Read Pangasinan NEHEMIAS 9 Bible Online

NEHEMIAS 9 - Pangasinan bible

NEHEMIAS 9

¹"Diad kumaduamplo tan apat ya agew ed saman met lamlamang a bulan, nantitipon iray totoo ta nanayuno ra a pangipanengneng day ermen dad saray kasalanan da. Imbibiig da lay sikaran dili ed amin da ray sangkaili. Nankakawes iray sako tan iniinan day dabuk so kaolowan da a tanday ermen da. Nanalegey ira, insan da ginapwan ya impapatwa iray kasalanan da tan saray kasalanan da ray lalaki ra.

³"Diad loob na sakey a taloy oras nibasad sikara so Ganggan na Katawan a Dios da, tan diad ontombuk a taloran oras impapatwa ray kasalanan da tan inggagalang da so Katawan a Dios da.

⁴"Walay intabladon para saray Levita, tan dia ra nanalagey di Jesua, Bani, Cadmiel, Sebanias, Buni, Serebias, Bani, tan Kenani. Maksil so bosis dan nampikasi ed Katawan a Dios da.

⁵"Saray onggendan a Levita tinawag dan mangigalang iray totoo: Jesua, Cadmiel, Bani, Hasabnias, Serebias, Hodias, Sebanias, tan Petahias. Inkuanda: Alagey kayo tan idayew yoy Katawan a Dios yo; idayew yo ed ando lan ando! Idayew komun na balang sakey a too sa mapagalang a ngaran to, anggaman ya aliwan nagnap so panangigalang na too.

⁶"Insan saray totood Israel nampikasi ra na onya: Sika, Katawan, sika labat so Katawan; pinalsam iray katawenan tan saray bitewen ed tawen. Pinalsam so dalin tan say dayat tan amin a logan da; initdan moy bilay iray amin a bengatla. Ondadakmomo tan mangigagalang ed sika iray mangatatawen a pakayari.

⁷"Sika, Katawan a Dios, sika so amili ed kinen Abram tan impaway mo manlapud baley na Ur diad Babilonia; sinalatan mo so ngaran to na Abraham.

⁸"Arumog mon matoor ed sika, insan akisipanan kad sikato. Insipan mon iter ed sikatoy dalin na saray Cananeo, say dalin na saray Heteo tan saray Amorreo, say dalin na saray Perezeo, Jebuseo, tan saray Gergeseo; inter mo a panayaman na saray kabyangay boleg to. Sinumpal moy sipan mo, lapud matoor ka.

⁹"Anengneng mo no panoy impanirap da ray lalaki mi ed Egipto; dinengel moy inkerew da na tulong nen wala rad Dayat ya Ambalanga.

¹⁰Nanggagawa ka na saray makapakelaw a milagro sumpad ari na Egipto, sumpad saray opisyal to tan saray totood nanarian to lapud amtam no panoy impamapairap dad saray totoom. Binmantug kad saman tan bantug ka ni ya anggad natan.

¹¹Benelsay mo so dayat para saray totoom insan mo ra impanakar ed pinamagam a dayat. Impalner mod aralem a danum iray angosil ed sikara; singa ra baton linmereg ed madaluyon a dayat.

¹²Diad panamegley na lorem inwanwan mo ra no agew, tan no labi niliwawaan mo ra na apoy so dadalanen da.

¹³Manlapud tawen inmakseb kad Palandey na Sinai, insan kad man akisalitad saray totoo; initdan mo ra na saray maung a ganggan, saray maptek a bangabangat.

¹⁴Imbangat mo ra a ngilinan da ray masanton Agew na Panagpainawa, tan inter mod sikara iray ganggan mo diad panamegley nen Moises ya aripen mo.

¹⁵Nen naerasan ira initdan mo ray tinapay a nanlapud tawen; nen napgaan ira initdan mo ray danum a nanlapud baton dampay. Imbagam ed sikara a kayaryanen day dalin a sinambaan mon iter ed sikara.

¹⁶Balet nagmaliw a mapaatagey tan bangar iray lalaki mi tan ag da inonur iray ganggan mo.

¹⁷Ag ira tinmoluk; alingwanan da ray amin a ginagawam; alingwanan da ray milagron ginagawam. Lapud panagpasirayew da amili ray sakey a pangulo a mamapawil ed sikara ed inkaaripen da ed Egipto. Balen manamirdona ka a Dios; mapangasi tan maaro ka, tan aliwa kan maipapasnuk. Alay kabaleg na ag mangoman a panangarom; ag mo ra inkaindan.

¹⁸Nanggawa ray talintaon kilaw a baka, insan inkuandan sikatoy dios ya angipaway ed sikarad Egipto. Agaylay impamabaing dad sika, Katawan!

