Read Pangasinan TOBIT 8 Bible Online

TOBIT 8 - Pangasinan bible

TOBIT 8

¹"Kayari ran angan, insan oras lay kakaogip, saramay ateng nen Sara et inolup day Tobias ya inyakar ed kuarto nen Sara.

²"Anunotan to ra may bilin nen Rafael, kanyan kinaut tod supot ya angisinupan to imay apgo tan puso na sira. Insan inyan to rad mandarlang ya insinso.

³"Say balingit to et pinagit tod sikara so dimonyo, tan batik ed Egipto. Inosilan nen Rafael imay dimonyo et nabot tod man. Binalur ton tampol iray lima tan sali to.

⁴"Nen si Tobias tan si Sara et bukbukor dan dua ed dalem na kuarto, binmangon si Tobias tan inkuantod asawa to, Bangon ka, ta ipikasi tan kasian tan iyagel ita komun na Katawan.

⁵"Binmangon si Sara pian makapampikasi ran dua, tan kinerew dad Dios ya iyagel to ra. Insan nanpikasiy Tobias: O Dios na saray lalaki mi, manepeg ya idayew mi ka. Igalang komun ya ando lan ando so ngaran mo. Na amin da ray pinalsam diad tawen tan dalin.

⁶"Pinalsam si Adan tan inter mon asawa to si Eva, a kaiba tan katulongan to. Nagmaliw iran ateng na amin a katoowan. Inkuanmo, Aliwan maung a mambukbukor so too. Igawaan ko na sakey a manepeg a katulongan to.

⁷"Katawan, pinilik ya asawa si Sara, aliwan lapud pamenek kod kaliktan na laman, no ag ingen lapud amtak a matonung yan ginawak. Kasian mo kami pa, tan iyabuloy mon andokey so pambilay min dua.

⁸"Insan bansag dan inkuay Amen,

⁹"tan dinmokul irad saman a labi. Ag abayag ed saman a labi, tinawag nen Raguel iray aripen to, tan pinmaway iran nanggaway lobuk,

¹⁰ta inisip nen Raguel, Ompatey met angangko si Tobias, et elekan tan balawen kami na saray totoo.

¹¹Kayari ran nanggaway abut, pinmawil ed abung si Raguel tan kuantod kinen asawa to,

¹²Mangibaki kay sakey ed saray aripen a bibii, ta nengnengen to no mabilay niy Tobias. No inatey la, ikotkot mi lan tampol, pian anggapo lay mikabat.

¹³Angibaki ra sirin na sakey a biin aripen ya angalay lamparaan tan linman nengnengen to no mabilay niy Tobias. Kapangilokas tod puirtay kuarto, anengneng ton malet so ogip da ra may sanasawa.

¹⁴Pinmawil so aripen tan impakabat tod kindi Raguel tan si Edna a mabilay si Tobias tan anggapoy agawad sikato.

¹⁵Indayew nen Raguel so Dios na tawen. O Dios, manepeg kan idayew mi. Idayew ka komun ya ando lan ando na saray totoom; malinis komuy puso ra a mangidayew ed sika.

¹⁶Idadayew ta ka, lapud pinaliket mo ak; mapangasi kad sikami tan ag timwa so mapalalon katatakotan ko.

¹⁷O Katawan, kanepegan moy idayew mi; kinasian mo ra yan tobun-balo a kapankasal, saray alenleneg ya anak na saray atateng da. Natan, kasian mo pa ra tan iyagel mo ra. Pambilay mo pa ran dua a napnoy liket tan panangaro.

¹⁸Impatabunan nen Raguel ed saray aripen to imay abut kasakbayan na kabwasan.

¹⁹Imbaga nen Raguel ed asawa to a manggawa ray malaem a tinapay ya ikanad baleg a ponsia. Insan sikato balet, pinmaway ed kawalaan da ray ayayep to, tan angisempet na duaran bakan kalakyan tan apatiran karniron kalakyan, tan ingganggan tod saray aripen to a patasen da ran para bansal.

²⁰Tinawag toy Tobias tan sinambaan to ya ag to pataynanen a duay simba. Inkuanto, Manayam ka ni dia, ta mangan tan oninom itayo. Mangiter ya na kaabigan ed anak kon Sara, kasumpal na makapasinagem ya impanirap to.

²¹Insan alam so kapalduay kayamanan ko, tan sempet kad kindi amam ya ag ka naano tan maksil so laman mo. Ipatawir kod sika so keran kapaldua na kayaryan ko no andi kami lad bilay nen Edna. Ag mo panduaduaruwaan so panangaro mid sika; manlapud natan sikay anak mi a singa si Sara. Anggapoy nepeg mon takotan, anak ko.