Read Pangasinan JOB 16 Bible Online

JOB 16 - Pangasinan bible

JOB 16

¹"Inmebat si Job:

²"Akadngel ak na saray salitan singa saraya nen saman; gunigon labat so iiter yon ligliwa.

³"Ag kayo la onsawan mansalita? Sikayo lawas so kaonuran a nepeg a dengelen?

⁴"No pasen yoy pasen ko tan pasen koy pasen yo, nibagak iray ibabaga yo. Napeyeng-peyengan ta kayo, tan nayarian koy ag ontondan mansalita sumpad sikayo.

⁵"Napabiskeg koy linawa yo lapud saray simbawak, tan ag ak mampainawan mansalita a panligliwak ed sikayo.

⁶"No mansalita ak ag naekal so liliknaen ko, tan no ag ak onesel ag ak nainomayan ed paniirap ko.

⁷"Pinakapoy mo ak lan maung, O Dios; inyabuloy mon ompatey iray kabyangay pamilyak.

⁸"Inerel mo ak, ta sikay kalaban ko. Kabatbaog tan kapokepokel ak la, et ipapasen ya na saray totoo a mamaneknek ed impankasalanan ko.

⁹"Diad pasnuk na Dios, tinetegteg toy intiron laman ko, panngiletan to ak, tan mandarlang iray mata tod siak.

¹⁰Elek-elekan ak na saray totoo; momokuten da ak insan da ak tamtampalen.

¹¹Impalima ak na Dios ed saray totoon maoges.

¹²Mambibilay ak nen saman ed kareenan, balet say Dios tinekmelan to ak ed beklew insan to ak imbabasig a pinairap. Ipapasen to ak a sakey a kekenaen,

¹³insan to ak papanaen ed amin a dapag natatabektabek tan nasusugat-sugat ak na saray pana; anggaman ya onyay agawa, ag to ak kasian.

¹⁴Susugaten to ak lan susugaten; dodogpaan to ak a singa masebeg a mibabakal.

¹⁵Maneermen ak kanyan nankawes ak na sako, makapkapoy ak lan akayorung diad dabuk.

¹⁶Ambalbalanga lay lupak ed kakaakis, linmalarag tan asiregsireg la ray matak.

¹⁷Anggaman ontan ag ak ni angabil, tan masimoon ni so pikakasik ed Dios.

¹⁸O Dalin, ag mo pa tatabunan iray maoges ya agawad siak! Ag mo papaolyan so katonungan a kekerewen ko!

¹⁹Walay sakey a tasik ed tawen a mamaneknek ya ag ak nankasalanan.

²⁰Babalawen ak na kakaarok; manterter iray luak ed Dios.

²¹Labay kon walay mangitalindeg ed siak ed Dios, a singa pangitalindeg na sakey a too ed kaaro to.

²²Daiset lan taon so akeraan a pambilay ko, tan mankukurang ak ed dalan ya ag ko la pawilen.