAS 1 Bible Online

NEHEMIAS 1 - Pangasinan bible

NEHEMIAS 1

¹"Sikato yay istoria na agawaan nen Nehemias a lakin anak nen Hacalias. Diad bulan na Kislev nen Kumaduamploy taon na panooley nen Impirador Artajerjes, siak, si Nehemias, et wala ak ed manonan siudad na Susan.

²"Si Hanani a sakey ed saray agagik a lalaki et sinmabi a kaiba to ray pigaran lalaki a nanlapud Juda. Tinepetan ko ra na nipaakar ed saray Judion pinmawil manlapud nibantakan dan Babilonia tan say nipaakar ed Jerusalem.

³"Imbaga rad siak a baleg so paniirap da ray akaligtar tan akapawil lad baley da; memelag-melagen met ira na saray totoon sangkaili a manaayam ed kaliber-liber da. Imbaga ra met ed siak ya ageba ni ray padir na Jerusalem tan ag ni apasimbalon nipaalagey iray puirtan apoolan.

⁴"Nen nadngel ko ya, inmirung ak, insan ak nanakis. Pigay agew ak a nanermen tan ag angan. Nampikasi ak ed Dios.

⁵"Katawan a Dios na Tawen! Matalonggaring ka tan nepeg kan takotan. Matoor kan mangaro tan susumpalen moy impisipanan mo ed saray mangaarod sika tan mangoonur na saray ganggan mo.

⁶"Imano mo ak pa, Katawan, tan talineng mo ak pa ed agew-labin pangipipikasik ed saray aripen mo a totood Israel. Ipatuak a nankasalanan kami, sikamin totood Israel. Nankasalanan ak tan saray lalakik.

⁷"Maoges iray ginagawa mi sumpad sika tan ag mi inoonur iray ingganggan mo. Ag mi inoonur iray bilin tan totontonen ya inter mod sikami diad panamegley nen Moises ya aripen mo.

⁸"Nunot mo pa may inkuanmod kinen Moises: No aliwa kayon matoor ed siak, sikayon totood Israel, itaytayak ta kayod arum a bansa.

⁹"Balet no ompawil kayod siak tan onuren yo ray ingganggan kod sikayo, papawilen ta kayod sayan pasen a pinilik a pangigalangan ed siak, anggaman ya ataytayak kayod inerman a sokung na mundo.

¹⁰Katawan, sikara yay aripen mo, saray dilin totoom. Inyagel mo ra diad panamegley na baleg a pakayarim tan biskeg mo.

¹¹Dengel mo natan so pikakasik tan saray pikakasi da ray arum ya ariripen mo a labay da kan pagalangan. Paaligwas mo ak pa natan, tan iyabuloy mon kasian ak na impirador. Diad saraman ya agew siak so makaoley ed alak na impirador.