Read Pangasinan JUDIT 8 Bible Online

JUDIT 8 - Pangasinan bible

JUDIT 8

¹"Diad saman a panaon nadngelan nen Judit so getma nen Uzias. Si Judit et biin anak nen Merari, apo nen Ox tan apod pueg nen Jose. Saray lalaki nen Jose et di Uziel, Elkias, Ananias, Gideon, Rafaem, Ahitub, Elias, Hilkias, Eliab, Natanael, Salamiel, Sarasadai, tan Israel.

²"Inatey nen panaganiy sibada so asawa nen Judit a si Manases a kabyagan met na tribu tan boleg nen Judit.

³"Biglan nansakit si Manases lapud petang na agew nen babantayan to ray mambeberber na inani. Ag abayag, inatey ed dokulan tod abung diad Betulia. Nipompon ed lobuk na pamilya diad alog a nampegleyan na Dotan tan Balamon.

⁴"Taloy taon tan apat bulan lan abalo si Judit.

⁵"Diad ermen to nanggaway melag ya ayaman ed tapew na abung to tan nanayam diman a sikakawes na sako.

⁶"Nanayuno legan na sayan panaon likud labat no ag nayariy manayuno: say agew kasakbayan na Agew na Panagpainawa tan say dilin Agew na Panagpainawa, say bispiras na Pistay Balon Bulan tan say dilin Pista, tan amin a pista tan masanton agew a sisilibraan na saray totood Israel.

⁷"Maganggana si Judit. Intilakan nen asawa to na balituk tan pilak, saray katulong tan aripen, saray ayayep tan kaalogan. Intuloy nen Judit ya inasikaso ray kayaryan to,

⁸"tan anggapoy siopaman a nampaoges ed kinen Judit. Mapalaloy inkarilihioso ton bii.

⁹"Nadngelan nen Judit so ontan lan panririklamo na saray totoo sumpad kinen Uzias, natan ta nakalan la ray biskeg na linawa lapud kakulangay danum. Akabatan to a say ebat tod saray riklamo ra et say impangisipan ton isuko toy baley ed saray taga Asiria kayariy limay agew.

¹⁰Angibakiy Judit na sakey ya aripen ton bii a makaoley ed saray nigosio to, ta awiten tod abung ira di Uzias, Cabris, tan Carmis.

¹¹Nen sinmabi ra may opisyal, inkuanen Judit ed sikara, Dengel yo ak pa. Sikayo ray opisyal na saray totood Betulia, balet alingo kayo ed impansalita yod saray totoo natan. Ag yo komun sinambaan ed Dios ya isuko yoy baley ed saray kalaban tayo, no ag itayo tulongan na Katawan ed loob na limay agew.

¹²Antoy pankanepegan yon manubok ed Dios a singa ginawa yo natan? Siopa kayon mangala na pasen na Dios diad pibali yod panagbilay na totoo?

¹³Say Katawan a Makapanyarin-amin so susuboken yo! Ag kayon balut makaaral?

¹⁴Anggapoy polaing a pakatalus yod walad dalem na pusoy too odino pakaamta yod nununoten to. Balet nampangaya kayon mambasa na kaisipan na Dios tan mampatalus na saray kanunotan to. Panoy pangibaga yon natalusan yoy Dios a Manamalsa? Andi, kakaarok, nepeg yon tondaan so pamapapetang yoy olo na Katawan a Dios tayo.

¹⁵No getmaen ton ag to itayo tulongan ed loob na limaran agew, nayarin iyagel to itayo nid panaon a pilien to. Odino nayarin iyabuloy ton pateyen itayo na saray kalaban tayo.

¹⁶Balet ag yo nepeg a diktaan so Katawan a Dios tayo! Abaloan yon singa sakey ed sikatayo? Abaloan yon makapitawalan kayod sikato odino napasoot yon manggaway labay yo?

¹⁷Andi! Ingen, nepeg ya onkerew itayod Dios na tulong to tan mananos tayon manalagar na pangyagel to. No labay to, ebaten toy ikekerew tayo na tulong.

