Read Pangasinan JUDIT 16 Bible Online

JUDIT 16 - Pangasinan bible

JUDIT 16

¹"Insan anganta na kantay pisasalamat si Judit diad arap na amin da ray totood Israel a wadman, tan akibiang iray totoo ed sayan kantan pangidayew.

²"Kinanta to, Idayew yoy Dios ko tan mankanta kayod sikato; idayew yoy Katawan diad panamegley na saray tambul tan piangpiang; manogtog kayo na balon kantan para sikato. Idayew yo tan kerew kayod sikato na tulong.

³"Mibabakal so Katawan tan sikatoy mamapatonday laban. Inyagel to ak ed saray mangoosil ed siak tan impawil to ak ed kampo da ray totoo to.

⁴"Sinmabi ray taga Asiria manlapud leksab na kapalandeyan na baybay, a kaiba da ray nilibon sondalo ra. Sinamben na saray sondalo ra iray ilog ed saray patar; nilaknaban na saray sondalo ran akakabayo iray palandey.

⁵"Nantaktakot iran poolan day bansa tayo, pateyen da ray tobun-balo tayo, ibasig dad dalin iray ogogaw tayo, alaen dan priso iray anak tayo, tan ibatik da ray bibiin tobun-balo tayo.

⁶"Balet pinalikdo ra na Katawan a Makapanyarin-amin; inkana toy sakey a bii a mamatondad sikara.

⁷"Ag pinatey na saray tobun-balon sondalo so palbayani ra, odino dinogpaan tan pinatey na saray makapanyarin alan. Si Judit ya anak nen Merari so amatey ed sikato diad panamegley na ganggana to.

⁸"Initdan to na pananalo iray napapairap a totood Israel, nen inekal toy kawes na inkabalo to, tan nansolung na linen pian naayat to. Angyan na mabli ran pabalinget tan binerberan to na laso so buek to.

⁹"Samay palbayani naayat iray mata to ed dakep na sandalya nen Judit; adakep na ganggana so puso to. Insan atipas na ispada so beklew to.

¹⁰Ginmiwgiw iray taga Persia ed sebeg to; nikelawan iray taga Medes ed inkapuso to.

¹¹Insan inmeyag lapud pananalo iray totoo tayo. Makapoy tan napapairap ira nen saman, balet pinasener dan agewgew tan atakot iray kalaban.

¹²Kabyangan itayo na boleg da ray aripen, balet pinmoliktar tan batik iray kalaban tayo; pinatey mi ran singa saray nampugan aripen. Pinatey ira na saray sondalo na Katawan.

¹³Manganta ak na balon kanta ed Dios ko. O Katawan, mabiskeg tan mapagalang ka! Ag ka nin balut atalo.

¹⁴Abuloyan mon panlingkuran ka na amin a pinalsam. Nangganggan ka, et niwala ran amin; nilinawaan mo ra, et apalsa ran amin. Anggapoy makasunggay ed ganggan mo.

¹⁵Manggiwgiw iray palandey tan saray dayat, tan natonaw a singa kandila iray baton-dampay no onsingger ka. Balet walay panangasi ed amin da ray ontotoluk ed sika.

¹⁶Lalon pakaliliketan na Katawan iray ontotoluk ed sikato nen saray pinilin karni ed altar, odino saray sankabalingitan a bagat.

¹⁷Deral so pansumpalan na saray bansan onsusumpad saray totook. Dusaen ira na Katawan a Makapanyarin-amin no Agew na Okum. Mangibaki na apoy tan saray bigis a mangoput na saray laman da, tan anggad anggan manakis irad sakit.

¹⁸Nen sinmabid Jerusalem iray totoo, nilinisan day sikaran dili onung ed ganggan tan inggalang day Dios. Insaklang da ray bagat a popoolan, saray bagat a pinalapud mabolus a linawa, tan saray rigalo.

¹⁹Insaklang nen Judit ed Dios ya amin iray kayaryan nen Holofernes ya inter ed sikato na saray totoo. Diad panumpal nen Judit na sakey a samba, insaklang ton sakey a nidoma-doman bagat ed Katawan imay moskitiron inala to ed katri nen Holofernes.

²⁰Taloy bulan ya intuloy na saray totoo so nansilibra diad arap na Timplo ed Jerusalem, tan kaiba ra met si Judit.

²¹Nen asumpal la ran nansilibra, sinmempet lad abung so balang sakey ed sikara, tan sinmempet ed Betulia si Judit a manayam ed dilin dalin to. Bantug ed intiron dalin na Israel legan na impanbilay to.

²²Dakel iray lalakin malabay a mangasawad sikato, balet ag to la akiasawa manlapud impatey na asawa to.

²³Tinmuloy a kinmayat so inkabantug to, tan nanayam ed abung ya intilak ed sikato na asawa to. Kasakbayan na impatey to, inapag to ray kayaryan to ed saray asingger a kakanayon to tan saray kakanayon na asawa to tan imbolus to may biin aripen to. Nen inatey ed Betulia nen mantaon na sanlasus tan limara, nipompon ed abay na asawa to, tan pitoy agew ya inermenan na saray totood Israel.

²⁵Legan na impanbilay nen Judit, tan amayamay a taon kayari na impatey to, anggapoy nampangayan antaktakot ed Israel.