Read Pangasinan JUDIT 4 Bible Online

JUDIT 4 - Pangasinan bible

JUDIT 4

¹"Nadngelan na saray Israelita so ginagawa nen Holofernes, say pangulo na saray sondalo nen Ari Nabucodonosor ed saray arum a bansa. Nadngelan day impansasamsam tan impandederal tod amin a timplo ra,

²"et mapalaloy inkataktakot dad sikato tan mapaga rad nayarin gawaen tod Jerusalem tan say Timplo na Katawan a Dios da.

³"Agano niy impawil dad Juda manlapud saray inkibantakan dan bansa tan kasumsumpal dan pinasimbalon insaklang so Timplo tan saray kagawaan to tan say altar to, ya adotakan ira onung ed ganggan.

⁴"Kanyan pinasakbayan day intiron dalin na Samaria tan saray baley na Kona, Bethoron, Belmain, Jerico, Choba, Esora tan saray Patar na Salem.

⁵"Nanayaman dan tampol iray toktok na saray palandey, nanggagawa ray tirinsira diad saray bariod kapalandeyan, tan nantitipon iray abaston para saray sondalo. Mapalar ira ta kasumsumpal na impanani ra.

⁶"Si Joakim a Pangulon Pari, a walad Jerusalem diad saman a panaon, et sinulat to ray totood saray baley na Betulia tan Betomistaim, a wala rad arap na Patar na Jezreel ya asingger ed Dotan.

⁷"Ingganggan tod sikara a guardiaan da ray dalan a mamaarap ed Juda, ta mainomay dian labanan iray sondalon ondodogpa, bangta sanderwa labat a too so makaloob ed sarayan dalan.

⁸"Sinumpal na saray Israelita iray ganggan ed sikara nen Joakim a Pangulon Pari tan say Konsiho a nantongtong ed Jerusalem.

⁹"Masimoon a nampikasid Dios iray lalaki na Israel tan nanayuno ra.

¹⁰Nansosolung ira na sakosikara tan saray kaasawan da, saray anak da, saray ayayep da, tan balang sangkailin manaayam diman, balang aripen tan kumikimey.

¹¹Sinakbungan da met na sako so altar. Insan tinmikleb ed dalin diad arap na Timplo iray amin a lalaki, bibii, tan ogogaw; akasolung iran amin na sako, tan napno na dapul so kaoloan da. Nankakasakey iran masimoon a nampikasi ed Dios na Israel; kinerew dad sikato ya ag to iyabuloy a nadakep iray anak da, naala ray kaasawaan da, odino naderal iray nianakan dan baley. Akikasi rad sikato ya ag to panliketen iray Hintil diad pakaderal tan pakadotak dad Timplo onung ed ganggan.

¹³Dinengel na Katawan iray pikakasi ra tan anengneng toy kakairapan da. Abayag ya intuloy na saray totood Juda tan Jerusalem so impanayuno ra ed arap na Timplo na Katawan a Makapanyarin-amin.

¹⁴Akakawes na sako so Pangulon Pari a si Joakim, saray papari, tan amin da ray arum a manlilingkur ed Timplo na Katawan, nen angisaklang ira na inagewagew a bagat a popoolan, saray bagat a pinalapud mabolus a linawa, tan saray bagat a panumpal na samba.

¹⁵Iniinan da na dapul iray turban da tan mannangis iran akikasi ed Katawan, tan kinerew dad sikaton kasian toy intiron bansa.