Read Pangasinan NEHEMIAS 8 Bible Online

NEHEMIAS 8 - Pangasinan bible

NEHEMIAS 8

¹"Diad kumapiton bulan saray totood Israel et manaayam la rad saray dilin baley da. Nen ononan agew na saman a bulan nantitipon iran amin ed Jerusalem diad plasa a walad kaloob ed Puirta na Danum. Kinerew dad kinen Esdras, say pari tan iskriba na Ganggan ya inter na Katawan ed Israel diad panamegley nen Moises, ya alaen toy libro na Ganggan.

²"Inala nen Esdras insan to inyakar ed nantitiponan na saray totoolalaki, bibii, tan ogogaw a nayarian da lay ontalus.

³"Diad saman a plasa ed abay na puirta imbasa tod sikaray Ganggan manlapud palbangon ya anggad kaagwan, et marengerengel iray totoo.

⁴"Si Esdras nanalagey ed tapew na intabladon tabla ya impaalagey makasengeg ed saman ya agawa. Nanalagey ed nikawanan to iray onggendan a totoo: Matitias, Sema, Anaya, Urias, Helcias, tan Maasias. Diad nikawigi to saraya so nanalagey: Pedaya, Misael, Malkias, Hasum, Hasbadana, Zacarias, tan Mesullam.

⁵"Atagey so panalalageyan nen Esdras, kanyan sankanengneng sa amin a totoo. Ag da inyalis so mata rad sikato et kapangilukas tod libro inmalagey ya amin.

⁶"Inkuanen Esdras, Nadayew komun so Katawan, say matalonggaring a Dios! Amin a totoo inyatagey day lima ra tan kuanda, Amen, Amen! Insan ira dinmakmomon angigalang ya anggad dalin.

⁷"Inmalagey iray totoo, tan saray onggendan a Levita so angipaliwawad sikara na Ganggan; Jesua, Bani, Serebias, Jamin, Acub, Sabetai, Hodias, Maasias, Kelita, Azarias, Josabad, Hanan, tan Pelaya.

⁸"Impatalus dad salitan ikakana na saray totoo so Ganggan na Dios, insan da impaliwawa pian natalusan na saray totoo.

⁹"Nen nadngel na saray totoo so labay ya ibaga na Ganggan, atenyeg so puso ra kanyan nanaakis ira. Saray mangipapaliwawa na Ganggan a di Nehemias a gobirnador, Esdras a pari tan iskriba, tan saray Levita, et inkuanda sirin ed amin a totoo, Masanto yan agew ed Katawan a Dios yo, kanyan ag kayo nepeg a manermen odino onakis.

¹⁰Sempet ki la ta mampista kayo. Iyapag yod saray kulang so paraan iray kakanen tan alak yo. Masanto yan agew ed Katawan tayo, kanyan ag kayo maneermen. Pabiskegen kayo na liket ya iter ed sikayo na Katawan.

¹¹Nanliliber iray Levita, ta pinapareen da ray totoo. Imbabaga rad sikaran ag ira maneermen, ta masanto man ya agew.

¹²Kanyan sinmempet lad abung iray amin a totoo. Maliket iran nanaakan tan naniinom; iniitdan da ray kulang so paraan, lapud atalusan da ray imbasad sikara.

¹³Diad ontombuk ya agew saray pangulo da ray boleg, saray papari, tan saray Levita et linmad kinen Esdras, ta manaral iray ibabangat na Ganggan.

¹⁴Naamtaan da a say Ganggan ya inter na Katawan diad panamegley nen Moises et ingganggan to ray Israelita a manayam irad saray abung-abung legay Pista na saray Abung-abung.

¹⁵Kanyan inter da ray onggendan a bilin, insan da impaibawag ed intiron Jerusalem tan saray arum a siudad tan baley: Laka kayod kapokdulan, ta mangala kayo ray sang-sangay kiew na oliba, agoo, mirto, palma, tan saray arum a mabolung a kiew, insan tayo ra gawaen ya abung-abung onung na nisulat ed Ganggan.

¹⁶Kanyan anggaala ray totoo na saray sanga-sangay kiew, insan ira nanggagawa na saray abung-abung ed plastadon atep na saray kaabungan da, diad saray solar da, diad patio na Timplo, tan diad saray plasa ed abay na Puirta na Danum tan Puirta nen Efraim.

¹⁷Amin da ray totoon pinmawil manlapud inkadakep nanggagawa ra na saray abung-abung tan nanaayaman da. Natan labat so impakagawa to ya nanlapud saramay agew nen Josue a lakin anak nen Nun, kanyan mapalaloy liket na balang sakey ed sikara.

¹⁸Manlapud ononan agew na pista ya anggad kaonuran ya agew, nanbabasa ran inagew-agew na sakey a parti na Ganggan na Dios. Nampista ra na pitoy agew, tan diad kumawalon agew walay sirimonyan pansamput, onung na ibabagay Ganggan.