Read Pangasinan TOBIT 3 Bible Online

TOBIT 3 - Pangasinan bible

TOBIT 3

¹"Lapud mapalalon kababaingan ko, akaakis ak tan nandageyem ak. Nen apokpokan ko lay iterter na saray luak, nanpikasi ak:

²"Matonung ka, O Katawan! Mapangasi ka ed amin a gagawaen mo, matoor kad amin a kagagawam. Sikay huis na sayan mundo.

³"Kekerewen kod sika a kasian mo ak pa. Ag mo ak pa dudusaen lapud saray kasalanan ko, anggan lapud saray ag ko amtan kasalanan ko. Sinumlang tan ag ka inonur na saray lalakik, balet ag mo ak pa dudusaen lapud saray kasalanan da. Pinaolyan mon nasamsaman iray totoo mi, nadakep tan napatey ira. Ginawam a panmarmaran iray totoo mi, totoon nepeg a bosulen tan pabaingan, diad amin a bansan angikaykayatan mod sikami.

⁵"Naynay mon sinintinsiaan iray lalakik lapud saray kasalanan da, tan dinusa mo ak lapud saray kasalanan ko. Aliwa kamin matoor tan impolisay mi ray ganggan mo, kanyan matonung lawas so inkadusa mi.

⁶"Natan gawam ed siak so onung na kaliktan mo. Alam lay bilay ko tan ipaliis mo ak lad sayan mundo; papawil mo la yan laman ko ed dalin. Magmaung niy kipapasen ko no inatey ak la. Nagugunigon ak lapud saray panagpabaing ya ag ko kanepegan; makapoy ak la lapud inkaekalan koy ilalo. Katawan, mangganggan ka pa patondam pa lay kagugunigon ko, iyakar mo ak lad painawan andi-anggaan. Ag mo pa ipopolisay so pikakasik. Labay ko niy ompatey nen say mambilay ed ontan lan kairapan tan mangako na ontan iran maruksan panamabaing.

⁷"Diad saman met lamlamang ya agew, si Sara a taga siudad na Ecbatana na Media tan anak nen Raguel, et pinabaingan na sakey ed saray bibiin aripen nen ama to.

⁸"Amimpiton akiasawa si Sara, balet pinatey nen maoges a dimonyon Asmodeo so balang asawa to, kasakbayan na impanakdul da. Inkuan na samay aripen ed kinen Sara, Sika a managpatey na asawam! Motektek mo pay inkatoom! Amimpito ka lan akiasawa, balet anggapod sikaray nambilay na magenap a makaiter ed sikay anak.

⁹"Akin et pilanlanur mo kami? Ompatey ka la komun, pian makapiolup kad saray asawam ya inaatey. Ag ka komun mananak a balut!

¹⁰Maerermen si Sara tan tinmerter iray lua to, insan sinmegep ed tagey na abung, ta ginetma ton ibitay so laman to. Balet nen ninudnunot to so getma ton gawaen, inkuantod sikaton dili, Andi, ag ak mambikkel! Pabaingan na saray totoo si amak ya ikuanda, Saksakey so anak mo, sakey a biin inararom, balet imbitay toy sikaton dili, lapud maerermen. Satan a kababaingan nen masiken lan amak so mangiter na maganon ipatey to, et siak so makasengeg. Ag ak mambikkel; kerewen ko labat ed Katawan ya abuloyan to ak ya ompatey. Diad ontan, ag ko la narengel iray panamabaing dad siak!

¹¹Insan inmasingger ed bintana si Sara, intagey to ray lima to a mampikasi, tan kuanto: O Dios a mapangasi tan manepeg min idayew, nagalang lawas komun so ngaran mo, idayew ka komun ya anggad angga na amin da ray pinalsam.

¹²Katawan, diad sikay kekerewan ko na tulong.

¹³Iganggan mo pan naandi ak lad sayan bilay; diad ontan, ag ko la narengel iray panamabaing dad siak.

¹⁴Amtam a peteg, O Katawan, a marikit ak nin anggan natan; ag ak ni arotakan na laki.

¹⁵Ag ko nin balut impelag ed kababaingan so siak a dili odino say ngaran na amak, legan na pambibilay mid sayan dalin a nibantakan mi. Anggapo lay arum ya anak nen amak a mananawir to, tan anggapo met so kanayon a piasawaan ko. Abalo ak lan amimpito, kanyan akin et mambilay ak niy andokey? Balet no ag mo linawa a babawien so bilay ko, kasian mo ak pa sirin. Ag mo pa la iyaabuloy a narengel ko ni lamet ira man a panamabaing!

¹⁶Dinengel na Dios a walad tawen iray pikakasi di Tobit tan Sara;

¹⁷imbaki toy anghil ton Rafael ya ontulong ed sikara. Nibakin mangekal na samay ampotin bengatlan nikolaba ed saray mata nen Tobit, pian makanengneng lamet; nibaki met a mangiparaan na panasawa di Sara tan Tobias ya anak nen Tobit, ta si Tobias a kapinsan nen Sara so walay kanepegan a mangasawad sikato. Niganggan met ed kinen Rafael a pataynanen tod kinen Sara si dimonyon Asmodeo. Diad samay bektan tinaynan nen Tobit so patio tan pinmawil ed abung to, onlalasur si Sara a nanlapud abung to diad siudad na Ecbatana.