Read Pangasinan JOB 12 Bible Online

JOB 12 - Pangasinan bible

JOB 12

¹"Inmebat si Job:

²"Anggapoy duaruwa a sikayoy mangilalaman ed saray katoowan. No ompatey kayo ompatey a kaiba yoy kakabatan.

³"Balet walay pakatalus kon singa sikayo; aliwa ak a saginonur ed sikayo kabat na balang sakey iray imbabagam.

⁴"Elek-elekan ak natan na anggan saray kakaarok, elek-elekan da ak anggaman a matonung ak tan anggapoy pakabalawan ed siak; balet walay panaon ya inebatan na Dios so pikakasik.

⁵"Anggapo ray gunigon yo, balet ta luludlureyen yo ak; singa kakabilen yoy sakey a too a ngalngali la natumba.

⁶"Balet mambibilay ed kareenan iray matatakew tan saray anggapoy takot ed Dios, anggaman a say dios da labat et say dilin biskeg da.

⁷"Anggan saray manok tan ayayep wala ray nibangat dad sika;

⁸"paibangat kad saray pinalsan walad tapew na dalin tan saray walad dalem na dayat.

⁹"Amta ran amin a say Katawan so amalsad sikara.

¹⁰Say Dios so mangiwawanwan ed bilay na saray pinalsa to; walad lima to so bilay na balang too.

¹¹Balet no panoy panliket na dilam ed pannanam na kakanen, ontan met so panliket na saray layag mo ed pandengel na saray salita.

¹²Saray mamasiken walay kakabatan, tan pakatalus da; balet say Dios walay kakabatan tan pakayari to. Saray mamasiken walay pakatalus da; say Dios walay pakatalus tan pakayari ton manggawa.

¹⁴No amagbag so Dios, siopay makapangipaalagey, tan siopay makapangibolus ed toon ikolung to?

¹⁵No paeren na Dios so oran namagaan so dalin; no ibolus toy oran onsabiy delap.

¹⁶Mabiskeg so Dios tan lawas manatalo; walad silong na pakaoley to iray managpalikdo tan saray napapalikdo.

¹⁷Eekalan toy kakabatan iray manoley, tan pagmamaliwen ton singa makulang-kulang iray pangulo.

¹⁸Eekalan toy pakaoley iray arari tan pagmamaliwen to ran priso;

¹⁹papaabebaen to ray papari tan saray makapanyari.

²⁰Pepepetan toy sangi da ray totoon panmamatalkan, tan ekalan toy kakabatan da ray mamasiken.

²¹Ipepelag tod kakabaingan iray walad pakayari, tan patotondaen toy biskeg da ray manoley.

²²Paliliwawaen toy anggan sankabilongetan iran pasen.

²³Pagmamaliwen ton mabiskeg tan matalonggaring iray bansa, insan tataloen tan dederalen to ra.

²⁴Pangmamaliwen ton singa makulang-kulang iray pangulo na totoo, tan panaakar-akaren to ran anggapoy getma;

²⁵karapkarap irad kabilongetan tan mandongilngil iran singa abuek.