Read Pangasinan JUDIT 7 Bible Online

JUDIT 7 - Pangasinan bible

JUDIT 7

¹"Diad ontombuk ya agew, tinipon nen Holofernes ya amin iray sondalo to, tan saray kagampi ton sondalo, Dakerakel a tuloy yan olup na saray sondalo: sanlasus tan pitomplon libon akaran tan labinduan libon akakabayo, andi bali ni ray mananulong a sondalon manaasikaso na saray kagawaan. Ingganggan to ran onsulong ed Betulia, samsamen da ray dalan ed palandey, tan dogpaan da ray Israelita. Kanyan pinmaway ira

³"tan nankampo ra ed abay na sobul diad patar ya asingger ed Betulia. Diad kaawang na kampo ra, linmaknab ed baley na Dotan ya anggad Balbaim, tan diad karokey to, pinmanat manlapud Betulia ya anggad Ciamon, a sankaarap toy Patar na Jezreel.

⁴"Nen anengneng na saray Israelita so karakel na saramay sondalo, mapalaloy inkataktakot da tan kuandad sakey tan sakey, Oputen na saratan a sondalo iray amin a bengatlan nanengneng da. Anggapoy tagano ed kapalandeyan, kapataran, tan kapokdulan a magenap ya ipakan ed singa ontan a karakel na sondalo.

⁵"Balet anggan natatakot ira, inala na amin da ray Israelita iray armas da, sinelselan da ray silewan a mangiiter na tanda ed saray tori, tan sanlabi ran nangguardia.

⁶"Diad ontombuk ya agew impangulo nen Holofernes ya impaway ya amin iray sondalo ton akakabayo, pian nanengneng ira na saray Israelita ed Betulia.

⁷"Ninengneng ton maung iray dalan a mamaarap ed baley tan saray sobul a panlalapwan na danum. Sinamsam to ray sobul tan angipasen na saray guardiad man, insan la pinmawil ed kampo.

⁸"Amin da ray pangulo na saray sondalon Edomita tan Moabita, pati saray pangulo na saray sondalon nanlapud gilig na Dayat na Mediteraneo, et linma rad Holofernes tan kuanda,

⁹"No dengelen moy simbawa mi, aliwan dakel so ompatey ed saray sondalom.

¹⁰Ag manmamatalek ira yan Israelita ed saray armas da, no ag ingen diad kaatagey na saray palandey a panaayaman da, bangta mairap a kalaben iray palandey.

¹¹Kanyan sirin, Kagalang a Holofernes, no ag mo ra dogpaan, anggapoy anggan sakey ya ompatey ed saray sondalom.

¹²Manayam kad kampo tan ag mo papapayen ed ayaman da iray sondalom. Iganggan mo labat iray totoom a saraan da ray sobul diad alusadsar na saray palandey,

¹³ta diman so aasulan na saray totood Betulia. Insan no ompapatey la rad inkaapgaan, isuko ray baley dad sika. Legan to ya, sikami tan saray totoo mi et onkalab kamid toktok na saray palandey ed kaliber-liber, mankampo kamid man, tan ag mi abuloyan so siopaman ya ontaynan ed baley.

¹⁴Naerasan ya anggad patey so balang toolalaki, bibii, tan ogogaw. Anggan kasakbayn na idogpa tayo, natayakan la na saray bangkay da iray daladalan.

¹⁵Diad onyan polaing, napambayar mo rad insumlang da tan say ag da isukon mareen ed sika.

¹⁶Inmabubon si Holofernes tan amin ya opisyal to ed sayan simbawa, kanyan ingganggan ton tombuken yan plano.

¹⁷Saray Moabita tan saray liman libon taga Asiria et inalis dad patar so kampo ra, pian nabantayan day panlalapwan na danum na baley.

¹⁸Linmad kapalandeyan iray Edomita tan saray Ammonita, tan inlira day kampo ra diad kasumbaliwan na baley na Dotan. Imbaki da ray pigaran totoo ra ed abalaten a bokig a mamaarap ed Acraba ya asingger ed Chusi a walad gilig na Ilog na Mocmur. Saray arum a sondalon taga Asiria et inlira rad patar so kampo ra. Maawang so nilaknaban na kampo ra, lapud dakerakel iray tulda tan saray kagawaan a nakaukolan na ontan lan karakel na sondalo.

¹⁹Insan kinmerew na tulong ed Katawan a Dios da iray Israelita. Nakal so biskeg na linawa ra, ta anggapoy nabatikan da lapud aliber ira na sondalo.

²⁰Amin a sondalon taga Asiriasaray akaran, saray karwahi, tan saray akakabayoet talomplo tan apat agew a nilakob day Betulia, anggad anggapo lay danum ed baley.

²¹Amagaan iray dipositoway danum tan saray bobun, kanyan nepeg ya ibunog so danum ya inomen, et anggapoy dinmalan ya agew a dugay danum.

²²Onkakapoy la ray ogogaw; diad inerman a pasen na baley, nayeyengyeng la ray bibii tan saray tobun-balo. Anggapo lay nakdaan a biskeg na amin da ray totoo.

²³Amin da ray totoo ed baleysaray lalaki, saray bibii, tan saray ogogawet minokut day Uzias tan saray opisyal na baley tan ineyag day riklamo ra,

²⁴Dusaen kayo na Dios Lapud ag kayo akipaknaan na pikakaaro ed saray taga Asiria.

²⁵Anggapo natan so ontulong ed sikatayo! Impalima itayo na Dios ed pakayari ra. Nakalan kami lay biskeg tan ompapatey kami lad inkaapgaan

²⁶Tawag yo la ray taga Asiria tan suko kayo lad sikara, tan abuloyan yo lay Holofernes tan saray sondalo to ya onloob ed baley tan manala na labay da.

²⁷Maung nin magmaliw kamin prisod bakal. Pagmaliwen da kamin aripen, balet nipaliis kamid patey, tan ag mi la nanengneng ya ompatey iray kaasawaan mi tan saray anak mi.

²⁸Say tawen tan say dalin so mantasi sumpad sikayo; tasi met sumpad sikayo so Dios tayo, say Katawan na saray lalaki tayo, a sikatoy manudusad sikatayo lapud saray kasalanan da tan saray kasalanan tayo. Maniilalo kami labat tan ipipikasi mi ya ag to la komun abuloyan a nagawa natan ed sikatayo ira yan makapasinagem a bengatla.

²⁹Ginmapon inmakis na maksil so balang sakey a tood man tan nampikasi rad Katawan a Dios.

³⁰Insan inkuanen Uzias ed sikara, Pabiskeg yoy linawa yo, kakaaro! Manalagar tayo ni na limaran agew, ta nengnengen no kasian itayo na Katawan a Dios tayo. Andi-saew ya ag to itayo ikaindan a mamimpinsan.

³¹Balet no anggapoy tulong ya onsabi kayari na limaran agew, sumpalen koy pagagawa yod siak.

³²Kanyan imbaki la nen Uzias ira may totoo. Pinmawil ya amin iray lalaki ed saray pasen a pangguaguardiaan da diad saray padir tan tori, balet sinmempet lad kaabungan da iray bibii tan saray ogogaw. Nakalay biskeg na linawa so intiron baley.