Read Pangasinan TOBIT 11 Bible Online

TOBIT 11 - Pangasinan bible

TOBIT 11

¹"Kasiput nen Tobias, makaliliket a maung. Indayew tan akisalamatan toy Katawan na tawen tan dalin, say Ari na intiron mundo, lapud maung so asumpalan na inpambiahi to, tan insipan ton pagalangan si Raguel tan si asawa to legan dan mambibilay. Nen asingger la rad siudad na Kaserin, diad paway na Ninive,

²"inkuanen Rafael, Tobias, sikakabat kad kipapasen nen amam a siniputan ta.

³"Nepeg ya onaan tan onsabi; ontombuk lay asawam. Paiparaan toy abung yo, kasakbayan na isabi da ray arum.

⁴"Ag mo lilingwanan ya awiten imay apgo na sira. Inmona ra sirin, tan akilad sikara imay aso nen Tobias.

⁵"Legan to ya, manyodyorung si Ana a banbantagan toy dalan, ta nengnengen toy anak to.

⁶"Biglan anengneng toy Tobias a nitan la, et iningal tod kinen Tobit, Gala! Nitan lay anak ta, a kaiba to may kaaro to!

⁷"Kasakbayan a makaasingger irad kinen Tobit, inkuanen Rafael ed kinen Tobias, Makanengneng lamet si amam.

⁸"Lidliran moy apgo iray mata to. Diad satan, naaknit so ampotin bengatla a nikolabad saray mata to, et makanengneng lamet.

⁹"Binmatik ya inmabet si Ana ed anak to, nilakap to, tan inkuanto, Natan ta anengneng ta ka nin mabilay, anak ko, akaparaan ak lan ompatey. Diad liket to, inmakis.

¹⁰Inmalagey si Tobit tan nipatakbad lolooban na solar.

¹¹Dinago nen Tobias a sankabembenan to may apgo na sira. Sinibukan to ray mata nen ama to tan pinareen to. Inkuanto, Ag ki la mapaga natan, ama.

¹²Insan imporanis to may apgo ed saray mata nen ama to, insan to inaknit manlapud gilig na mata nen Tobit imay ampotin bengatla a nikolaba.

¹⁴Nilakap toy anak to tan diad liket to akaterter iray lua to. Insan inkuanto, Nanengneng ta ka la! Anak ko, say silew na saray matak! Idayew yoy Dios. Idayew yo, lapud inkatalonggaring to. Idayew yo ray amin a masanton anghil to. Ituloy to komuy pamibindision tod sikatayo. Idayew yon anggad angga iray amin ya anghil to.

¹⁵Sikatoy angiter na sayan inkabulag ko, balet nanengneng ko natan si anak kon Tobias! Insan linmoob ed abung si Tobias a maliket, tan inkasikasil ton indayew so Dios. Imbaga tod kinen ama to a maung so inkasumpalan na biahi to, ya ag to labat nala imay kuarta no ag ingen naasawa toy Sara ya anak nen Raguel a manomtombuk lan onsasabi.

¹⁶Mapalaloy liket nen Tobit; indayew toy Dios nen pinmaway ya abeten toy manugang to diad puirtay siudad. Nikelawan iray totoon akanengneng ed sikato, ta bukor toy manaakar tan anggapoy mangitatabin ed sikato.

¹⁷Indayew nen Tobit so Dios tan imbaga tod balang sakey no panoy impangipawil na Dios ed pakanengneng to lapud panangasi to. Nen anengneng nen Tobit si Sara, inlugay to, Tuloy kad abung, anak ko! Nadayew komun so Dios, lapud inyakar to ka diad sikami, anak ko. Bindisionan komun na Dios iray ateng mo, sika, tan si anak kon Tobias. Maliket kamin mangaawat ed sikad balon abung mo. Maksil lawas komun so laman mo tan maliket ka. Tuloy ka, anak ko! Baleg a liket yan agew para saray Judio ed Ninive.

¹⁸Wadman met iray kakaanakan nen Tobit a di Ahikar tan Nadab ya akiambegya rad liket nen Tobit.