Read Pangasinan JUDIT 5 Bible Online

JUDIT 5 - Pangasinan bible

JUDIT 5

¹"Nen nadngelan nen Holofernes, say pangulo na saray sondalo na Asiria, a namparaan a mibakal iray Israelita, sinaraan da ray dalan ed palandey, tinirinsiraan da ray toktok na saray palandey, tan angyan ira na saray bangen ed saray dalan ed saray patar,

²"ontan lay impakapasnuk to. Tinawag ton amin iray manoley a Moabita, amin da ray pangulo na saray sondalo na saray Ammonita, tan amin da ray gobirnador na dalin ed gilig na Dayat na Mediteraneo

³"tan kuantod sikara, Manaayam kayod Canaan, kanyan ibaga yod siak so nipaakar ed saray totoon manaayam ed sarayan kapalandeyan. Anto ray siudad a sakop da? Kaonungay karakel na saray sondalo ra? Antoy panlalapwan na pakayari tan biskeg da? Siopay arin mangipapangulo na saray sondalo ra?

⁴"Akin et bukbukor da labat, diad amin da ray totood sagur, so ag ompaway tan onsukod siak?

⁵"Insan si Akior, say pangulo na amin da ray Ammonita, et inmebat ed kinen Holofernes, No naanosan mo ak a dengelen, ibagak ed sikay katwaan nipaakar ed sarayan totoon manaayam ed saray palandey ya asingger ed kampom. Ag ak mantilad sika.

⁶"Sarayan totoo et kabyangan ira na boleg na pigaran taga Babilonia

⁷"ya angikaindan na saray kaogaliyan da ray lalaki ra, pian nagalang day Dios na tawen. Diad kaonuran, apagit irad dalin da, lapud ag da labay so mangigalang ed saray diriyos na lalaki ra. Insan ira batik ed Mesopotamia tan diman ira abayag a nanayam.

⁹"Insan imbaga na dios da a taynan day Mesopotamia tan onla rad dalin na Canaan, a dimay nanayaman da tan nagmaliw iran mayamyaman na balituk, pilak, tan ayayep.

¹⁰Nen dinmalan so eras ed intiron dalin na Canaan, sarayan Israelita a sikatoy panatawag dad sikara, et linma rad Egipto tan diman ira nanayam legan a walay malaem a kakanen. Nen wadman ira, nagmaliw iran baleg a bansa ya ag nabilang iray totoo to.

¹¹Kanyan kinabosul ira na ari na Egipto. Inanamut toy pankanawnawa tod sikara tan impanggawa to ra na laryo. Pinairap to ra tan impagmaliw to ran aripen.

¹²Balet nampikasi ra ed dios da, tan angipadalan na saray deral ed Egipto, et anggapoy nagawaan na saray Egipsio. Nen pinataynan ira na saray Egipsio ed bansa ra,

¹³pinamaga na dios da so Dayat ya Ambalanga a walad arap da,

¹⁴insan to ra inwanwan ed dalan a mamaarap ed Sinai tan Cades-barnea. Pinataynan na saray Israelita iray amin a manaayam ed abalaten na Canaan,

¹⁵nanayaman day dalin na saray Amorreo, pinaandipat da ray totoo na Hesbon, binaliw day Ilog na Jordan, tan sinakop day intiron kapalandeyan a pasen.

¹⁶Pinataynan da ray Cananeo, saray Perezeo, saray Jebuseo, saray taga Sikem, tan amin da ray Gergeseo. Abayag lan manaayam natan ed sarayan kapalandeyan iray Israelita.

¹⁷Kabosul na dios da so kaogsan, kanyan maaligwas ira nen ag ira nankasalanan ed sikato.

¹⁸Balet nen ag da inonur, baleg so inkataloan da diad amayamay a bakal. Diad kaonuran, nala ran priso ed arum a bansa. Apalanas so timplo na dios da tan sinakop na saray kalaban da iray siudad da.

¹⁹Balet natan ta pinmawil la rad dios da, sinmempet la ran nanlapud saray bansan nikaykayatan da. Akayaryan da lamet so siudad na Jerusalem a kawalaan na timplo ra, tan nanayaman da ray kapalandeyan ya anggapoy totoo.

²⁰Kanyan no mankakasalanan natan ira yan totoo sumpad dios da, anggan ag da amtay pankakasalanan da, tan no ag tayo napanduaruwaan a walay ginawa ran kaogsan, natalo tayo ra no ondogpa itayo.

²¹Balet no ag da sinumlang so ganggan na dios da, nepeg mo ran paolyan, ta iyagel to ra, et magmaliw tayon kababaing ed intiron mundo.

²²Nen asumpal nen Akior so paliwawa to, sinmumlang ya amin iray totoon manalalagey ed kaliber-liber na tulda. Impasoot na saray atagey ya opisyal nen Holofernes, saray Moabita, tan saray totoon taga gilig na Dayat na Mediteraneo a pateyen si Akior.

²³Akin et nepeg tayoy ontakot ed sarayan Israelita? tepet da. Makapoy ira; anggapoy biskeg dan mibakal.

²⁴Tilala, Pangulon Holofernes, mainomay iran pateyen na saray amayamay a sondalom.