Read Pangasinan JUDIT 2 Bible Online

JUDIT 2 - Pangasinan bible

JUDIT 2

¹"Diad kumalabinwalon taon a panooley nen Ari Nabucodonosor, diad kumaduamplo tan duan agew na ononan bulan na saman a taon, ginetma to tan saray sumisimbawa to ya ituloy da may plano ran ombales ed amin da ray bansan ag linmabay ya ontulong ed sikato.

²"Tinawag na ari iray amin a pangulo tan saray manonan opisyal to tan indalatdat tod sikara no panon so impantraidor ed sikato na saramay bansa. Nampapaknaan na saray opisyal to tan sikato a pateyen dan amin iray ag tinmulong ed sikato ed bakal. Insan to impaliwawad sikara no panon so idogpa ra.

⁴"Nen mansasamput la may tongtongan, ingganggan nen Nabucodonosor ed kinen Holofernes a pangulo na saray sondalo to tan onkumadwad ari ed pakaoley:

⁵"Siak, si Nabucodonosor, say matalonggaring ya ari tan manoley ed intiron mundo, et igaganggan ta kan mamili na saray matalonad bakal a sondalo: sanlasus tan duamplon libon akaran tan labinduan libon akakabayo.

⁶"Insan yo dogpaan iray dalin ed sagur, lapud ag da labay so ontulong nen inmapireng ak ed sikara.

⁷"Pasakbayan mo ra a nepeg day mangiparaan na saray bagat a dalin tan danum, a pangipanengneng na isuko ran sigput. Ipaliknak ed sikara so intiron petang na olok tan sigput ko ran deralen. Gatinan na saray sondalok so intiron dalin da tan samsaman da legan dan onsusulong.

⁸"Panoen ko ray patar na saray bangkay da tan tambakan kon amin iray kolus tan ilog na amayamay a bangkay, et onlepwa ra.

⁹"Dakepen kon amin iray nakdaan a mabilay tan iyakar ko rad saray sankaarawian a parti na mundo.

¹⁰Balet sika, Holofernes, onona ka la nen siak tan sakop mo lan amin iray dalin da. No onsuko rad sika, bantayan mo ra ya anggad isabik a manusad sikara.

¹¹Balet no onlaban ira, ag mo ra papalabasen. Patey mo ra tan samsaman moy intiron dalin a nasakopan mo.

¹²Sinambaan ko la, tan isubak so bilay ko tan say nanarian ko diad panumpal kod sayan sambak.

¹³Ag mo ak susumlangen a balut. Siak so arim; ag mo ya lilingwanan, tan ag ka manaabalan manggawad amin ya ingganggan kod sika.

¹⁴Kanyan tinaynan nen Holofernes so ari tan tinawag ton amin iray pangulo, prinsipi, tan opisyal na saray sondalo na Asiria.

¹⁵Onung na ingganggan na ari, amili na sanlasus tan duamplon libon sankamaungan a sondalon akaran tan labinduan libon sankamaungan ya akakabayon pumapana,

¹⁶tan inlira to ran mibakal.

¹⁷Angitaruk met na amayamay a kamilyo, asno, tan mula a nanaawit na saray kagawaan; nanaawit met na amayamay a karniro, baka, tan kanding a para tagano.

¹⁸Akaawat so balang sondalo na dakel ya abaston kakanen tan dakel a bayar a balituk tan pilak a nanlapud kayamanan na ari.

¹⁹Insan pinmikal si Holofornes tan amin a sondalo to, ta onsulong iran makaona nen si Ari Nabucodonosor. Saray karwahi, saray sondalon akakabayo, tan saray sondalon akaran et nankurang iran onlaknab ed intiron dalin ed sagur.

²⁰Akilad sikara iray arum ya olup na sondalo. Diad karakel da, ag ira nabilang-singa ra karakel na olup na saray dorun odino singa ra buer ed gilig na dayat.

²¹Kayari na taloran agew manlapud samay impikal dad siudad na Ninive, akasabi rad saray patar na Bectilet ya asingger ed kapalandeyan na baybay na Ciclicia, tan diman ira nankampo.

²²Manlapud man sinmulong ed kapokdulan si Holofernes tan amin da ray sondalo ton akaran, saray akakabayo, tan saray karwahi.

²³Sigput ton dineral iray bansa na Libia tan Lidia, insan sinamsaman ton amin iray totood Rassis tan saray Ismaelitan manaayam ed gilig na kalawakan, diad sagur na dalin da ray Caldeo.

²⁴Insan binaliw nen Holofernes so Ilog na Eufrates tan bineltang toy dalin na Mesopotamia. Sigput a dineral ton amin iray pinadir a baley a walad gilig na Ilog na Abron ya anggad dayat.

²⁵Asakop toy dalin na Cilicia tan pinatey ton amin iray linmaban ed sikato. Linma ya anggad saray abalaten a ketegay dalin na Hafet, ya abay na Arabia.

²⁶Nilakob to ray Madianita, pinoolan to ray tulda ra, tan pinatas to ray karniro ra.

²⁷Nampalusor si Holofernes ed saray patar na Damasco legan na panaganiy trigo, pinoolan ton amin iray kaalogan, pinatas to ray karniro tan saray baka, sinamsaman to ray baley, dineral toy intiron dalin, tan pinatey ton amin iray lalakin tobun-balo.

²⁸Ag amtay gawaen na amin da ray totoon manaayam ed gilig na Dayat na Mediteraneo, ta ontan lay takot da. Ataktakot ya amin iray totood saray baley na Tiro, Sidon, Sur, Ocina, Jamnia, Asdod, tan Askelon.