Read Pangasinan JUDIT 6 Bible Online

JUDIT 6 - Pangasinan bible

JUDIT 6

¹"Nen tinmondan maingal iray totoo ed kaliber-liber na konsiho, nansalita si Holofernes ed kinen Akior diad arap na intiron grupo, saray totoon taga gilig na Dayat na Mediteraneo, saray Moabita, tan saray inupaan ya Ammonita.

²"Akior, antoy pangipapasen mod sikan dili? Sakey kan propita? Siopa kan mangibagad sikami ya ag kami onlan mibakal ed saray Israelita lapud iyagel ira na dios da. Si Nabucodonosor labat so dios mi. Ibaki to ray sondalo to tan paandipaten tod tapew na dalin ira yan Israelita. Ag ira natulongan na dios da.

³"Balet si Nabucodonosor so panlilingkuran mi, tan taloen mi ra a singa labat saksakey a too so amin a sondalo ra. Ag da nayarian a sumlangen iray sondalo min akakabayo;

⁴"andi-duaruwan taloen da ra. Naames na dala iray kapalandeyan tan napano na saray bangkay da iray patar. Naandipat ira kayari na idogpa mi; anggapoy nakeraan a pakatontonan ed sikara. Sikato yay ganggan nen Nabucodonosor, say katawan na intiron dalin, et anggapoy salita ton ag nasumpal.

⁵"Akior, anggapoy kabaliksan mon too; sakey ka labat ya inupaan ya Ammonita, tan mansasalita kan singa sakey a traidor. Ag mo ak nanengneng lamet anggad isabik tan pakadusak ed sayan bansa na saray nampuga ya aripen.

⁶"No kapawil ko, pateyen ka na saray sondalok. Magmaliw ka labat a sakey a ngaran ed listaan na saray inaatey.

⁷"Natan, iyakar ka na saray totook ed kapalandeyan tan itilak da kad sakey ed baley da ray Israelita,

⁸"et kaibam iray totood man ya ompatey.

⁹"Akin et nengneng moy mapaga, Akior? Ag mo ta iisipen a nalabanan ak na saman a baley? Ag mo lilingwanan a sumpalen kon sumpalen iray imbagak!

¹⁰Insan ingganggan nen Holofernes iray totoo ton manaalagar ed tulda to a singkaten day Akior, iyakar dad Betulia, tan ipalima dad saray Israelita.

¹¹Kanyan siningkat na saramay totoo si Akior tan impaway dad kampo, insan da inyakar ed patar. Manlapud man inyakar dad kapalandeyan ya anggad samay sobul a walad leksab na Betulia.

¹²Nen anengneng na saray totood saman a baley ya onsasabi ra, inala ray armas da tan batik irad toktok na pokdul. Amin iray lalakin mangikakana na bansut et inoran da na bato ira may sondalo nen Holofernes, et akapatonda yad sikara ed ikakalab dad palandey.

¹³Apasoot ya onkublid gilig na palandey ira may taga Asiria, tan diman da binalur si Akior tan tinaynan dan akarokul ed alusadsar na palandey. Insan ira pinmawil ed kinen Holofernes.

¹⁴Ag abayag, nen linmeksab manlapud Betulia ira may Israelita, inokbaran day Akior, inyakar dad baley, tan inyarap dad saray opisyal na baley,

¹⁵a diad saman a panaon et sikara di Uzias a lakin anak nen Mikias tan kabyangay tribu nen Simeon, Cabris a lakin anak nen Gotoniel, tan Carmis a lakin anak nen Melkiel.

¹⁶Tinawag na saramay opisyal iray mamatakken na baley; amin da ray bibii tan saray tobun-balo et maganat met iran dinmago. Niakar ed arap na saray totoo si Akior, tan ginapoan nen Uzias a tepetan.

¹⁷Imbaga nen Akior ed sikara so amin ya asalita ed konsiho na bakal nen Holofernes, say sinalita ton dili ed saray opisyal na Asiria, tan no panoy impangipanta nen Holofernes na gawaen tod saray Israelita.

¹⁸Nen nadngel ya na saray totoo, tinmalimukor ira tan inggalang day Dios. Impikasi ra:

¹⁹O Katawan a Dios na tawen, nengneng mo pa no panoy impanpaabeba na saray mapaatagey a kalaban ed saray totoom! Kasian mo kami pa tan tulongan mo kami.

²⁰Insan pinabiskeg day linawa nen Akior tan indayew da lapud samay ginawa to.

²¹Kayari na tongtongan, intagar nen Uzias ed abung to si Akior, tan nanggaway baleg a ponsia para saray mamatakken. Diad saman a sanlabi, nampikasi rad Dios na Israel tan kinmerew ira na tulong to.