Read Pangasinan EXODO 40 Bible Online

EXODO 40 - Pangasinan bible

EXODO 40

¹"Say Katawan kuantod kinen Moises,

²"Diad ononan agew na ononan bulan iliram so Tuldan Ayamay Katawan.

³"Iyan mod loob to so Kaban na Sipanan a nankarga na Samploran Ganggan tan ibitin mo so kurtina ed arap to.

⁴"Iyan mod loob na Tulda so lamisaan tan yan mod tapew to iray kagawaan to. Iloob mo met so panangipatoonan na lamparaan tan iliram iray lamparaan.

⁵"Iliram ed arap na Kaban na Sipanan so altar a balituk a panagpoolan na insinso tan ibitin mod lolooban na Tulda so kurtina.

⁶"Iliram ed arap na Tulda so altar a panagpoolan na saray bagat.

⁷"Iliram ed nanleetan na Tulda tan altar so talyasi a panagorasan tan panom na danum.

⁸"Iliram so pinagkaalar to tan ibitin mod lolooban to so kurtina to.

⁹"Insan mo isaklang so Tulda tan amin a kagawaan to diad panamegley na panlanam na larak, et magmaliw a masanto.

¹⁰Insan mo isaklang so altar tan amin a kagawaan to diad panamegley na panlanam na larak, et magmaliw a sigput a masanto.

¹¹Onya met so pangisaklang mo ed talyasin panagorasan tan say ansagan to.

¹²Iyakar mod lolooban na Tulda si Aaron tan saray lalakin anak to tan ames mo ra onung ed ganggan.

¹³Solungan mo si Aaron na kawes na pari, lanaan mo na larak na oliba tan isaklang mo, pian makapanlingkur a sakey a pari ed siak.

¹⁴Alam iray anak to tan isolung mod sikara so kawes ya antikey so taklay.

¹⁵Insan mo ra lanaan na larak na oliba a singa impanlanam ed ama ra, pian makapanlingkur iran papari ed siak. Sayan panlanam ed sikara gawaen to ran papari ed amin a panaon ya onsabi.

¹⁶Ginawa nen Moises iray amin a bengatla, onung na ingganggan na Katawan ed sikato.

¹⁷Kanyan diad ononan agew na ononan bulan na kumadwan taon kayari na intaynan da manlapud Egipto, nilira so Tuldan Ayamay Katawan.

¹⁸Inlira nen Moises iray dapan na Tulda, saray tabla to, impeket to ray balewet to, tan impaalagey to ray lusek to.

¹⁹Inlaknab tod tapew na Tulda so sakbung tan tinapewan to na sananey a sakbung, onung na ingganggan na Katawan.

²⁰Insan to inala ra may duaran tapyak a bato tan inyan to rad dalem na Kaban na Sipanan. Insorub tod saray liken na Kaban iray tiken tan inlira tod tapew na Kaban imay sakub.

²¹Insan to inyan ed dalem na Tulda imay Kaban tan imbitin to may sanib a kurtina. Diad onya sinaniban to may Kaban na Sipanan, onung na ingganggan na Katawan.

²²Diad paway na sanib a kurtina ed bandad baybay si Moises inyan tod dalem na Tulda imay lamisaan,

²³tan inyan tod tapew to iray tinapay ya imbagat ed Katawan, onung na ingganggan na Katawan.

²⁴Diad bandad abalaten a kasumbaliwan na lamisaan, inlira to so panangipatoonan na lamparaan,

²⁵tan diad arap na Katawan sinelselan to ra may lamparaan onung na ingganggan na Katawan.

²⁶Inyan tod dalem na Tulda diad arap na samay sanib a kurtina imay altar a balituk,

²⁷tan pinoolan to so ambalingit ya insinso, onung na ingganggan na Katawan.

²⁸Imbitin tod lolooban na Tulda imay kurtina,

²⁹tan diman ed arap na kurtina inlira to may altar a panagpoolan na saray bagat. Dimad tapew na altar insaklang toy bagat a popoolan tan say bagat a trigo, onung na ingganggan na Katawan.

³⁰Inyan tod nanleetan na Tulda tan altar imay talyasin panagorasan, insan to pinano na danum.

³¹Si Moises, si Aaron tan saray lalakin anak to et nanooras na saray lima ra tan saray sali ra

³²kapag onloob irad Tulda odino onla rad altar, onung na ingganggan na Katawan.

³³Inlira nen Moises so pinagkaalar ed kaliber-liber na Tulda tan altar, insan imbitin tod lolooban na samay pinagkaalar so kurtina. Ontan sirin asumpal to iray amin a kimey.

³⁴Insan say lorem kinobutan to may Tuldan tan pinano na kagalangan na Katawan.

³⁵Lapud saya, si Moises ag makaloob ed dalem na Tulda.

³⁶Saray Israelita inyalis da labat so kampo ra kapag ontagey so lorem a manlapud samay Tulda.

³⁷Legan a manayam diman ed Tulda so lorem ag da inyalis so kampo ra.

³⁸Legan na impanaakar-akar da, anengneng da no agew so lorem ya akakobut ed Tuldan Ayamay Katawan tan anengneng da no labi so apoy a mandarlang ed tagey to.