Read Pangasinan NEHEMIAS 2 Bible Online

NEHEMIAS 2 - Pangasinan bible

NEHEMIAS 2

¹"Aminsan ya agew nen bulan na Nisan diad kumaduamploy taon na panooley nen Impirador Artajerjes, inyakaran koy alak nen akarongo. Ag to ak nin balut anengneng a maermen nen saman,

²"kanyan tinepet to, Akin et maermen ka? Aliwa ka met a mangiinagem, kanyan talagan maermen ka. Apagaan ak ed saya

³"tan inmebat ak, Andokey ni komun so pambilay yo, Kagalang kon Impirador! Panon a niamut so ermen ko no say siudad ya angipomponan ed saray lalakik et aderalderal tan saray puirta to et dineral na apoy?

⁴"Tinepet na impirador, Anto siriy labay mon kerewen? Nampikasi ak ed Dios na Tawen,

⁵"insan ko inkuan ed impirador, No makaliliket ed siak so Kagalang kon Impirador tan mabolus a mangiter na kerewen ko, abuloyan mo ak pan onla ed dalin na Juda, diad siudad ya angipomponan ed saray lalakik, pian nipaalagey ko lamet so siudad.

⁶"Manyodyorung ed diking na impirador so riyna. Tinepet na impirador ed siak na panon kabayag so kaandik tan no panoy ipawil ko. Inebetan ko ra yan tepet to et inmabubon ed kerew ko.

⁷"Insan ko kinerew ed ari ya itdan to ak na sulat ya iter kod saray gobirnador ed Luyag na Sagur na Eufrates, pian abuloyan da ak a mambiahi ed Juda.

⁸"Akikerew ak met na sulat a para si Asaf, say manaasikasod saray takel na ari. Imbaga na sulat ya itdan ak nen Asaf na saray troso ya ikanad saray puirta na tirinsiran mangguardiad Timplo, para saray padir na siudad, tan para abung a panayaman ko. Inter ed siak na impirador iray amin a kerew ko, lapud kaibak so Dios.

⁹"Nen linma ak la say impirador impaolup to ak ed pigaran opisyal tan sakey ya olup na saray sondalon kumakabayo. Nen akasabi ak ed Sagur na Eufrates, inter kod saray gobirnador imay sulat na impirador.

¹⁰Balet agunigon a maung ira si Sanbalat a taga baley na Bet-horon, tan si Tobias ya opisyal na saray Ammonita, nen nadngelan da a walay toon sinmabi a manggaway pankaabigan da ray totood Israel.

¹¹Linma ak ed Jerusalem, tan legan na impanayam kod man na taloy agew,

¹²ag ko imbagad siopaman so pagagawad siak na Dios para Jerusalem. Insan diad pegley-labi binmangon ak, intagar koy pigara ed saramay kakaibak, insan kami pinmaway. Samay asnon kinabayoan ko, so ayep labat ya inawit mi.

¹³Labi ni nen pinmaway ak ed siudad tan dinmalan ak ed Puirta na Patar diad sagur. Insan linma ak ed abalaten tan dinalan koy Bubon na Dragon nen tinmuloy ak ed Puirta na Dotak. Legan kon manaakar ninengneng ko ray atebagtebag a padir tan saray puirtan dinederal na apoy.

¹⁴Insan ak nampabaybay tan linma ak ed Puirta na Sobul tan diad Dipositoy danum na Ari. Anggapo lay nadalan na samay asnon kinabayoan ko,

¹⁵kanyan linma ak ed Patar na Adron tan nankabayo ak a nannenengneng ed padir. Insan ak pinmawil ed saramay dinadalan ko. Dinmalan ak ed samay Puirtay Patar nen pinmawil ak ed siudad.

¹⁶Anggapod saramay opisyal diman so akaamtad nilnilak tan no anto ray ginagawak. Anggapo niy bengatlan imbagak ed siopaman ed saray kaparak a Judiodiad saray papari, saray pangulo, saray opisyal, odino siopaman a mankimey.

¹⁷Balet natan inkuankod sikara, Nengneng yoy gunigon a walad sikatayo, lapud aderal-deral so Jerusalem tan saray puirta to. Pasimbaloen tin ipaalagey so padir na siudad tan pansamputen tayo la yay kababaingan tayo.

¹⁸Insan ko imbagad sikara no panoy inkiwala na Dios ed siak tan no panoy impanulong tod siak, tan no anto ray imbaga na impirador ed siak. Inmebat ira, Igapo ti la sirin so pangipaalagey tayo lamet! Kanyan namparaan iran mangigapo na kimey.

¹⁹Balet nen nadngelan di Sanbalat, Tobias, tan Gesem ya Arabe so plano min gawaen, inelekelekan tan niluludlurey da kami. Inkuanda, Anto tay gagawaen yo? Labanan yo la sirin so impirador?

²⁰Inmebat ak, Pampalaboen kami na Dios na Tawen. Sikami ray aripen to, kanyan igapo miy pangipaalagey. Balet sikayo, anggapoy kanepegan yon mangayaryan na bengatla ed Jerusalem. Anggapoy pibibiang yod saray agawgawad sayan siudad.