Read Pangasinan NEHEMIAS 5 Bible Online

NEHEMIAS 5 - Pangasinan bible

NEHEMIAS 5

¹"Diad ontombuk a panaon dakerakel a totoo, lalaki may bibii, so nanriklamo sumpad saray kapara ran Judio.

²"Inkuay pigara, Dakel iray anak mi. Nakaukolan miy trigo pian mansiansia kamin mambilay.

³"Inkuanda ray arum, Apasootan kamin angiprinda na saray kaalogan mi, saray kaubasan mi, tan saray kaabungan mi pian makasaliw kamiy trigo et ag kamin naerasan.

⁴"Wala ni ray angikuan, Apasootan kamin inmutang pian niiter mid ari so buis na saray kaalogan tan saray kaubasan mi.

⁵"Nampaparay dala mi, sikami tan saray kapara min Judio. Anggapoy pidomaan na saray anak mi ed saray anak da. Balet akin et nakaukolan a gawaen min aripen iray anak mi? Nilako lan aripen iray arum ya anak min bibii. Pangaskasiyan kami, lapud nala la ray kaalogan tan kaubasan mi.

⁶"Nen nadngelan ko ray riklamo ra, mapalaloy pasnuk ko.

⁷"Ginetmak so manggaway polaing a pamatondad sayan kagagawa. Tinetel ko ray pangulo tan saray opisyal na baley. Inkuankod sikara, Papairapen yo ray agagi yo! Imbagak a mantitipon iray totoon pian naasikasoy riklamo ra.

⁸"Inkuankod sikara, Gagawaen tayoy anggaay nayarian tayon manondon ed saray agagi tayon Judio a nilako rad saray arum a bansa. Natan balet, papasooten yo ray agagi yo ya ilako ray sikaran dili ed sikayo a kapara ran Judio! Ag makaskasel iray pangulo tan anggapoy nibaga ra.

⁹"Insan inkuanko, Makapoy itay gagawaen yo! Nepeg yon takotan so Dios tan gawaen so antokaman a kaptekan. Ag yo naitdan ed satan iray kalaban tayon Hentil na pankanawnawan manludlurey ed sikatayo.

¹⁰Siak, saray kakaibak, tan saray katulong ko et pinautang mi ray totoo na kuarta tan trigo. Ag ti la ra pambabayaren ed saray utang da.

¹¹Ipawil yo natan ed sikara iray kaalogan da, saray kaubasan da, saray kaolibaan da, tan saray kaabungan da. Lingwanan yo la ray utang dad sikayon kuarta, odino trigo, odino alak, odino larak na oliba!

¹²Inmebat iray pangulo, Sumpalen mi ray ibabagam. Ipawil mi lad sikaray kayaryan da tan ag mi la singilen iray utang dad sikami. Tinawag ko ray papari tan diad arap da impansambak iray pangulo a tooren day sipan da.

¹³Inekal koy abel ya akabariber ed awak ko insan ko impayagpayag. Onya met so pangipayag na Dios ed siopaman ed sikayo ya ag manoor ed sipan to, inkuankod sikara. Paandipaten na Dios iray kaabungan yo tan amin a kayaryan yo; anggapoy bengatlan ikera tod sikayo. Inkuan na balang sakey a wadman, Amen!, insan da indayew so Katawan. Tinoor na saray pangulo so sipan da.

¹⁴Legan na labinduay taon a siak so gobirnador na dalin na Juda, manlapud kumaduamplo ya anggad kumatalomplo tan duay taon na panooley nen Impirador Artajerjes, ag kon kinan tan saray kakanayon ko so taganon kanepegan a niiter ed gobirnador.

¹⁵Makapabelat ed saray totoo iray amin a gobirnador ya akaonan nanoley nen say siak, lapud kinaukolan da a niiter ed sikaran inagewagew so apataplon kuartan pilak ya isaliw da na tagano tan alak. Pinapairap na anggan saray katulong da iray totoo. Balet domay impanoley ko, lapud walay takot kod Dios.

¹⁶Inyoput koy pakayarik ed pangipaalagey lamet ed padir tan anggapoy bengatlan kinayaryan ko. Tinmulong ed impamaalagey lamet na padir iray amin a katulong ko.

¹⁷Naynay kon pinakan ed lamisan ko so sanlasus tan limamplon Judio tan saray pangulo ra, likud nid saray arum a totoon dinmagod siak a taga ra kaliber-liber a bansa.

¹⁸Inagew-agew a nansaklang ak na sakey a baka, anemiran sankaabigan a karniro, tan amayamay a manok. Kapag samploy agew sasalatan koy ipaparongok a sawasawaan ya alak. Anggaman ontan, ag ko inala so kuartan kanepegan ya awaten na gobirnador, ta ambelat la so sasakbaten na saray totoo.

¹⁹O dios, ag mo pa lilingwanan a tumangan lapud amin a bengatlan ginagawak para sarayan totoo.