Read Pangasinan JOB 11 Bible Online

JOB 11 - Pangasinan bible

JOB 11

¹"Insan inmebat si Zofar, a taga Naaman,

²"Anggapoy onebat ed sarayan andi-kakanaan a balikas? Napatonung kasiy sakey a too lapud masalita?

³"Job, abaloan mo ya ag mi ka naebatan? Ya ag kami makasalita lapud saray ansakit a salitam.

⁴"Ibabagam a katwaan iray salitam; tan malinis so pusom ed arap na Dios.

⁵"Oy la komun ta ebatan ka na Dios!

⁶"Ibaga tod sikad satan ya amayamay so ag amta nipaakar ed kakabatan; wala ray bengatlan ag natalusan na too. Daisit nen say kanepegan mo so panudusa na Dios ed sika.

⁷"Nayarian mo a sukaiten iray panganggaan na talonggaring tan pakayari na Dios?

⁸"Atagey nen say tawen so panganggaan na Dios, balet ag mo nayarian a sabien. Amta na Dios so nipaakar ed pasen a panaayaman da ray inaatey, balet ag mo amta.

⁹"Malaknab nen say mundo so talonggaring na Dios, tan maawang nen say dayat.

¹⁰Kabat na Dios no siopa ray andi-kakanaan a totoo; siopay makasbel ed sikato?

¹¹Kabat na Dios no siopa ray andi-kakanaan a totoo; nanenengneng to ray amin a maoges a gagawaen da.

¹²Onggapon makabat so toon makulang-kulang no ompotiy wawak.

¹³Job, pagmaliw mon matunong so bilay mo. Singger kad Dios.

¹⁴Ekal mod abung mo so kaogsan tan say kabaglan.

¹⁵Insan kad satan miarapan lamet ed sankamundoan, ya anggapoy takot mo tan mabiskeg so linawam.

¹⁶Nalingwanan mo lad satan iray gunigon mo, singa la delap a dinmalan tan sigput lan alingwanan.

¹⁷Onliwawa met lad satan a singa agew ed kaagwan so bilay mo, singa liwawad kabwasan so pagmaliwan na bilonget na bilay mo.

¹⁸Mambilay kan arawid kaatapan tan napno na ilalo; iyagel ka na Dios tan pampainawaen to ka.

¹⁹Ag mo la takotan iray kalaban mo; dakel iray totoon onkerew na tulong ed sika.

²⁰Balet saray maoges a totoo onnengneng irad kaliber-liber da, et anggapoy napaliisan da. Patey labat so iilaloan da.