Read Pangasinan TOBIT 14 Bible Online

TOBIT 14 - Pangasinan bible

TOBIT 14

¹"Anemaplo tan duay taon nen Tobit nen abulag, balet nen nipawil lad sikatoy pakanengneng, nambilay a nagnap. Matultulong lamet ed saray mairap-bilay, tan intuloy toy pangidadayew tod Dios tan pangipapamta toy talonggaring to. Inatey a mareen nen sanlasus tan labinduay taon to, tan nipompon na mapagalang ed Ninive.

³"Nen magano lan ompatey si Tobit, impatawag toy anak ton si Tobias tan binilin to,

⁴"Anak ko, alam ya amin iray anak mo, tan laka yon tampol ed Media. Manisia ak a magano lan nagawa imay sintinsia na Dios ya impasakbay nen propita Nahum sumpad Ninive. Nagawa ya amin iray imbagad Israel na saray propita na Dios nipaakar ed Ninive tan Asiria. Ag ak manduaruwan balut a nagawan andi-saew iray amin ya imbaga na Dios. Ag lingwanan na Dios iray sipan to. Arawi kayo nid kaatapan diad Media nen say diad Asiria odino Babilonia. Amin da ray kapara tin Judio a manaayam ed Israel et naala rad samay maung a dalin tan nibantak irad arum a bansa. Magmaliw ya andi-kakanaan a dalin so intiron Israel; nakaindan iran siudad so Samaria tan say Jerusalem. Napoolan tan negeba so Timplo na Dios tan mansiansian sigput ya aderal a pigay taon.

⁵"Balet kasian lamet na Dios iray totoo to, tan ipawil to ra lamet ed dalin na Israel. Pasimbaloen dan ipaalagey so Timplo, balet ag to naparaan ed dakep imay inmonan paalagey, ya anggad nasabi so manepeg a panaon. Balet no nasabi la tan a panaon, amin da ray Israelita a nibantak ed nandoroman bansa et ompawil irad dalin da, tan pasimbaloen dan ipaalagey so siudad na Jerusalem onung ed gendat a dakep to. Pasimbaloen dan ipaalagey so Timplo na Dios ed Jerusalem, onung na impasakbay da ray propita na Israel.

⁶"Insan ompawil ed Dios iray amin a bansa ed intiron mundo. Igalang dan saksakey a tuan Dios tan ikaindan da ray talintaoy diriyos da ya angiwanwan ed sikarad tila-tilan panangigalang.

⁷"Idayew na saray bansa ed mundo so andi-anggaan a Dios diad panumpal day kaliktan to. No onsabiy tan a panaon, ilaban na Dios ya amin iray totood Israel a mansiansian matoor ed sikato. Tiponen to rad Jerusalem, tan pakayaryan tod sikaray dalin nen Abraham, tan manayam irad man ya arawid kaatapan ya anggad angga. Manggayaga ya amin iray totoon mangaarod Dios diad intiron puso tan kamarerwa ra, balet naandid tapew na dalin iray makasalanan tan saray totoon maoges.

⁸"Natan, sikayo ran anak ko, sumpal yo ra yan bilin ko. Igalang yon masimoon so Dios tan gawa yoy makapaliket ed sikato.

⁹"Pabaleg yo ray anak yo ed panggaway kaptekan. Ibangat yod sikara a nepeg day ontulong ed saray mairap-bilay tan ag dan balut lilingwanan a nepeg day mangidayew a masimsimoon ed Dios.

¹⁰Anak kon Tobias, taynan mo lay Ninive natan. Ag ka dia manaayam. Kasumpal mon ipompon si inam ed abay ko, taynan ka la; ag ka manaayam na anggan sanlabi ni ed loob na siudad. Maoges yan siudad tan napno na inmoralidad; anggapoy kababaingan da ray totoon manaayam dia. Nunot moy ginawa nen Nadab ed pangamaen ton si Ahikar ya amabaleg ed sikato. Sinali ton pateyen si Ahikar, tan pinasoot ton inmamut ed dalem na pantion. Nipawil ed liwawa na agew si Ahikar, balet imbaki na Dios ed andi-anggaan a bilonget si Nadab, lapud kaogsan a ginawa to. Apaliisan nen Ahikar so makapatey a patit ya imparaan nen Nadab ed sikato, lapud mabonluk a mangiter si Ahikar. Balet naplag si Nadab ed samay makapatey a patit tan diman inatey.

¹¹Kanyan natan, sikayo ran anak ko, nengneng yo so asumpalan da ray maarod kapara ran too; nengneng yo met so patey a kasumpalan da ray totoon managpairap ed kapara ran pinalsa. Balet natan makapoy ak la, anak ko. Insan imparokul day Tobit ed katri to. Inatey tan nipompon na mapagalang.

¹²Ag abayag, inatey met so asawa nen Tobit, tan nipompon ed abay na asawa to. Kasumpal na pompon linmay Tobias tan si asawa to ed Ecbatana diad Media, tan akiamung irad kinen Raguel a katolongan nen Tobias.

¹³Inasikaso nen Tobias ira di Raguel tan Edna nen matakken la ra, tan impatnag tod sikaray baleg a panangigalang tod sikara. Nen binabawi la ra na Dios, impompon to ra ed Ecbatana. Tinawir nen Tobias ya amin iray kayaryan nen Raguel, a singa impanawir to ed saray kayaryan nen ama ton Tobit.

¹⁴Masikesiken lay Tobias, tan sanlasus tan labimpitoy taon to nen ompatey.

¹⁵Diad ontan lan karokey na taon ya impanbilay to, nadngelan to niy nipaakar ed inkaderal na Ninive tan naimatunan to niy impanakep nen Ari Cyaxares na Media ed saray totoo. Indayew nen Tobias so Dios lapud impanusa tod saray totood Ninive tan Asiria. Legan ton nambilay akisalamat lapud ginawa na Dios ed Ninive.