Read Pangasinan TOBIT 9 Bible Online

TOBIT 9 - Pangasinan bible

TOBIT 9

¹"Insan tinawag nen Tobias si Rafael tan inkuanto,

²"Azarias, mangitagar kay apatiran aripen a kaibam, ta mangala ka met na duaran kamilyo, ta lakad kinen Gabael diad Rages. Iter mod sikato yay apirmaan a kaletan, pian iter tod sika so kuarta. Itagar mo no ompawil ka dia, ta miponsiad bansal.

³"Amtam a bibilangen nen amak iray agew anggad isempet ko, et no naabala ak labat na anggan sanagew, napagaan a mapalalo. Amtam met so impangipasoot nen Raguel a manayam ak ni dia, et ag ko nayarin pabaingan.

⁵"Kanyan si Rafael tan saray apatiran aripen et linma rad Rages diad Media, tan nampundo rad abung nen Gabael. Inyawat nen Rafael ed Gabael imay apirmaan a kaletan tan imbaga to a kapankasal si Tobias ya anak nen Tobit, tan abagaan si Gabael ed ponsiay bansal. Binilang a tampol nen Gabael iray supot a kawalaay kuarta; wala niy silyo da ra may supot; inkarga da ra may supot ed beneg na saray kamilyo.

⁶"Insan diad kabkabwasan na ontombuk ya agew, sinmiput iran onlad ponsiay bansal. Kasabi nen Rafael tan si Gabael ed abung nen Raguel, asabian dan mamandem si Tobias ed lamisaan, balet inmalagey a tampol tan inlugay toy Gabael. Akaterter iray lua nen Gabael nen inlugay to met si Tobias tan inkuanto, Kapadparam si matonung tan maaron amam. Say Dios na tawen et bindisionan to ka komun, say asawam, say katolongan mon bii, tan say amam. Nadayew komun so Dios! Impanbilay to ak nin makanengneng ed kapinsan kon Tobias a kaluplupa nen ama to.