Read Pangasinan JUDIT 12 Bible Online

JUDIT 12 - Pangasinan bible

JUDIT 12

¹"Ingganggan nen Holofernes iray totoo to ya iyakar day Judit ed lamisaan a kawalaan na saray kubirton pilak nen Holofernes tan itdan da na saray nidoma-doman kakanen tan alak to.

²"Balet ag inmabuloy si Judit. Inkuanto, Ag ko nayarian a kanen so taganom, ta nasumlang ko ray ganggan na Dios ko. Kanen ko labat iray sankaawit ko.

³"Tinepet nen Holofernes, Balet antoy gawaen mo no naoput la ray awit mon kakanen tan alak. Pangalaan miy kanen a para sika? Anggapoy Israelita diad kampo mi.

⁴"Inmebat si Judit, Katawan, no panoy andi-duaruwan mabilay ka, walay kanen kon ag naoput ya anggad kasumpal na pangikanay Katawan ed siak diad panumpal na plano to.

⁵"Insan saray dilin aripen nen Holofernes et inyakar day Judit ed sakey a tulda tan diman inmogip. Kasakbayan na palbangon, binmangon

⁶"tan impaikerewen ed kinen Holofernes na abuloy ya onlad patar a mampikasi.

⁷"Ingganggan nen Holofernes iray guardia to ya abuloyan day Judit ya ontaynan ed kampo. Kanyan taloy agew a nanayam ed kampo si Judit, tan kapag labi ompaway ya onlad patar ya asingger ed Bitulia tan manames ed sobul.

⁸"Kayari ton manames, ipikasi tod Katawan a Dios ya iwanwan tod plano to a mangiter na pananalo ed Israel.

⁹"Insan ompawil ed kampo a malinis onung ed ganggan tan manayam ed tulda to ya anggad kayari na pandem.

¹⁰Diad kumapat ya agew na panaayam nen Judit ed kampo, angiter si Holofernes na baleg a ponsia a para saray sankatageyan ya opisyal to, balet ag to inimbitaan iray opisyal a mankikimey.

¹¹Inkuantod kinen Bagoas, say yunuko a mangaasikasod saray dilin nakakaukolan nen Holofernes, Laka, ta tanggoyur mo may biin Hebrea ya aasikasoen mo ya onla diad tuldak a miakan tan miinom ed sikami.

¹²Sakey a kababaingan so pamalabas na pankanawnawan miakdul ed sakey a biin singa sikato. No ag ko salien ya ayaten, elekan to ak.

¹³Kanyan pinmikal ed kawalaan nen Holofernes si Bagoas tan linmad kinen Judit, Magangganan bii, kuanto, iimbitaan ka na pangulo ya onlad tulda a miinoman. Gala, ta manliket kan singa saray bibiin taga Asiria a manlilingkur ed palasio nen Nabucodonosor. Sakey yan baleg a kagalangan.

¹⁴Inmebat si Judit, Maliket ak a mangawat. Panoy pamalabas ko? Ag ko nalingwanan yan maliket a labi legan kon mambibilay.

¹⁵Kanyan inmalagey si Judit tan insolung toy sankarakepan a kawes to. Inmona nen sikato imay aripen ton bii tan inyaplag tod arap nen Holofernes iray katat na kordiro ya inter nen Bagoas ed kinen Judit, ta yorungan to ra no mangan.

¹⁶Linmad tulda si Judit tan inmirung diman. Sinmaboy dala nen Holofernes nen anengneng toy Judit tan ag to napokpokay pilalek to a piakdulan. Manlapud samay agew ya ononan impakanengneng tod sikato, pialagar toy pankanawnawa ton mangayat ed sikato.

¹⁷Inkuantod sikato, Miinoman kad sikami tan manliket ka.

¹⁸Inmebat si Judit, Mabolbolus ak, katawan; sankaliketan yan agew ed bilay ko.

¹⁹Anggaman ontan, kinan tan ininom labat nen Judit so imparaan na aripen to.

²⁰Mapalaloy inkaayat nen Holofernes ed kinen Judit, kanyan naninom ni na alak a dakel nen say aminsan a nainom to ed arum a panaon na intiron bilay to.