Read Pangasinan JOB 18 Bible Online

JOB 18 - Pangasinan bible

JOB 18

¹"Inmebat si Bildad a taga Sua:

²"Job, kapigay itondam a mansalita? No itondam makapitongtong kamid sika.

³"Akin et ipapasen mo kamin anggapoy kalakal a singa baka?

⁴"Papasakitan moy sikan dili labat lapud petang na olom. Nikaindan sirin mundo lapud sika? Iyalis sirin na Dios iray palandey lapud sika?

⁵"Naerep so silew na maoges a too; ag lan balut ondalang so apoy to.

⁶"Onkuyep so lamparaan ed tulda to.

⁷"Mankitsing nen saman so kutdang to, balet natan mankitley la; saray dilin plano to so mangiparokul ed sikato.

⁸"Nasabi toy patit ya iket nasinger ed satan iray sali to;

⁹"nabalur iray mokur to tan sikatoy nipoger.

¹⁰Niamut ed dalin so patit a para sikato; nitarya ed dalanen to so sakey a kalut.

¹¹Diad kaliber-liber to takot so manaalagar ed sikato; tombutombuk ed inerman a laen to.

¹²Mayaman nen saman, balet natan nanaerasan; manaalagar ed abay to so deral.

¹³Onkakayat ed intiron laman to so makapatey a sakit, tan boboluken to ray taklay to tan saray bikking to.

¹⁴Niarawi ed tuldan panmamatalkan to, tan nigayugoy ya onarap ed Ari na Patey.

¹⁵Nayarin manayam natan so siopaman ed tulda to kayarin awalsikan na asuprin pamatey na bigis!

¹⁶Amagaan iray lamut to tan nalnes iray sanga to.

¹⁷Angangga la so inkabantug to ed dilin bansa to tan diad arum a bansa; anggapo lay makanunot ed sikato.

¹⁸Taynan to lay liwawa ya onarap ed kabilongetan; taynan to lay tapew na dalin.

¹⁹Anggapoy akeraan a kabyangay boleg to; inaatey la ran amin.

²⁰Manlapud bokig ya anggad sagur, amin iray makangel ed inkagawa to, onkelaw tan onggiwgiw irad takot.

²¹Sikato ya so pansumpalan na saray totoon maoges, sa pansumpalan na saray ag mangingalngalep ed Dios.