Read Pangasinan TOBIT 10 Bible Online

TOBIT 10 - Pangasinan bible

TOBIT 10

¹"Legan to ya, inagew-agew a bibilangen nen Tobit iray agew a nakaukolan ed iyakar ed Rages tan say ipawil. Nen asabi lay agew, et ag ni sinmabiy anak to, inkuanen Tobit ed asawa to,

²"Anto kasiy akaabala ed sikato? Antoy kuanmo? Inatey la kasiy Gabael? Nayarin anggapoy toon mangipawil na samay kuarta.

³"Mapagpaga si Tobit.

⁴"Insan inkuanen Ana, Inatey la so anak ko. Ag ko panduaruwaan. Insan ginmapon inakisan tan inermenan toy Tobias a kuanto,

⁵"Ligliway bilay ko, akin et inabuloyan ta kan nambiahi?

⁶"Niligliwa nen Tobit si asawa to. Mandeen ka, asawak, inkuanto. Ag ka mapaga, ta maung so pansumpalan to. Wala labat angangko so akaabala ed sikato ya ag to inilaloan. Insan walay kaiba ton napampiaan tan kanayon to ni. Ag ka mapalalon mapagad sikato. Ag ak manduaruwa a wadtan lad dalan.

⁷"Balet inmebat si Ana, Tonda kad tan; paolyan mo ak labat a bukbukor. Ag mo ak papalikdoen. Inatey lay anak ko. Inagew-agew ya ompaway ed abung si Ana, onlad dalan a nanakaran nen Tobias tan diman manalagar ya anggad mansironget. Ag to abuloyan a walay manligliwad sikato, tan no akasempet la akisan tan ermenan toy anak ton sanlabi ya andi-ogipan. Asumpal so duay simba a ponsiay bansal ya insipan nen Raguel a gawaen para si Sara ya anak to. Kanyan dinago nen Tobias tan nampatanir. Ama, kuanto, abuloyan yo ak lan onsempet natan. Ag ak manduaruwa ya anggapo lay ilalo na saray ateng ko a nanengneng da ak ni. Ipangasi yo pan onsempet ak lad kinen amak. Asalitak lad sikayo so kipapasen nen amak a siniputan ko.

⁸"Balet inmebat si Raguel, Dia ka ni, dia ka nid siak, anak ko. Mangibaki ak ed kinen amam na saray mangipakabat ed sikato a maung so kipapasen mo.

⁹"Ama, ag ak la manabala dia, impasoot nen Tobias. Pasempet yo ak lad kinen amak.

¹⁰Inter sirin a tampol nen Raguel ed kinen Tobias si Sara ya asawa to. Inter to met ed kinen Tobias so kapalduad saray kayamanan to; saray aripen, baka, karniro, asno, kamilyo, kawes, kuarta tan kagawaay abung.

¹¹Nilakap nen Raguel si Tobias tan pinasiput to ran inter toy bindision to, Maung komun so pambiahi yo. Say Katawan na tawen et iyagel to ka komun tan si Sara. Naalagar ko ni komun iray anak yo.

¹²Insan inkuanen Raguel ed kinen Sara, Mila kad asawam tan manayam kad abung na saray ateng to. Manlapud natan ipasen mo ran ateng mo, a singa sikami nen inam. Saray maung a balita komun so narengelan ko nipaakar ed sika legay pambibilay ko. Kasumpal ton nampatanir, pinasiput to la ra. Insan inkuanen Edna ed kinen Tobias, Tobias, anak ko inararo, say Katawan et pasempeten to ka komun ya anggapoy maoges a nagawad sika. Itdan to ak komun na andokey a bilay, pian nanengneng ko ni ray anak mo. Say Katawan so tasik; ipapalimak ed sika so anak ko. Ag kan balut manggagaway bengatlan makapaermen ed sikato. Maung komun so panakar yo, Tobias. Manlapud natan si Sara so asawam tan siak so inam. Maaligwas komun so bilay tayon amin legay pambibilay tayo. Insan inanguban nen Edna ira may sanasawa tan pinasiput to la ra.