Read Pangasinan JOB 14 Bible Online

JOB 14 - Pangasinan bible

JOB 14

¹"Nianak a makapoy so too; antikey tan magunigon so bilay to.

²"Ombaleg, ombuskag tan nalaylay a singa saray rosas; naandipat a singa saray anino.

³"Iimanoen moy anggan siak, O Dios, odino sasalaysayen tan sisintinsiaan mo ak?

⁴"Anggapoy malinis a napapaway ed antokaman a marotak a singa say too.

⁵"Walay nigetar a dokey na bilay na too nigetar lay bilang na bulan a pambilay to. Sikay angipasen na panganggaan to et ag to nalabsanan.

⁶"Ag mo la kari nenengnengen tan paolyan mo lan bokur; paolyan mon panliketan toy mairap a bilay to no nayarian to.

⁷"Wala niy ilalo ed sakey a kiew ya abatang; nayari nin onsimit tan mansanga.

⁸"Anggaman a matakken la ray lamut to, tan aboluk lad dalin so akeraan a sengeg to,

⁹"no nasalog-salog onsimit ni, tan mansangan singa malangwer a tanaman.

¹⁰Balet no ompatey so too, anggaan to la; no naoyus so linawa to, iner lad satan so kawalaan to?

¹¹Onsabiy panaon ya ontondan onagos so ilog, tan naekatan so anggan dayat.

¹²Ontan met say toon inatey ag lan balut ombangon; ag la nabangon anggad mangangga ray katawenan; ag lan balut naliing ed ogip to.

¹³Iyamut mo ak komun ed pasen a panaayaman da ray inaatey; iyamut mo ak diman ya anggad napakepay pasnuk mo, insan iganam so panaon a nunoten mo ak.

¹⁴No ompatey so too, nabilay ni kasi? Balet manalagar ak na magmaung a panaon, anggad napalabas yan panaon na gunigon.

¹⁵Insan ka ontawag et onebat ak; manliket kad satan ed siak, siak a pinalsam.

¹⁶Diad satan imanoen moy amin a gawaen ko, balet ag mo la anapen iray kasalanan ko.

¹⁷Pirdonaen tan lingwanan mo ray kasalanan ko; paandien mo ray amin a kaogsan ko.

¹⁸Onsabiy panaon a nageba ray palandey, tan nagalasogus iray ankakabaleg a bato.

¹⁹Say danum oputen to ray bato, tan say maples ya oran iyagos to so dalin; onya so panederal mod ilalo na too.

²⁰Ipasilong mod pakayarim so sakey a too, insan mo paandipaten ya anggad angga; omanen moy nengneng na lupa to, insan mo la pasiputen ed sayan bilay.

²¹Makagamur na kagalangan iray lalakin anak to, balet ta ag to amta; ag to met amta no napelag irad kababaingan.

²²Nalikna to labat so sakit na dilin laman to tan say ermen na dilin kanunotan to.