Read Pangasinan JOB 20 Bible Online

JOB 20 - Pangasinan bible

JOB 20

¹"Inmebat si Sofar a taga Naaman:

²"Job, ginolom so kanunotan ko, kanyan ag ko la natepelan so onebat.

³"Sakey a panamabaing ed siak iray imbabagam, balet amtak no panoy iyebat kod sika.

⁴"Andi duaruwa ya amtam a nanlapu la nen saman, nen inmonan nipasen ed tapew na dalin so too,

⁵"anggapoy maoges a toon nambayag so impanliket to.

⁶"Nayarin ombaleg ya anggad tawen, tan diad kaatagey to natokdul na olo to iray lorem,

⁷"balet singa dabuk ya itikyab na dagem. Saray gendat a makapikabat ed sikato onkelaw ira no iner so nakar to.

⁸"Naandipat a singa sakey a kogip, singa pasingayew ed labi, insan ag lan balut nanengneng.

⁹"Ag la nanengneng na saray gendat ton kakaiba; naandi la ed pasen a gendat ton nanayaman.

¹⁰Magmaliw a mikakasi ed saray mairap-bilay iray anak to, tan sikaray mangipawil na saray tinatakew to.

¹¹Malangwer tan mabiskeg nen saman so laman to, balet ag mabayag magmaliw a dabuk.

¹²Mananam ed sikato so kaogsan tan masamsamit ton molmolmolan.

¹⁴Balet diad eges to magmaliw ya ampait a kakanen, ampaipait a singa samal.

¹⁵Say maoges a too iyoota toy kayamanan a tinatakew to; babawien na Dios ya alaen anggan walad dalem na eges to.

¹⁶Singa samal so kaogsan ya aakmunen na maoges a too; mamapatey ed sikato a singa ketket na nanditan oleg.

¹⁷Ompatey la kasakbayay pakanengneng tod saray ilog na larak na oliba, odino saray kolus a panagagosay gatas tan dilo.

¹⁸Nakaukolan ya ipawil to ray amin a nanlingetan to; anggapoy pankanawnawa ton manliket ed kayamanan to,

¹⁹lapud pinapairap tan inkakaindan to ray mairap-bilay, tan sinasamsam to ray abung ya impapaalagey na saray arum a totoo.

²⁰Ag balut napenek so inkaagom to.

²¹No mangan anggapon balut so nakeraan, balet natan mansamput la so aligwas to.

²²Diad panaon na iyali-aligwas to, ondetdet ed sikatoy amin a belat na kairapan.

²³Paolyan mon mangan na labalabay to! Diad ontan lan pasnuk na Dios dusaen to.

²⁴Diad ibatik ton ompaliis ed ispadan balatyang, nakena na panan gansa.

²⁵Ontalus ed laman to so sakey a pana; onterter ed masileng ya otuk na pana so dala to, tan nalemay so puso to ed takot.

²⁶Naderal ya amin iray tinipon ton kayamanan; sakey ya apoy ya ag pinadalang na limay too, so mamool ed sikato tan amin a kabyangay pamilya to.

²⁷Ipatnag na tawen to kasalanan na sayan too, tan mantasi so dalin sumpad sikato.

²⁸Amin a kayamanan to naderal ira no onsabiy agew na pasnuk na Dios.

²⁹Sikato yay pansumpalan na saray totoon maoges, say pansumpalan ya ipabetang na Dios ed sikara.