Read Pangasinan JUDIT 3 Bible Online

JUDIT 3 - Pangasinan bible

JUDIT 3

¹"Amin da ra yan bansa et angibaki ray olup na totoon migawaan na paknaay kareenan ed kinen Ari Nabucodonosor a taruk da ra yan balikas:

²"Mansiasiansia kamin matoor ed sika, matalonggaring ya Ari Nabucodonosor; sipaparaan kamin manlingkur ed sika tan mangonur na amin a ganggan ya ipaakseb mo.

³"Ipapalima mid sika ray paalagey mi, amin a dalan mi, saray kaalogan min tatanemay trigo, saray ayayep mi, tan saray tulda mi; ikanam ira onung ed labay mo.

⁴"Magmaliw ya aripen mo iray totoo mi, ta nayarian mon ikana ray baley mi onung ed labay mo.

⁵"Kayarin imbaga na samay olup na totoo ira yan balikas,

⁶"impangulo nen Holofernes iray sondalo nen Nabucodonosor a linmeksab ed gilig na Dayat na Mediteraneo. Angyan na saray guardia ed amin da ray baley ya aliber na padir tan nampili na pigaran lalaki ed balang baley tan impagmaliw to ran sondalon sipaparaan ya onsalat.

⁷"Saray totood baley tan diad kaliber-liber a bario et maliket dan inawat si Holofernes; kinokoronaan day kaoloan da na saray rosas tan nansasayaw ira legan a natotogtog iray tambul.

⁸"Balet dinederal nen Holofernes iray amin a pasen a panangigalangan da tan binabatang to ray masanton kakiewan da. Niganggan a maneral na amin a diriyos na dalin, pian galangen na amin a bansa tan tribu si Nabucodonosor labat tan pampikasian da a sakey a dios.

⁹"Insan dinmalan si Holofernes ed Patar na Jezreel ya abay na Dotan, a walad arap na manonan dalan ya onlad kapalandeyan na Juda.

¹⁰Nankampod nanleetan na Geba tan Sitopolis tan nanayam diman a sakey bulan, pian makalay abasto na saray sondalo to.