Read Pangasinan JOB 2 Bible Online

JOB 2 - Pangasinan bible

JOB 2

¹"Nen sinmabiy agew ya onarap lamet ed Katawan iray anghil na Dios tan wadman met si Satanas.

²"Tinepet na Katawan ed sikato, Iner so nanlapwan mo? Inmebat si Satanas, Manaakar-akar ak ta liliberen koy intiron mundo.

³"Tinepet na Katawan, Naimanom si aripen kon Job? Anggapoy miparad sikato. Anggapoy pakabalawan ed sikato, matonung, walay takot tod siak, tan aarawian toy kaogsan. Tinanggoyur mo ak ya abuloyan ta kan maneral ed sikato anggaman ya anggapoy makasengeg, balet matoor nin siansia.

⁴"Inmebat si Satanas, Ag kawananen na too so amin a kayaryan to dapot mambilay.

⁵"Balet natan, salim a pasakitan so laman to, et nengneng mo no ag to ka inayew ed dilin arap mo!

⁶"Kanyan inkuan na Katawan ed kinen Satanas, Sigi sirin, ipalimak ed sika si Job, balet ag mo papateyen.

⁷"Tinmaynan ed arap na Katawan si Satanas tan pinagiri toy intiron laman nen Job.

⁸"Linmad abay na bantakay dotak, inmirung tan angalay langa ya impankakarkar tod saray giri to.

⁹"Inkuan ed sikato na asawa to, Matoor ka nin siansia, anto? Akin et ag mo la isambay Dios, pian ompatey ka la?

¹⁰Inmebat si Job, Andi-kakanaay ibabagam! No mangiter na kamaungan so Dios, awaten tayo. Akin et ag tayo awaten no kairapan so iter to? Anggan ontan lay paniirap to si Job ag nansalita na maoges sumpad Dios.

¹¹Say paniirap nen Job abalitaan na saray taloran kakaaro to a di Elifaz a taga Teman, Bildad a taga Sua, tan Zofar a taga Naaman. Nampapakna ran talo a bisitaen day Job, ta ligliwaen da.

¹²Nen wala ni rad arawi anengneng da lay Job, balet ag da ni abirbir. Nen abirbir da la nanogaog ira. Pinipilat day kawes da diad pangipanengneng day ermen da, nansibwag irad tagey na dabuk tan diad olo ra.

¹³Insan pitoy agew tan pitoy labin kaiba ran inmirung ed dalin; anggapoy imbaga ran balut, lapud anengneng dan ontan lan paniirap to.