Read Pangasinan JOB 10 Bible Online

JOB 10 - Pangasinan bible

JOB 10

¹"Onsasawa ak lan mambilay. Dengel kayo ed ibalikas kon ampait a riklamo.

²"Ag mo ak kari dudusaen, O Dios. Ibagam pad siak no antoy ipapakasalanan mod siak.

³"Manepeg kasin maruksa ka? Manepeg kasin balawen moy dilin pinalsam? Insan panliketan mo ray plano na saray maoges a totoo?

⁴"Singa kasi panangipasen mi so panangipasen mo ed saray bengatla?

⁵"Singa kasi katikey na bilay mi so katikey na bilay mo?

⁶"Akin sirin et aanapen moy amin a kasalanan ko tan sosokayan moy balang kaogsan ko?

⁷"Amtam ya anggapoy kasalanan ko, tan anggapoy makapangyagel ed siak ed sika.

⁸"Minoli ak na saray liman tan ginawa mo ak, et natan saratan nin limam so manederal ed siak.

⁹"Nunot mo a pinalsa mo ak ed pitek; pagmaliwen mo ak kasi a dabuk lamet?

¹⁰Initdan moy pakayari so amak a mangilalak ed siak; pinabaleg mo ak ed eges nen inak.

¹¹Saray pokel tan saray olat so impanogyup mod laman ko; say laman tan say baog so impamalkut mod saray pokel ko.

¹²Initdan mo ak na bilay tan ag mangoman a panangaro; lapud panangasikasom mabilay ak ni ya anggad natan.

¹³Balet amtak la natan a nanlapud saman wala lay maamut a getmam a mamasakit ed siak.

¹⁴Babantayan mo ak ta nengnengen mo no mankasalanan ak, pian walay makasengeg na ag mo pamirdonad siak.

¹⁵No mankasalanan ak pangaskasiyay kipapasen ko, balet no manggawa ak na katunongan anggapoy nagunggonak, Nanairapan ak tan napno ak na kababaingan.

¹⁶No siak so onaligwas osilan mo ak a pateyen a singa lion; manggagawa ka na anggan saray milagro a mamasakit ed siak.

¹⁷Wala lawas so tasim sumpad siak; mampetang lan mampetang so olom ed siak; wala lawas so kairapan ya iiter mod siak.

¹⁸O Dios, akin et inyabuloy mo nin nianak ak? Inatey ak la komun kasakbayan a walay akanengneng ed siak.

¹⁹Nipompon ak la komun a tampol kapaway kod eges nen inak, pian singa ak ni lamlamang ag nambilay diad tapew na dalin.

²⁰Ag ta pigpigara lay nakdaan ya agew a pambilay ko? Pambukbukor mo ak la, pian naligliwa ak na daiset.

²¹Magano lay itaynan ko tan ag ak lan balut ompawil; onla ak ed ambilonget tan maermen a dalin,

²²dalin a walay kabilongetan, tan gewgew, dalin ya anggan say liwawa et bilonget.