Read Pangasinan JOB 19 Bible Online

JOB 19 - Pangasinan bible

JOB 19

¹"Inmebat si Job:

²"Akin et ag yo ak la tondaan a pairapen diad panamegley na saray salita?

³"Papabaingan yo ak lan papabaingan; ag kayo la ambaing a manggaway makapoy ed siak?

⁴"Anggan ipasen bilang a nankasalanan ak, antoy pibabali yo ey?

⁵"Abaloan yo a maung kayo nen say siak, tan ipapasen yo a say paniirap ko so paneknek a nankasalanan ak.

⁶"Nepeg yon amtaen a say Dios so nanggawad sayan kairapan; pinatitan to ak ya inerel.

⁷"Manririklamo ak ed inkaruksa to, balet anggapoy onderengel; anggapoy onderengel ed ikekerew koy katunongan.

⁸"Sinaraan na Dios so dalan, kanyan ag ak makalabas; kinobutan to na bilonget so dalan ko.

⁹"Pinaandi to ray amin a kayamanan ko, tan dineral toy kagalangan ko.

¹⁰Babakbaken to ak ed anggan iner a dapag. Babagoten ton singa kiew so ilalok, insan tataynan to ak a nalenes tan ompatey.

¹¹Mapalaloy pasnuk na Dios ed siak; ipapasen to ak a sakey a kalaban to.

¹²Ibabaki ton ondogpad siak iray sondalo to; mankokotkot iray abut ya amutan da tan kokobkoben day tuldan panaayaman ko.

¹³Say Dios impaikaindan to ak ed saray agagik; ag ak la kabat na saray kabat ko nen saman;

¹⁴nagsitaynan la ray kakanayon tan saray kakaarok.

¹⁵Alingwanan ak la na saray sinasangkailik nen saman ed abung ko; saray katulong kon bibii ipapasen da ak lan sangkaili tan taga arum a bansa.

¹⁶No tawagen koy sakey ya aripen, ag to ak ebatan anggaman a mikakasi ak a patulongan.

¹⁷Ag natepelan na asawak so banget na sangik, tan ag ak singgeran na saray anggan dilin agagik.

¹⁸Balbalawen ak na saray ogogaw tan elek-elekan da ak no nanengneng da ak.

¹⁹Kabkabosul ak na anggan saray malet a kakaarok; ginula ak na saray pinabpablik nen saman.

²⁰Kapokepokel ak la; ngalngali ag ko aliktaray patey.

²¹Kakaaro ta kayo! Kasian yo ak! Tinomba ak la na Dios.

²²Akin et papairapen yo ak a singa pamapairap na Dios? Ag kayo ni nakda ed pamapasakit yod siak?

²³Oy la komun a walay ag makalingwan ed sarayay ibabagak, tan isulat to rad sakey a libro.

²⁴Odino nitatak komun ed baton-dampay ira yay salitak, pian mansiansia ra ed ando lan ando.

²⁵Balet amtak a walad tawen so sakey a manangyagel ko, onsabid kaonuran a mangyagel ed siak.

²⁶Anggaman a naoput na bigis yay baog ko, legan a wala ak nid sayan laman ko nanengneng ko so Dios.

²⁷Nanengneng na saray dilin matak, et aliwan sangkaili ed siak. Nakalan ak na biskeg na linawa lapud kuanyo,

²⁸Panoy pamairap tayod sikato? Nananap kayoy pamasengegan yoy pangabil yod siak.

²⁹Balet natan, takotan yoy ispada say ispadan mangyakar na pasnuk na Dios ed kasalanan, pian naamtaan yo a walay manintinsia.