Read Pangasinan TOBIT 6 Bible Online

TOBIT 6 - Pangasinan bible

TOBIT 6

¹"Linma sirin ya amaarap ed Media si Tobias tan samay anghil, tan kaiba ray aso nen Tobias. Nanakar ira ya anggad mansironget, insan nankampo rad gilig na Ilog na Tigris.

²"Linmad ilog si Tobias a manoras na saray sali to, et biglan linmuksoy baleg a sira tan aakmunen toy sakey a sali to. Inmeyag si Tobias,

³"tan samay anghil inkuanto, Tekmelan mo tay sira tan ag mo iikbanan! Tinekmelan sirin nen Tobias imay sira, tan inggayugoy tod tambib na ilog.

⁴"Butyakan mo tay sira, inkuan na samay anghil, tan alam so apgo to, say puso to, tan say altey to. Isinup mo ra; nayari ran itambal, balet ibantak mo ray pait to.

⁵"Ginawa nen Tobias imay imbaga na anghil. Insan inluto to may sira, angan, tan inasinan toy arum a parti na sira tan inawit to. Intuloy dan dua so kurang da ya anggad asingger la rad Media.

⁶"Insan tinepet nen Tobias ed samay anghil, Kaaron Azarias, anto ray sakit a tambalen na sayan apgo, puso, tan altey?

⁷"Inmebat imay anghil, Say puso tan say altey et nayarin poolan tan ikana ran pamagit na dimonyo odino maoges ya ispiritun mamapairap ed siopaman. Tampol ya ontonday mamapairap, tan ag lan balut nasigensigen lamet imay too.

⁸"Satan balet so apgo so nayarin itambal ed toon akolabaay bengatlan ampoti iray mata to. Ipoyok mod mata to, insan mo sibukan so kolaba, et makanengneng lamet so too.

⁹"Nen akasabi rad Media tan asingger la rad siudad na Ecbatana,

¹⁰inkuanen Rafael, Kaaron Tobias. Anto man? tinepet nen Tobias. Diad sayan labi, intuloy nen Rafael, mipundo ta ed abung na kanayon mon si Raguel. Walay saksakey ya anak ton marikit a manngaray Sara,

¹¹tan bangta sikay sankaasinggeran a kanayon to, walay kanepegan mon mangasawad sikato. Wala met so kanepegan mon ontawir ed saray kayamanan nen ama to.

¹²Si Sara et makalakal, makpel so linawa to, tan maganggana; tan maung a too si ama to. Diad saya met a labi, mitongtong ak ed ama to nipaakar ed panasawa yon dua, et onabuloy ed piasawa na anak tod sika. No kapawil tan manlapud Rages, silibraan tayoy kasal. Ag nayarin ag onabuloy si Raguel ed pangasawam ed anak ton si Sara, tan ag met nayarin piasawaen tod arum a laki. No piasawaen tod arum a laki, patey so dusa to, onung ed Ganggan nen Moises. Amta to a sika labat so lakin walay kanepegan ton mangasawad kinen Sara ya anak to tan manawir ed kayaryan to, kanyan sumpal moy simbawak ed sika. Diad sayan labi tongtongen min dua nen Raguel so sayan pamaakaran tan say pansipanan yon manasawa nen Sara. No kapawil tan manlapud baley na Rages, isempet ta si Sara.

¹³Balet inkuanen Tobias ed kinen Rafael, Kaaron Azarias, nadngelan ko la nen saman ya amimpiton angibalo si Sara. Inatey so balang sakey ed sikara diad labiy bansal, kasakbayay panakdul da.

¹⁴Onung ed balitan nadngelan ko, sakey a dimonyo so amatey ed sikara. Anggapoy gagawaen tod si Sara, balet papateyen toy siopaman a lakin onsingger ed sikato. Antakot ak ed sayan dimonyo. Saksakey ak ya anak, et no ompatey ak, ompatey met ed ermen iray ateng ko. Anggapo ni met so arum ya anak dan mangipompon ed sikara.

¹⁵Inmebat si Rafael, Alingwanan mo la ra may bilin nen amam? Impurpurek ton mangasawa kay biin kanayon mo. Natan, dengel mon maung so ibagak ed sika. Ag ka mapaga nipaakar ed samay dimonyo. Asawam si Sara! Amtak a diad sayan labi, iyabuloy nen Raguel a piasawaen ed sika si Sara.

¹⁶No onloob kayod kuarto, awit mo may puso tan altey na sira tan iyan mod mandarlang ya insinso,

¹⁷pian nabalingitan so intiron loob na kuarto. Diad pakasingob na dimonyo ed balingit to, ontaynan tan ag to lan balut asinggeran si Sara. Balet kasakbayan kayon manakdul, bangon kayo ni tan ipikasi yon kasian tan iyagel kayoy Katawan na tawen. Ag ka natatakot, Tobias. Si Sara so niganan asawaen mo nanlapud inletneg na mundo. Niagel mod dimonyo si Sara, tan milad sika no onsempet ka. Nawalaan kayon dua na amayamay ya anak ya araroen yo. Ag ka sirin mapaga! Dinengel a maung nen Tobias so imbaga nen Rafael. Amta to a kanayon tod ama si Sara. Naibegan toy Sara tan maliket ed panalagar ton naasawa.