¹⁸Ag tayo mangigagalang ed saray diriyos a ginaway limay too. Anggapoy anggan sakey ed saray boleg, tribu, baley, odino siudad tayo na nanggawad saya, anggaman a ginawa ya na saray lalaki tayo.

¹⁹Sikato yay makasengeg na impangyabuloy na Dios a napatey ira na saray kalaban da tan naala ray amin a kayaryan da. Baleg so inkatalo ra!

²⁰Balet bangta ag itayo mangigagalang ed arum a Dios no ag ingen diad Katawan labat, makapanilalo tayo ya ag to itayo ipolisay odino siopaman ed saray totoo tayo.

²¹No naala na saray kalaban so baley tayo, napelag ed satan so intiron dalin na Juda, tan nasamsaman so Timplo tayo ed Jerusalem. Insan say Dios paibayar to ray bilay tayo lapud pangyabuloy tayon nadotakan, onung ed ganggan, so Timplo.

²²Tetelen to itayo lapud pakapatey tan pakadakep ed saray totoo tayo tan lapud pakaderal na dalin a tinawir tayo. Balawen tan ludlureyen itayo na saray totood saray bansan pakaaripenan tayo.

²³Ag tayo naala so abig-linawa na saray kalaban tayo diad panamegley na isuko tayod sikara natan. No onsuko itayo, ipelag itayo labat na Dios ed kababaingan.

²⁴Andi, kakaarok, nepeg a sikatayoy maung a pangaligan na saray kabansaan tayo. Akasaral ed sikatayo so bilay da tan say kipapasen na Timplo tan altar.

²⁵Susuboken itayo na Katawan a Dios tayo, a singa impanubok tod saray lalaki tayo, et nepeg a misalamat tayo lapud saya.

²⁶Nunot yo no panoy impanubok tod kindi Abraham tan Isaac, tan no antoy agawa ed kinen Jacob nen sikatoy pumapastol nen pangamaen ton Laban ed Mesopotamia.

²⁷Aliwan mapalalon singa sikara so panusubok na Dios ed sikatayo. Ag to itayo dudusaen lapud pamabales tod sikatayo, no ag lapud pamapasakbay tod sikatayon mangigagalang ed sikato.

²⁸Insan inmebat si Uzias ed kinen Judit, Dugan amin iray imbagam, tan anggapoy toon makapisangsangan sumpad katwaan da.

²⁹Aliwan natan labat so impangipanengneng moy kakabatan. Nanlapu lad impanogaw mo, abirbir mi lan amin so kamaungan tan katudyoan na panagnunot mo.

³⁰Balet ompapatey lad inkaapgaan iray totoo tayo. Pinasoot da kamin mangibaga na samay imbaga mi tan mangisamba na ag mi natan nabenegan.

³¹Kanyan natan, bangta mapalaloy inkarilihiosom a bii, ipikasim iray totoo tayo; kerew mod Katawan a mangipelag na oran a mamano na saray bobun tayo, pian napapawil tayoy biskeg tayo.

³²Inmebat si Judit, Sigi sirin. Manggawa ak na bengatlan ag nalingwanan na saray Judion totoo tayo.

³³Natad sayan labi, nepeg a mangguardia kayon talo diad puirta, pian siak tan say aripen kon bii et makataynan kamid baley. Kasakbayan na agew ya insipan yon isuko, ikana ak na Katawan ed pangyagel tod saray totood Israel.

³⁴Balet ag yo nepeg a tepeten ed siak no antoy gawaen ko; ipaliwawak ed sikayo no asumpal lan amin.

³⁵Si Uzias tan saramay arum ya opisyal et kuandad sikato, Iiter mid sikay bindision mi. Iwanwan ka komun na Katawan a Dios tayo legan mon ombabales ed saray kalaban tayo. Tinmaynan irad samay ayaman nen Judit diad tapew na abung to tan pinmawil irad pangguaguardiaan da.