Read Pangasinan JOB 15 Bible Online

JOB 15 - Pangasinan bible

JOB 15

¹"Inmebat si Elifaz a taga Tema:

²"Andi-kakanaan tan andi-kabaliksan iray salitam, Job!

³"Say toon makabat ag mansalita na singa pansasalitam, odino iyagel toy sikaton dili diad panamegley na saray andi-kakanaan a salita.

⁴"Ibabangat mon ag ontakot ed Dios iray totoo; babanoen mo ran mampikasi ed sikato.

⁵"Say kaogsan mo ipapanengneng na panagsalitam; say panisimolam et saray masilib iran salitam.

⁶"Ag la nakaukolan a sintinsiaan ta ka; saray dilin salitam so manintinsiad sika.

⁷"Sika ta so onaan a nianak a too? Wala ka la sirin nen palsaen na Dios iray kapalandeyan?

⁸"Nadngel mo ta ray plano na Dios? Sika ta labat so kawalaan na kakabatan na amin a katoowan?

⁹"Anggapoy amtam ya ag mi amta, tan anggapoy natalusan mo ya ag mi natalusan.

¹⁰Say nanaralan miy kakabatan saray mamasiken saray lalakin mamatakken nen si amam.

¹¹Akin, kulang nid sika yay panliligliwa na Dios ed sika? Insalitaan mi ed sika na maamoyut iran salita.

¹²Antoy mamapaawet na pusom? Akin et mandarlang iray matam ed pasnuk mod sikami?

¹³Akin et ampetang so olom ed Dios, tan ansakit iran salitan imbolus mod sikato?

¹⁴Walay toon nagnap a malinis so puso to? Walay toon nagnap a matonung ed arap na Dios?

¹⁵Say Dios ag to napanmatalkan iray anggan anghil to; anggan sikara aliwa ran malinis ed pakanengneng to.

¹⁶Say panggagawa na too ed kaogsan et singa kakainom to na danum; on, marotak tan andi-kakanaan so too.

¹⁷Dengel ka natan Job, ta ibagak ed sikay anengneng tan naamtaan ko.

¹⁸Saray makabat a totoo imbabangat da ak na saray katwaan a naaralan dad saray lalaki ra; tan anggapo so inyamut da.

¹⁹Sikara labat so nanayam ed dalin da tan anggapoy taga arum a bansan ananggoyur ya ikaindan day Dios.

²⁰Say maoges a too a mamairap ed kapara ton too ed nagunigon legan ton mambilay.

²¹Makapataktakot iran tanul so narengel to, tan dogpaan na saray tutulisan no abaloan ton arawid kaatapan.

²²Anggapoy ilalo ton nibatikan toy kabilongetan, ta akaparaan so ispadan mamatey ed sikato,

²³tan manaalagar iray buitrin mangan na bangkay to. Amta to ya ambilonget so arapen to;

²⁴taktakoten na kapagaan tan ipatey a singa ra arin akaparaan a mibakal.

²⁵Onyay pansumpalan na toon ayagan toy poniti so Dios tan labanan toy Makapanyarin-amin.

²⁶Mapaatagey tan mananumlang yan too; lawas sankaegnaan toy samper to ta ondogpan milaban ed Dios.

²⁸Sikato yay toon anakep na saray siudad tan angalad saray abung ya imbabatkan na saray akankayarian, balet deralen na bakal ira man a siudad tan kaabungan.

²⁹Ag mambayag iray kayamanan to; ag mansiansia ray kayaryan to. Naandipat so anggan anino to,

³⁰tan ag to nibatikan so kabilongetan. Sikatoy singa sakey a kiew ya apoolan iray sanga-sanga to, tan intitikyab ed arawi na dagem iray rosas to.

³¹No sikatoy makulang-kulang a manmatalek ed kaogsan anggapoy arum a nangunggona to no ag say kaogsan.

³²Kasakbayay panaon to nalaylay la; nalenes a singa sanga tan namagaan la.

³³Magmaliw a singa wakal na ubas ya apagpag iray maetan bunga to; singa kiew na oliban apagpag iray rosas to.

³⁴Anggapoy nakeraan a kabyangay boleg na saray totoon anggapoy Dios da, tan deralen na apoy so abung a nipaalagey lapud pasoksok.

³⁵Sikara yay totoon mamplaplanoy kaogsan tan manggagaway golo; napno lawas na panamalikdo so kapusoan da.