Read Pangasinan JOB 13 Bible Online

JOB 13 - Pangasinan bible

JOB 13

¹"Amin ya ibabaga yo et nadngelan ko la ra nen saman, tan natatalusan ko ran amin.

²"Amtak iray amta yo, aliwa ak a saginonur ed sikayo.

³"Balet aliwan sikayoy kasangsangan ko no ag say Dios; labay kon sikatoy pipalinewan ko.

⁴"Sasakuban yo na tila so ag yo pakaamta; singa kayo saray doktor ya anggapoy napaabig da.

⁵"Maung ni no ag kayo la oneesel, et nayarin walay makabalo a makabat kayo!

⁶"Dengel yo natay ipalinew ko, tan talusan yoy tatalindegan ko.

⁷"Akin et mantitila kayo? Abaloan yon say panitila yo et natulongan toy Dios?

⁸"Iyaagel yo so Dios? Isasangsangan yo ed korti?

⁹"No sukayan to kayo wala kasiy narumog ton kamaungan? Abaloan yon napalikdo yoy Dios a singa pamapalikdo yod saray totoo?

¹⁰Anggaman ya iyaamut yoy panangibiig yo, pampasnukan to kayo,

¹¹tan diad pakayari to taktakoten to kayo.

¹²Andi-kakanaan a singa dapul iray probirbio; tan lopuk a singa langa iray pankatonungan yo.

¹³Mandeen kayo tan itdan yo ak na pankanawnawan mansalita, nagawa lay nagawa ed siak.

¹⁴Akaparaan ak a mangipostay bilay ko.

¹⁵Nakal lamlamang so ilalok, kanyan anggapoy wala ed siak anggan pateyen ak na Dios. Isangsang kon siansia so katonungan ko ed arap to.

¹⁶Nayarin nilaban ak lapud sayan sebeg ko, bangta anggapoy maoges a toon ompangayan miarapan ed Dios.

¹⁷Dengel yo natan so pangipaliwawak.

¹⁸Sipaparaan ak a mangitalindeg ed kasok, lapud amtak a wala ak ed katunongan.

¹⁹O Dios, ondago kan mangakusa ed siak? No ondago ka, sipaparaan ak ya ag onesel tan ompatey.

²⁰Walay duaran bengatla a kerewen kod sika. Iter mo ra et ag ta ka la iyamutan.

²¹Tondaan mo ak lan dusaen, tan ag mo ak la tataktakoten.

²²Mansalita kan onona, O Dios, insan ak onebat. Odino mansalita ak ya onona, insan mo ak ebatan.

²³Anto ray kaogsan tan kasalanan ko? Antoy ray ipapakasalanan mod siak.

²⁴Akin et papaliisan mo ak? Akin et ipapasen mo ak a kalaban?

²⁵Sasalien mo ak a taktakoten? Sakey ak labat a bolung; dodogpaan moy sakey ya amagan dayami.

²⁶Ambelat iray ipapakasalanan mod siak, pati saray ginagawak nen ogaw ak ni.

²⁷Babaloren moy golunggolung iray salik; iimanoen moy amin a gagawaen ko, anggan pati saray bakat ko.

²⁸Lapud saya, singa ak namomogay ya aboluk a kiew, singa kawes ya ataboney.