¹⁹Balet ag mo ra inkaindan dimad kalawakan, lapud baleg so panangasim. Ag mo pinaandi imay lorem odino samay apoy ya angiwanwan ed sikara no labi tan no agew diad impankurang da.

²⁰Lapud kaabigan mo imbagam, so nepeg dan gawaen; initdan mo ray mana a kanen da, tan danum ya inomen da.

²¹Diad apataploy taon ya impanayam dad kalawakan initdan mo ray amin a nakaukolan da; ag balut dinmaan so kawes da, tan ag linmarag ed sakit so sali ra.

²²Inyabuloy mon nadakep da iray bansa tan saray nanarian, saray dalin ya akiketeg ed dalin da. Dinakep day dalin na Hesbon a nanarian nen Sehon, tan say Basan a nanarian nen Og.

²³Initdan mo ray anak a say karakel da et singa karakel na bitewen ed tawen; inyabuloy mon nadakep da tan napanayaman da so dalin ya insipan mon iter ed saray lalaki ra.

²⁴Dinakep day dalin na Canaan; impanalom ira ed saray totoon manaayam diman. Initdan mo ray totoom na pakayarin manggawa na labay dan gawaen ed saray totoo tan saray arari ed dalin na Canaan.

²⁵Dinakep na saray totoom iray siudad ya aliber na padir, saray mabunan dalin, saray abung a napnoy kayamanan, saray bobun a walay danum, saray kaolibaan, saray kakiewan a mambunga, tan saray kaubasan. Inaakan day amin a labay da, kanyan tinmataba ra; nanliket irad amin a kaabigan ya inter mod sikara.

²⁶Balet kinalaban ka na saray totoom tan ag da ka inonur; binenegan day Ganggan mo. Pinapatey da ray propitan mamapasakbay ed sikara, saray propitan mangibabagad sikaran ompawil irad sika. Pinapabaingan da kan amimpigapiga na saray totoom,

²⁷kanyan inyabuloy mon nadakep tan naoleyan ira na saray kalaban da. Nen wala rad segsegang kinmerew irad sika na tulong, et manlapud tawen dinengel mo ra. Lapud baleg a panangasim initdan mo ra na saray pangulo ya angyaagel ed sikarad saray kalaban da.

²⁸Nen pinmawil so mareen a panagbilay da, nankasalanan ira lamet; kanyan impadakep mo ra lamet ed saray kalaban da. Balet nen nagbabawi ra tan kinerew dan iyagel mo ra, manlapud tawen dinengel mo ra; lapud baleg a panangasim amimpiga-pigan inyagel mo ra.

²⁹Pinasakbayan mo ran onuren da ray ganggan mo balet lapud panagpasirayew da ag da ra inonur, anggaman a say pangonur ed Ganggan mo et pakagamuran na bilay. Diad kinaawet na olo ra tan inkabangar da, ag da labay so ontoluk.

³⁰Piga-pigay taon ya inanosan mo ran pinapasakbayan. Impansasalitam iray propitam, balet nantelek-telekan iray totoom, kanyan inyabuloy mon nadakep na saray arum a bansa.

³¹Anggaman ontan, ag mo ra inkaindan o dineral, lapud baleg so panangasim. Maaro tan mapangasi ka a Dios!

³²O Dios mi, alay talonggaring mo! Makapataktakot tan makapanyarin tuloy! Matoor mon susumpalen so impisipanan mo. Nanlapu lad samay panaon a pinapairap kami na saray ararid Asiria, ontan lay paniirap mi ya anggad natan. Saray arari mi, saray pangulo mi, saray papari tan saray propita mi, saray lalaki mi, tan amin a totoo mi et maniirap ira. Nudnunot mo pa so ontan lan impanirap mi!

³³Maptek so ginawam diad impanusam ed sikami; matoor ka lawas, anggaman a nankasalanan kami.

³⁴Saray lalaki mi, saray arari mi, saray pangulo mi, tan saray papari mi, et ag da inonur so Ganggan mo. Ag da dinengel iray ganggan mo tan saray pasakbay mo.

³⁵Lapud abuloy mo saray arari inoleyan da ray totoom, legan a manaayam irad maawang tan mabunan dalin ya inter mod sikara; balet ag da binenegan so kasalanan tan ag da ka nanlingkuran.

³⁶Et natan aripen kami ed dalin ya inter mod sikami, diad sayan mabunan dalin a mangiiter ed sikami na tagano.

³⁷Saray bungay dalin oonla rad saray arari ya inter mo ran manoley ed sikami lapud impankasalanan mi. Gagawaen dad sikami tan saray ayayep mi so labalabay da, kanyan sigput kamin pangaskasiyan!

³⁸Lapud sayan amin ya agawa, sikamin totood Israel, et nanggawa kami na malet a paknaan ya insulat tan pinirmaan na saray pangulo mi, saray Levita mi, tan saray papari mi.