Read Pangasinan TOBIT 12 Bible Online

TOBIT 12 - Pangasinan bible

TOBIT 12

¹"Kasumpal na ponsiay bansal, tinawag nen Tobit si Tobias ya anak to tan inkuanto, Anak, ag mo lilingwanan a bayaran imay kaibam a nambiahi tan pasolukan mo niy iter mo.

²"Ama, pigaray ibayar kod sikato onung ed isip yo? tinepet nen Tobias. Diad siak a dili, ag ko kairapay linawa ya iter ed sikato so kapalduay amin ya insempet mi dia.

³"Insempet to ak ya ag naano tan maksil so laman ko, linman angalad samay kuarta ed kinen Gabael, pinagit toy dimonyo ed kinen Sara, tan pinaabig to ray mata yo. Pigay iyarum ya iter kod sikato?

⁴"Iter moy kapalduad amin a kayamanan ya insempet mo. Sikatoy kanepegan to, ebat nen Tobit.

⁵"Tinawag sirin nen Tobias si Rafael tan inkuanto, Kaaro, nia so kapalduad amin a kayamanan ya insempet ta. Awat mo ya, ta baleg so sagpot mo. Maung komun so pambiahim!

⁶"Insan tinawag nen Rafael si Tobit tan si Tobias, tan nantongtong iran talo. Inkuanen Rafael, Idayew yoy Katawan tan ipaamta yod amin a totoo so amin a kaabigan a ginaway Dios ed sikayo, pian igalang da met tan kantaan day panangidayew. Ipaamta yod amin a totoo so ginaway Katawan. Idayew yo lawas so Dios.

⁷"Marakep a kanunotan so ag pangibagad iyaamut na ari, balet nepeg ya ipaamtad inerman a pasen iray gagawaey Dios, pian sikatoy nadayew tan nagalang. No maung so gagawaen mo, anggapoy onsabin maoges ed sika.

⁸"Magmaung niy mampikasin masimoon tan say mamaliket ed Dios diad panamegley na panulong ed saray mairap-bilay, nen say mampayaman tan manggaway kaogsan. Maung niy mangiter ed saray mairap-bilay nen say mantipon na balituk.

⁹"Satan a panangaro et ilaban to kad patey tan paandien ton amin iray kasalanan mo. Saray matulong ed saray mairap-bilay et nagnap so bilay da,

¹⁰balet saray mambibilay ed kasalanan tan kaogsan et say sikaran dili so sankaogsan a kalaban da.

¹¹Nibagak lad sikayo a nepeg ya ag ibagbaga so iyaamut na ari, balet nepeg ya ibagbagad saray totoo so gagawaen na Dios. Natan ibagak so amin a katwaan ed sikayo ya anggapoy soluk tan anggapoy kulang.

¹²Tobit, nen nampikasi ka tan si Sara ed Katawan, siak so angyakar na saraman a pikakasi yo ed mapagalang a kawalaan na Dios. Ontan met so ginawak kapag imponpon mo iray inaatey.

¹³Diad samay agew ya inmalagey ka tan tinaynan moy lamisaan ya ag ka ni angan, ta ipompon mo imay bangkay, imbaki ak na Dios a manubok ed sika.

¹⁴Balet imbaki to ak met a manambal ed sika tan mangilaban ed manugang mon Sara ed saray gunigon to.

¹⁵Siak si Rafael, sakey ed saray pitoron anghil a manalalagey ed arap na mapagalang a kawalaan na Dios tan sipaparaan a manlingkur ed sikato.

¹⁶Mapalaloy inkataktakot di Tobit tan Tobias tan dinmakmomo rad dalin a manggiwgiw irad takot da.

¹⁷Balet inkuanen Rafael ed sikara, Ag kayo natatakot, ta maung ya amin so agawa. Ag yo linglingwanan ya anggad kapigan so mangidayew ed Dios.

¹⁸Linawa ton onla ak dia ya ontulong ed sikayo, aliwan dilin linawak. Kanyan mankanta kayoy panangidayew ed Dios legan yon mambibilay.

¹⁹Nen abaloan yon anengneng yo ak a mangakan, say katwaan to et ag ak angan; singa ak labat mangakan.

²⁰Legan yon mambibilay diad tapew na dalin, nepeg yon idayew yo so Katawan a Dios tan misalamat kayod sikato. Natan nepeg ya ompawil ak la ed samay angibakid siak. Isulat yon amin iray agawad sikayo.

²¹Insan la naandipat si Rafael diad tawen. Inmalagey ira di Tobit tan si Tobias, balet ag da la anengneng.

²²Ginapwan day nankanta na panangidayew tan akisalamat ira lapud saray makapakelaw a ginagaway Dios legan a kaiba ra si anghil Rafael.